ସେପଟେ ରାଜ୍ୟରେ ବନ୍ୟା ପରିସ୍ଥିତି ଉପରେ ନିରନ୍ତର ନଜର ରଖାଯାଇଛି। ପ୍ରଭାବିତ ଅଞ୍ଚଳଗୁଡ଼ିକରେ ରିଲିଫ୍, ଉଦ୍ଧାର, ପୁନରୁଦ୍ଧାର ଓ ଅତ୍ୟାବଶ୍ୟକ ସେବା ଯୋଗାଣ କାର୍ଯ୍ୟ ଜୋରଦାର ଚାଲିଛି।

ରାଜ୍ୟ ଜରୁରୀକାଳୀନ ଅପରେସନ୍ ସେଣ୍ଟର୍ (SEOC) ଓ ସ୍ୱତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟର ସଦ୍ୟତମ ରିପୋର୍ଟ ଅନୁଯାୟୀ, ଚଳିତ ପର୍ଯ୍ୟାୟରେ ୭ଟି ଜିଲ୍ଲା ବନ୍ୟାରେ ପ୍ରଭାବିତ ହୋଇଛି। ସେଗୁଡ଼ିକ ହେଲା: ବାଲେଶ୍ୱର, ମୟୂରଭଞ୍ଜ, ଭଦ୍ରକ, ଯାଜପୁର, କେନ୍ଦୁଝର, କେନ୍ଦ୍ରାପଡ଼ା ଓ ସୁନ୍ଦରଗଡ଼।

ଏହି ଜିଲ୍ଲାଗୁଡ଼ିକର ୭୬ଟି ବ୍ଲକ୍, ୫୦୫ଟି ଗ୍ରାମ ପଞ୍ଚାୟତ, ୧,୭୦୩ଟି ଗାଁ ଏବଂ ୧୨ଟି ସହରାଞ୍ଚଳ ପ୍ରଭାବିତ ହୋଇଛି। ମୋଟ ୧୩,୪୪,୬୯୮ ଜଣ ଲୋକ ଏହି ବନ୍ୟା ପରିସ୍ଥିତିରେ ପ୍ରଭାବିତ ହୋଇଥିବା ଜଣାପଡ଼ିଛି।

ଗତ କିଛି ଦିନ ଧରି ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ କେନ୍ଦୁଝର ଜିଲ୍ଲାରେ ପରିସ୍ଥିତି ଅପେକ୍ଷାକୃତ ଆହ୍ୱାନପୂର୍ଣ୍ଣ ରହିଥିଲା। ତେବେ ଆଜି ସୁଦ୍ଧା ଅଧିକାଂଶ ପ୍ରମୁଖ ନଦୀର ଜଳସ୍ତର ହ୍ରାସ ପାଇବାରେ ଲାଗିଛି ଏବଂ ବିପଦ ସଙ୍କେତ ତଳେ ରହିଛି।

ସତର୍କତାମୂଳକ ପଦକ୍ଷେପ ଭାବେ ମୋଟ ୪ ଲକ୍ଷ ୮୭ ହଜାର ୩୫୦ ଜଣଙ୍କୁ ସ୍ଥାନାନ୍ତର କରାଯାଇ ୮୮୦ଟି ରିଲିଫ୍ ଶିବିରରେ ରଖାଯାଇଛି। ଏହି ଶିବିରଗୁଡ଼ିକରେ ସୁରକ୍ଷିତ ପାନୀୟ ଜଳ, ପରିମଳ, ଆଲୋକ, ଚିକିତ୍ସା ସେବା ଓ ରନ୍ଧା ଖାଦ୍ୟ ଭଳି ମୌଳିକ ସୁବିଧା ଯୋଗାଇ ଦିଆଯାଉଛି।

ଜଳବନ୍ଦୀ ଗାଁଗୁଡ଼ିକରେ ମଧ୍ୟ ରେସପନ୍ସ ଟିମ୍ ଜରିଆରେ ଲୋକଙ୍କ ଘରେ ରନ୍ଧା ଖାଦ୍ୟ ଓ ସୁରକ୍ଷିତ ପାନୀୟ ଜଳ ପହଞ୍ଚାଯାଉଛି। ଶିଶୁ, ଗର୍ଭବତୀ ମହିଳା, ବୃଦ୍ଧ ଏବଂ ଦିବ୍ୟାଙ୍ଗଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ପ୍ରଭାବିତ ଅଞ୍ଚଳରେ ମାଗଣା ରୋଷେଇ କେନ୍ଦ୍ର ଚାଲୁ ରହିଛି।

ଏପର୍ଯ୍ୟନ୍ତ ୪ ଲକ୍ଷ ୯୫ ହଜାର ୮୩୩ ଜଣଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଇଛି। ଆବଶ୍ୟକତା ଅନୁଯାୟୀ ଶୁଖିଲା ଖାଦ୍ୟ ଓ ଅନ୍ୟାନ୍ୟ ରିଲିଫ୍ ସାମଗ୍ରୀ ମଧ୍ୟ ବଣ୍ଟନ କରାଯାଉଛି। ପ୍ରଭାବିତ ପରିବାରଙ୍କୁ ଏପର୍ଯ୍ୟନ୍ତ ୪,୭୬୫ଟି ପଲିଥିନ ବଣ୍ଟନ କରାଯାଇଛି।

ବନ୍ୟା ପ୍ରଭାବିତ ଅଞ୍ଚଳରେ ସ୍ୱାସ୍ଥ୍ୟସେବାକୁ ମଧ୍ୟ ପ୍ରାଥମିକତା ଦିଆଯାଇଛି। ୯୩ଟି ମେଡିକାଲ ଆସିଷ୍ଟାନ୍ସ ଟିମ ନିୟୋଜିତ ହୋଇଥିବା ବେଳେ ୧୫୯ଟି ମେଡିକାଲ କ୍ୟାମ୍ପ କରାଯାଇଛି। ଏପର୍ଯ୍ୟନ୍ତ ୧୧,୫୪୯ ଜଣଙ୍କୁ ଚିକିତ୍ସା ସହାୟତା ଦିଆଯାଇଛି।

ମାତୃ ସ୍ୱାସ୍ଥ୍ୟ ପ୍ରତି ସ୍ୱତନ୍ତ୍ର ଗୁରୁତ୍ୱ ଦେଇ ୧୫୦ ଜଣ ଗର୍ଭବତୀ ମହିଳାଙ୍କୁ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି। ଏପର୍ଯ୍ୟନ୍ତ ୪୪ଟି ହସ୍ପିଟାଲରେ ପ୍ରସବ ସଫଳ ହୋଇଛି। ଆବଶ୍ୟକ ଔଷଧ, ଆଣ୍ଟି-ସ୍ନେକ୍ ଭେନମ୍, ଓଆର୍ଏସ୍ ଓ ଆଇଭି ଫ୍ଲୁଇଡ୍ର ପର୍ଯ୍ୟାପ୍ତ ମହଜୁଦ ନିଶ୍ଚିତ କରାଯାଇଛି। ଏପର୍ଯ୍ୟନ୍ତ କୌଣସି ରୋଗର ସଂକ୍ରମଣ ବା ମହାମାରୀ ଭଳି ଘଟଣା ସାମ୍ନାକୁ ଆସିନାହିଁ।

ଉଦ୍ଧାର ଓ ଜରୁରୀକାଳୀନ କାର୍ଯ୍ୟକୁ ଅଧିକ ସୁଦୃଢ଼ କରିବା ପାଇଁ ବନ୍ୟା ପ୍ରଭାବିତ ଜିଲ୍ଲାଗୁଡ଼ିକରେ ୧୨୬ଟି ରେସପନ୍ସ ଟିମ୍ ନିୟୋଜିତ ହୋଇଛନ୍ତି। ଏଥିରେ ୩୨ଟି ଓଡ୍ରାଫ୍ ଟିମ୍, ୮ଟି ଏନ୍ଡିଆରଏଫ୍ ଟିମ୍, ୪୬ଟି ଫାୟାର୍ ଆଣ୍ଡ ଇମର୍ଜେନ୍ସି ସର୍ଭିସେସ୍ ଟିମ୍ ଏବଂ ୪୦ଟି ସ୍ଥାନୀୟ ଟିମ୍ ରହିଛି।

ଏହି ଟିମ୍ଗୁଡ଼ିକ ଲଗାତାର ପ୍ରଭାବିତ ଲୋକଙ୍କ ପାଖରେ ପହଞ୍ଚି ଉଦ୍ଧାର ଓ ସହାୟତା କାର୍ଯ୍ୟ କରୁଛନ୍ତି। ଏପର୍ଯ୍ୟନ୍ତ ୩୦,୩୦୩ ଜଣଙ୍କୁ ଉଦ୍ଧାର କରାଯାଇଥିବା ବେଳେ ୫୫,୧୩୯ ଜଣଙ୍କୁ ଡଙ୍ଗା ଯୋଗେ ସ୍ଥାନାନ୍ତର କରାଯାଇଛି।

ଉଦ୍ଧାରକାରୀ ଦଳ ୪୯୨ଟି ବିଚ୍ଛିନ୍ନ ଗାଁରେ ପହଞ୍ଚିଛନ୍ତି। ଏହା ସହ ୧୨୪ଟି ଜରୁରୀକାଳୀନ ମେଡିକାଲ ଇଭାକ୍ୟୁଏସନ କରାଯାଇଛି। ଉଦ୍ଧାର ଓ ରିଲିଫ୍ କାର୍ଯ୍ୟରେ ୨୧୦ଟି ଡଙ୍ଗା ଓ ବିଭିନ୍ନ ବିଶେଷ ଉପକରଣ ନିୟୋଜିତ ହୋଇଛି।

ବନ୍ୟା ପ୍ରଭାବିତ ଅଞ୍ଚଳରେ ପଶୁସମ୍ପଦର ସୁରକ୍ଷା ପାଇଁ ମଧ୍ୟ ପଦକ୍ଷେପ ନିଆଯାଇଛି। ୩୯ଟି ରାପିଡ ରେସପନ୍ସ ଟିମ ନିୟୋଜିତ ହୋଇଥିବା ବେଳେ ୧୭୪ଟି ପଶୁ ଚିକିତ୍ସା ଶିବିର ଆୟୋଜନ କରାଯାଇଛି। ଏପର୍ଯ୍ୟନ୍ତ ୧୫,୯୩୯ଟି ପଶୁଙ୍କୁ ଚିକିତ୍ସା କରାଯାଇଛି।

ପଶୁ ସମ୍ପଦର ଯତ୍ନ ଓ ପ୍ରଭାବିତ ପରିବାରଙ୍କ ଆବଶ୍ୟକତା ପାଇଁ ୧,୪୦୫.୨ ମେଟ୍ରିକ ଟନ ଗୋଖାଦ୍ୟ ଯୋଗାଇ ଦିଆଯାଇଛି।

ବର୍ତ୍ତମାନ ନଦୀଗୁଡ଼ିକର ଜଳସ୍ତର ହ୍ରାସ ପାଉଥିବାରୁ ପରିସ୍ଥିତିରେ କିଛିଟା ସୁଧାର ଆସିଛି। ତଥାପି ପ୍ରଭାବିତ ଅଞ୍ଚଳରେ ସତର୍କତା ଜାରି ରହିଛି। ଜୀବନ ରକ୍ଷା, ପ୍ରଭାବିତ ପରିବାରଙ୍କୁ ସହାୟତା ଓ ସ୍ୱାଭାବିକ ସ୍ଥିତି ଫେରାଇ ଆଣିବା ଉପରେ ରାଜ୍ୟର ସମନ୍ୱିତ ରେସପନ୍ସ ବ୍ୟବସ୍ଥା ଗୁରୁତ୍ୱ ଦେଉଛି।

ଆଗକୁ ପରିସ୍ଥିତି ଅନୁଯାୟୀ ଅତିରିକ୍ତ ରେସପନ୍ସ ଟିମ୍ ଓ ସମ୍ବଳ ମୁତୟନ ପାଇଁ ମଧ୍ୟ ପ୍ରଶାସନ ପ୍ରସ୍ତୁତ ରହିଛି। ରାଜ୍ୟ ଜରୁରୀକାଳୀନ ଅପରେସନ୍ ସେଣ୍ଟର୍ ଜରିଆରେ ସ୍ୱତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟ ବନ୍ୟା ପରିସ୍ଥିତି ଉପରେ ୨୪ ଘଣ୍ଟିଆ ନଜର ରଖିଛି। ଜିଲ୍ଲା ଜରୁରୀକାଳୀନ ଅପରେସନ ସେଣ୍ଟରଗୁଡ଼ିକ ସହ ସମନ୍ୱୟ ରକ୍ଷା କରି ରିଲିଫ ବଣ୍ଟନ, ଉଦ୍ଧାର ଏବଂ ଅତ୍ୟାବଶ୍ୟକ ସେବାର ପୁନରୁଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରାଯାଉଛି।

The post ରାଜ୍ୟରେ ବନ୍ୟା ପରିସ୍ଥିତି : ୭ ଜିଲ୍ଲାର ୧୩ ଲକ୍ଷ ବନ୍ୟା ପରିସ୍ଥିତିରେ ପ୍ରଭାବିତ appeared first on Sanket Tv.

ନୂଆ ନିୟମ ଅନୁଯାୟୀ, ଜେଲ ଡିଆଇଜିଙ୍କଠାରୁ ଆରମ୍ଭ କରି ଆସିଷ୍ଟାଣ୍ଟ ମାଟ୍ରନ ପର୍ଯ୍ୟନ୍ତ ମୋଟ ୩୭୮ ଜଣ ଅଧିକାରୀଙ୍କ ବାର୍ଷିକ ୟୁନିଫର୍ମ ଭତ୍ତା ୩,୦୦୦ ଟଙ୍କାରୁ ବୃଦ୍ଧି ପାଇ ୬,୦୦୦ ଟଙ୍କା କରାଯାଇଛି। ସେହିପରି ୨,୧୨୨ ଜଣ ମୁଖ୍ୟ ୱାର୍ଡର, ୱାର୍ଡର ଏବଂ ମହିଳା ୱାର୍ଡରଙ୍କ ପାଇଁ ଏହି ଭତ୍ତା ୪,୦୦୦ ଟଙ୍କାରୁ ବଢ଼ାଇ ୮,୦୦୦ ଟଙ୍କା କରାଯାଇଛି।

ଏହି ସଂଶୋଧିତ ଭତ୍ତା ଯୋଗୁଁ ମୋଟ ୨,୫୦୦ ଜେଲ ଅଧିକାରୀ ଓ କର୍ମଚାରୀ ଉପକୃତ ହେବେ। ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ଏହି ନୂତନ ୟୁନିଫର୍ମ ଭତ୍ତା ଚଳିତ ଆର୍ଥିକ ବର୍ଷ (୨୦୨୬-୨୭) ଠାରୁ କାର୍ଯ୍ୟକାରୀ ହେବ।

ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ନିଷ୍ପତ୍ତି ଫଳରେ ପ୍ରତିବର୍ଷ ଅତିରିକ୍ତ ୯୬.୨୨ ଲକ୍ଷ ଟଙ୍କା ଖର୍ଚ୍ଚ ହେବ। ଚଳିତ ଆର୍ଥିକ ବର୍ଷଠାରୁ ହିଁ ସମସ୍ତ ଯୋଗ୍ୟ ଜେଲ କର୍ମଚାରୀ ଏବଂ ଅଧିକାରୀମାନେ ଏହି ବର୍ଦ୍ଧିତ ପୋଷାକ ଭତ୍ତା ପାଇପାରିବେ ବୋଲି ଜଣାପଡ଼ିଛି।

The post ଜେଲ କର୍ମଚାରୀଙ୍କ ୟୁନିଫର୍ମ ଭତ୍ତା ଦୁଇଗୁଣ ବୃଦ୍ଧି କଲେ ରାଜ୍ୟ ସରକାର appeared first on Sanket Tv.

ରାଖୀ ପୂର୍ଣ୍ଣିମା ଅବସରରେ ଏହି ସମସ୍ତ ହିତାଧିକାରୀମାନଙ୍କୁ ୫ମ କିସ୍ତି ବାବଦରେ ୫,୧୬୦ କୋଟି (ପାଞ୍ଚ ହଜାର ଏକଶହ ଷାଠିଏ କୋଟି) ଟଙ୍କାରୁ ଅଧିକ ଅର୍ଥ ସିଧାସଳଖ ସେମାନଙ୍କ ବ୍ୟାଙ୍କ ଖାତାକୁ ଡିବିଟି (DBT) ମାଧ୍ୟମରେ ପ୍ରଦାନ କରାଯିବ।

ଏହି ପରିପ୍ରେକ୍ଷୀରେ ଆଜି (ଶୁକ୍ରବାର) ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତିମୂଳକ ସମୀକ୍ଷା ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ମହିଳା ଓ ଶିଶୁ ବିକାଶ ବିଭାଗ, ଓକାକ୍ (OCAC) ଟିମ୍ ଏବଂ ବ୍ୟାଙ୍କ ପ୍ରତିନିଧିମାନେ ଯୋଗଦେଇଥିଲେ।

ବୈଠକରେ ୫ମ କିସ୍ତିର ଡିବିଟି ପ୍ରଦାନ, ହିତାଧିକାରୀଙ୍କ ତାଲିକା, ବ୍ୟାଙ୍କିଙ୍ଗ୍ ବ୍ୟବସ୍ଥା ଏବଂ ଅନ୍ୟାନ୍ୟ ପ୍ରସ୍ତୁତି ସମ୍ପର୍କରେ ଉପମୁଖ୍ୟମନ୍ତ୍ରୀ ସବିଶେଷ ସମୀକ୍ଷା କରିଥିଲେ। ସେ ୫ମ କିସ୍ତିର ସୁଚାରୁ ବଣ୍ଟନ ପାଇଁ ସମସ୍ତ ପ୍ରସ୍ତୁତିର ସମୀକ୍ଷା କରିବା ସହ ନିର୍ଦ୍ଧାରିତ ସମୟସୀମା ମଧ୍ୟରେ ଡିବିଟି ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ଦେଇଥିଲେ।

ସେହିପରି ବ୍ୟାଙ୍କିଙ୍ଗ୍ ବ୍ୟବସ୍ଥାକୁ ସୁଦୃଢ଼ ରଖିବା ଏବଂ ହିତାଧିକାରୀମାନେ ଯେପରି କୌଣସି ଅସୁବିଧାର ସମ୍ମୁଖୀନ ନହୁଅନ୍ତି, ସେଥିପାଇଁ ଆବଶ୍ୟକ ପଦକ୍ଷେପ ନେବାକୁ ସମ୍ପୃକ୍ତ ଅଧିକାରୀ ଓ ବ୍ୟାଙ୍କ ପ୍ରତିନିଧିମାନଙ୍କୁ ଉପମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

The post ରାକ୍ଷୀ ପୂର୍ଣ୍ଣିମା ଦିନ ମିଳିବ ସୁଭଦ୍ରା ଯୋଜନାର ୫ମ କିସ୍ତି appeared first on Sanket Tv.

ପ୍ରଥମେ, ୨୦୦୩ ବ୍ୟାଚର ବରିଷ୍ଠ ଅଧିକାରୀ ହିମାଂଶୁ କୁମାର ଲାଲଙ୍କୁ ଅର୍ଥନୈତିକ ଅପରାଧ ଶାଖା (EOW) ଏବଂ ସ୍ୱତନ୍ତ୍ର ଟାସ୍କଫୋର୍ସ (STF)ର ଆଇଜି ଭାବେ ନିଯୁକ୍ତି ଦିଆଯାଇଛି। ବର୍ତ୍ତମାନ ସେ ସମ୍ବଲପୁର ଜୋନରେ ଆଇଜି ଭାବେ କାର୍ଯ୍ୟରତ ଥିଲେ। ସେହିପରି ୨୦୦୪ ବ୍ୟାଚର ସତ୍ୟବ୍ରତ ଭୋଇ, ଯିଏକି ପୂର୍ବ ବିଜେଡି ସରକାରଙ୍କ ଅତି ବିଶ୍ୱସ୍ତ ଅଧିକାରୀଙ୍କ ମଧ୍ୟରେ ଗଣ୍ୟ ଥିଲେ, ତାଙ୍କୁ ଗୁଇନ୍ଦା ବିଭାଗ (Detective IG)ର ଦାୟିତ୍ୱ ଦିଆଯାଇଛି। ସେ ଏପର୍ଯ୍ୟନ୍ତ NCR ଆଇଜି ଓ ଅନୁଗୁଳ PTCର ପ୍ରିନ୍ସପାଲ ଭାବେ ଅତିରିକ୍ତ ଦାୟିତ୍ୱ ତୁଲାଉଥିଲେ।

୨୦୦୫ ବ୍ୟାଚର ଜୟ ନାରାୟଣ ପଙ୍କଜଙ୍କୁ ଦକ୍ଷିଣ ଓଡ଼ିଶା ଆଇଜି ଭାବେ ବ୍ରହ୍ମପୁରକୁ ବଦଳି କରାଯାଇଛି। ପୂର୍ବରୁ ସେ ଗୁଇନ୍ଦା ଆଇଜି ଭାବେ କାର୍ଯ୍ୟ କରୁଥିଲେ। ଏହି ବଦଳି ଫଳରେ ବ୍ରହ୍ମପୁରରେ ନିତି ଶେଖର (୨୦୦୭ ବ୍ୟାଚ୍)ଙ୍କ ସ୍ଥାନରେ ତାଙ୍କୁ ନୂଆ ଦାୟିତ୍ୱ ମିଳିଛି। ନିତି ଶେଖରଙ୍କୁ ପୋଲିସ ମୁଖ୍ୟାଳୟରେ ଆଇଜି (ପ୍ରୋଭିଜନିଂ) ଭାବେ ନିଯୁକ୍ତି ଦିଆଯାଇଛି, ଯେଉଁଠାରେ ସେ ଏସପି ମୁଖ୍ୟାଳୟର କାର୍ଯ୍ୟ ତୁଲାଇବେ।

ସେହିପରି ୨୦୦୯ ବ୍ୟାଚର ଚରଣ ସିଂହ ମୀନା ସମ୍ବଲପୁରରେ ଡିଆଇଜି ଭାବେ ନୂଆ ଦାୟିତ୍ୱ ଗ୍ରହଣ କରିବେ। ବର୍ତ୍ତମାନ ସେ ଡିଆଇଜି (ପ୍ରୋଭିଜନିଂ) ଭାବେ କାର୍ଯ୍ୟରତ ଅଛନ୍ତି। ଏହାସହ ୨୦୧୦ ବ୍ୟାଚର ଚର୍ଚ୍ଚିତ ଅଧିକାରୀ ଆଶିଷ କୁମାର ସିଂହ, ଯିଏକି କେନ୍ଦ୍ରୀୟ ଡେପୁଟେସନରୁ ଫେରିବା ପରେ ଗୃହ ବିଭାଗରେ ଯୋଗ ଦେଇଥିଲେ, ତାଙ୍କୁ ଡିଆଇଜି (NCR, ତାଳଚେର) ଏବଂ ଅନୁଗୁଳ ପୋଲିସ ଟ୍ରେନିଂ କଲେଜର ପ୍ରିନ୍ସପାଲ ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି। ଗୃହ ବିଭାଗର ଅତିରିକ୍ତ ସଚିବ ତ୍ରିଲୋଚନ ମାଝୀ ଏହି ବିଜ୍ଞପ୍ତି ଜାରି କରିଛନ୍ତି। ରାଜ୍ୟ ସରକାରଙ୍କ ଏହି ପଦକ୍ଷେପ ପ୍ରଶାସନିକ ଦକ୍ଷତା ବୃଦ୍ଧି ଓ ଆଇନ ଶୃଙ୍ଖଳା ପରିସ୍ଥିତିକୁ ସୁଦୃଢ଼ କରିବା ଲକ୍ଷ୍ୟରେ ନିଆଯାଇଥିବା ଜଣାପଡ଼ିଛି।

The post ୬ ଜଣ ବରିଷ୍ଠ ଆଇପିଏସ ଅଧିକାରୀଙ୍କ ବଦଳି appeared first on Sanket Tv.

ଓଡ଼ିଆ ସଙ୍ଗୀତ ଜଗତରେ ପ୍ରଣବ ପଟ୍ଟନାୟକଙ୍କର ଥିଲା ଏକ ସ୍ୱତନ୍ତ୍ର ପରିଚୟ । ନିଜର ମଧୁର କଣ୍ଠ, ଅନନ୍ୟ ଗାୟନ ଶୈଳୀ ଓ ଭାବପୂର୍ଣ୍ଣ ଉପସ୍ଥାପନା ଯୋଗୁଁ ସେ ଶ୍ରୋତାଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ତିଆରି କରିପାରିଥିଲେ । ତାଙ୍କ ଗୀତ ଗୁଡ଼ିକ କେବଳ ମନୋରଞ୍ଜନ ନୁହେଁ, ବରଂ ଓଡ଼ିଆ ସଂସ୍କୃତି ଓ ଭାବନାର ଅଭିନ୍ନ ଅଙ୍ଗ ହୋଇ ରହିଛି ।

୧୯୫୮ ମସିହାରେ ‘ମା’ ଚଳଚ୍ଚିତ୍ର ଜରିଆରେ ନିଜର ସଙ୍ଗୀତ ସଫର ଆରମ୍ଭ କରିଥିବା ପ୍ରଣବ ପଟ୍ଟନାୟକ ଦୀର୍ଘ ଛଅ ଦଶନ୍ଧିରୁ ଅଧିକ ସମୟ ଧରି ଓଡ଼ିଆ ସଙ୍ଗୀତ ଜଗତକୁ ନିଜ ମଧୁର ସ୍ୱରରେ ସମୃଦ୍ଧ କରିଥିଲେ । ସେ କେବଳ ଚଳଚ୍ଚିତ୍ର ଗୀତ ନୁହେଁ, ବରଂ ଓଡ଼ିଶୀ, ଭଜନ, ସେମି-କ୍ଲାସିକାଲ୍, ଆଧୁନିକ, ପଲ୍ଲୀଗୀତ ଏବଂ ଗଜଲ୍ ଗାଇ ଲକ୍ଷ ଲକ୍ଷ ଶ୍ରୋତାଙ୍କ ମନ ମୋହିଥିଲେ । ତାଙ୍କ ଗାଇଥିବା “ମନ ମାନେନା”, “ସୀତା ରାମ ନାମ”, “ଆଉ ଛୁଆଁନା ଛୁଆଁନା” ଏବଂ “ତୁମେ ଜାଣନା କି ମୁଁ ଜାଣନା” ଭଳି କାଳଜୟୀ ଗୀତଗୁଡ଼ିକ ଆଜି ମଧ୍ୟ ଲୋକଙ୍କ ଓଠରେ ରହିଛି ।

ଓଡ଼ିଆ ସଙ୍ଗୀତ କ୍ଷେତ୍ରରେ ତାଙ୍କର ଅତୁଳନୀୟ ଯୋଗଦାନ ପାଇଁ ତାଙ୍କୁ ୨୦୧୬ ମସିହାରେ ରାଜ୍ୟର ସର୍ବୋଚ୍ଚ ଚଳଚ୍ଚିତ୍ର ସମ୍ମାନ ‘ଜୟଦେବ ପୁରସ୍କାର’ରେ ସମ୍ମାନିତ କରାଯାଇଥିଲା । ଏହା ବ୍ୟତୀତ ବହୁ ରାଷ୍ଟ୍ରୀୟ ଓ ରାଜ୍ୟ ସ୍ତରୀୟ ସମ୍ମାନରେ ମଣ୍ଡିତ ହୋଇଥିଲେ । ତାଙ୍କ ବିୟୋଗରେ ଓଡ଼ିଶାର କଳା ଓ ସଂସ୍କୃତି ଜଗତରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି ହୋଇଛି । ଏହି ଦୁଃଖଦ ଘଡ଼ିଏ ରାଜ୍ୟବାସୀଙ୍କ ସହ ତାଙ୍କ ପରିବାର ବର୍ଗଙ୍କୁ ଗଭୀର ସମବେଦନା ଜଣାଉଛୁ ।

The post ବିଶିଷ୍ଟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକଙ୍କ ପରଲୋକ appeared first on Sanket Tv.

ମନ୍ତ୍ରୀ ଶ୍ରୀ ମହାପାତ୍ର ଆହୁରି କହିଛନ୍ତି ଯେ, ବୁଧବାର ଅଟୋ ଡ୍ରାଇଭରମାନେ ଯେଉଁ କାଣ୍ଡ ଘଟାଇଲେ, ତାହା ଅମାନବୀୟ ଘଟଣା। ସେମାନେ ଆଇନକୁ ହାତକୁ ନେଇ ସାଧାରଣ ଲୋକଙ୍କ ଉପରେ ଆକ୍ରମଣ କରିଛନ୍ତି ଏବଂ ସରକାରୀ ଗାଡ଼ି ଭାଙ୍ଗିଛନ୍ତି। ଏଭଳି ଅରାଜକତାକୁ ପ୍ରଶ୍ରୟ ଦିଆଯିବ ନାହିଁ ବୋଲି ମନ୍ତ୍ରୀ କହିଛନ୍ତି।

ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମନ୍ତ୍ରୀ କହିଛନ୍ତି। ହିଂସାରେ ସାମିଲ ଥିବା ଅଟୋ ଚାଳକମାନଙ୍କ ଲାଇସେନ୍ସ ରଦ୍ଦ କରାଯିବ ଏବଂ ସେମାନଙ୍କୁ କ୍ଷମା କରାଯିବ ନାହିଁ। ଯେଉଁ କ୍ଷତି ହୋଇଛି, ତାହା ସେମାନଙ୍କ ଠାରୁ ହିଁ ଆଦାୟ କରାଯିବ।

ସରକାର ସାଧାରଣ ଲୋକଙ୍କ ସୁରକ୍ଷା ଦେବା ନିଜର ଦାୟିତ୍ବ ବୋଲି ମନ୍ତ୍ରୀ ଗୁରୁତ୍ୱାରୋପ କରିଛନ୍ତି। ଅବୈଧ ଅଟୋ ଷ୍ଟାଣ୍ଡ ଭଙ୍ଗିବା ସମ୍ପର୍କରେ ସରକାର ବିଚାର କରୁଛନ୍ତି ଏବଂ ଏନେଇ ଶୀଘ୍ର ନିଷ୍ପତ୍ତି ନିଆଯିବ।

ମାଷ୍ଟରକ୍ୟାଣ୍ଟିନ ହିଂସା ଘଟଣାରେ ପୋଲିସ ୧୧୩ ଜଣଙ୍କୁ ଗିରଫ କରି କୋର୍ଟରେ ହାଜର କରାଇଛି। ୩୫୪ଟି ଗାଡ଼ି ଜବତ କରାଯାଇଥିବା ବେଳେ ଆଉ ୬୦ ଜଣଙ୍କୁ ଭଲ ବ୍ୟବହାର ପାଇଁ ବଣ୍ଡରେ ଛାଡ଼ି ଦିଆଯାଇଛି।

ଖାରବେଳନଗର ଥାନାରେ ଏହି ଘଟଣାରେ ୭ଟି ଏଫଆଇଆର୍ ରୁଜୁ ହୋଇଛି। ସାଧାରଣ ଲୋକଙ୍କ ଅଭିଯୋଗରେ ୨ଟି, ଆମ ବସ୍ କର୍ମଚାରୀଙ୍କ ଅଭିଯୋଗରେ ୪ଟି ଏବଂ ପୋଲିସ କର୍ମଚାରୀଙ୍କ ଅଭିଯୋଗରେ ଗୋଟିଏ ଏଫଆଇଆର୍ ରୁଜୁ ହୋଇଛି।

ଆନ୍ଦୋଳନ ବେଳେ ଆଇନଶୃଙ୍ଖଳା ପରିସ୍ଥିତି ବିଗିଡ଼ିବା ଓ ପୋଲିସ ଉପରେ ଆକ୍ରମଣ ଘଟଣା ପରେ କମିଶନରେଟ୍ ପୋଲିସ ଆକ୍ସନ୍ ମୋଡ୍ ରେ ରହିଛି। ଆଇନକୁ ହାତକୁ ନେଇ ହିଂସା ସୃଷ୍ଟି କରୁଥିବା ଯେକୌଣସି ବ୍ୟକ୍ତିଙ୍କ ବିରୋଧରେ ଆଇନ ଅନୁସାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ପକ୍ଷରୁ ସ୍ପଷ୍ଟ କରାଯାଇଛି।

The post ଭୁବନେଶ୍ୱର ଅଟୋ ଆନ୍ଦୋଳନ: କ୍ଷତି ଭରଣା କରିବେ ଚାଳକ, ଭଙ୍ଗାଯିବ ଅବୈଧ ଷ୍ଟାଣ୍ଡ appeared first on Sanket Tv.

ମନ୍ତ୍ରୀ ଶ୍ରୀ ନାୟକ କହିଛନ୍ତି ଯେ, ‘ଗ୍ରାମ ସମ୍ପଦ’ କାର୍ଯ୍ୟକ୍ରମ ମାଧ୍ୟମରେ ଗାଁଗୁଡ଼ିକର ସର୍ବାଙ୍ଗୀନ ବିକାଶ କରାଯିବ। ଏନେଇ ଏକ SOP (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡିୟର) ପ୍ରସ୍ତୁତ କରାଯାଇଛି। ଗ୍ରାମସଭାର ସିଦ୍ଧାନ୍ତ ଆଧାରରେ ଏହି ସବୁ କାମ କରାଯିବ। ପଞ୍ଚାୟତଗୁଡ଼ିକରେ ଆଦର୍ଶ ଖେଳ ପଡ଼ିଆ, କଲ୍ୟାଣ ମଣ୍ଡପ, ଗ୍ରାମୀଣ ହାଟ, ପୋଖରୀ, ପାର୍କ, ପାଠାଗାର ଓ ସ୍ମଶାନ ଭଳି ଉନ୍ନତ ଢାଞ୍ଚା ନିର୍ମାଣ କରାଯିବ।

ଆଦର୍ଶ ଖେଳ ପଡ଼ିଆ ପାଇଁ ସରକାର ୭୫ ଲକ୍ଷ ଟଙ୍କା ବ୍ୟୟ କରିବେ। ଏଥିରେ ଯୁବକମାନଙ୍କ ପାଇଁ ଜିମ୍ ସାମଗ୍ରୀ ମଧ୍ୟ ଅନ୍ତର୍ଭୁକ୍ତ ରହିବ। ସେହିପରି ଆଦର୍ଶ କଲ୍ୟାଣ ମଣ୍ଡପ ନିର୍ମାଣ ପାଇଁ ୪୯ ଲକ୍ଷ ଟଙ୍କା ଦିଆଯିବ। ଏହି ମଣ୍ଡପ ୭୦x୩୨ ଫୁଟ ଆକାରର ହେବ ଏବଂ ଏଥିରେ ଦୁଇଟି ଗ୍ରୀନ୍ ରୁମ୍ ସହ ଏକ ପେଣ୍ଡାଲ୍ ରହିବ, ଯେଉଁଠାରେ ନୃତ୍ୟ, ଗୀତ ଓ ନାଟକ ପରିବେଷଣ କରାଯାଇପାରିବ। ଭୋଜିଭାତ ସହ ପଞ୍ଚାୟତ ପକ୍ଷରୁ ପାନୀୟ ଜଳ ଯୋଗାଇ ଦିଆଯିବ।

ଆଦର୍ଶ ପୋଖରୀ ପାଇଁ ୩୪ ଲକ୍ଷ ଟଙ୍କା ବ୍ୟୟ କରାଯିବ। ଏହାର ଚାରିପଟେ ପଥର ବନ୍ଧା ଓ ଫେବର ବ୍ଲକ୍ ଲଗାଯିବ। ସ୍ମଶାନ ଉନ୍ନୟନ ପାଇଁ ୨୨ ଲକ୍ଷ ଟଙ୍କା ଦିଆଯିବ, ଯେଉଁଠାରେ ପାଚେରୀ ଓ ଅନ୍ୟାନ୍ୟ ସୁବିଧା ରହିବ। ଗ୍ରାମୀଣ ପାର୍କ ପାଇଁ ୨୦ ଲକ୍ଷ ଟଙ୍କା ବ୍ୟବହାର କରାଯିବ, ଯେଉଁଥିରେ ଜିମ୍ ଓ ବସିବା ପାଇଁ ଆସବାବପତ୍ର ରହିବ।

The post ପଞ୍ଚାୟତ ନିର୍ବାଚନ ପୂର୍ବରୁ ବଡ଼ ଘୋଷଣା: ପ୍ରତ୍ୟେକ ପଞ୍ଚାୟତରେ ଖର୍ଚ୍ଚ ହେବ ୩ କୋଟି ଟଙ୍କା appeared first on Sanket Tv.

ଭାରତରେ ୧୯୫୨ ମସିହାରେ ଲୁପ୍ତ ହୋଇଯାଇଥିବା ଚିତାକୁ ୨୦୨୨ ମସିହାରେ ‘ପ୍ରୋଜେକ୍ଟ ଚିତା’ ମାଧ୍ୟମରେ ଦକ୍ଷିଣ ଆଫ୍ରିକାର ନାମିବିଆରୁ ଭାରତ ଅଣାଯାଇଥିଲା। ବର୍ତ୍ତମାନ ପ୍ରଥମ ଥର ପାଇଁ ନନ୍ଦନକାନନକୁ ଚିତା ଆସିବାକୁ ଯାଉଛି। ଯାହାକୁ ନେଇ ପର୍ଯ୍ୟଟକଙ୍କ ମହଲରେ ଖୁସିର ଲହରୀ ଖେଳି ଯାଇଛି। ୨ହଳ (୨) ଚିତା ନନ୍ଦନକାନନ ଆସିବେ, ଏଥିପାଇଁ ଖୁଆଡ଼ କାର୍ଯ୍ୟ ଶେଷ ପର୍ଯ୍ୟାୟରେ ପହଁଚିଛି।

ଏହା ସହିତ ଆଫ୍ରିକାର ପ୍ରସିଦ୍ଧ ‘ବ୍ଲୁ ୱାଇଲ୍ଡବିଷ୍ଟ୍’ ମଧ୍ୟ ନନ୍ଦନକାନନ ଆସିବାକୁ ଯାଉଛି। ୨ହଳ (୨) ୱାଇଲ୍ଡବିଷ୍ଟ୍ ନନ୍ଦନକାନନ ଆସିବାର ଯୋଜନା ରହିଛି। ସେହିପରି ୨ହଳ (୨) ଆଫ୍ରିକୀୟ ଜେବ୍ରା ମଧ୍ୟ ଆସିବାକୁ ଯାଉଛି। ଏହି ନୂତନ ପ୍ରଜାତିର ଆଗମନ ଓଡ଼ିଶାକୁ ଆଫ୍ରିକୀୟ ବନ୍ୟଜନ୍ତୁଙ୍କ ଏକ ନିଆରା ଅନୁଭୂତି ଆଣିଦେବ।

ଖୁବ ଶୀଘ୍ର ନନ୍ଦନକାନନକୁ ଆସିବ ବିରଳ ଓ ଅତି ସୁନ୍ଦର ‘ଲାଲ୍ ପାଣ୍ଡା’। ଏହା ନନ୍ଦନକାନନ ପାଇଁ ଏକ ନୂଆ ପ୍ରଜାତି। ଏହାକୁ ଆଣିବା ପାଇଁ କର୍ତ୍ତୃପକ୍ଷ ଏବେଠୁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିସାରିଛନ୍ତି। ପୂର୍ବ ହିମାଳୟର ଘଞ୍ଚ ଜଙ୍ଗଲର ସବୁଠୁ ଆକର୍ଷଣୀୟ ସ୍ତନ୍ୟପାୟୀ ପ୍ରାଣୀ ହେଉଛି ଲାଲ୍ ପାଣ୍ଡା। ଏହି ବିରଳ ପ୍ରାଣୀକୁ ଦେଖିବା ପାଇଁ ଲୋକେ ସିକିମ, ଦାର୍ଜିଲିଂ ଯିବାକୁ ପଡୁଥିଲା, ହେଲେ ଏଣିକି ଆଉ ଦୂରକୁ ଯିବାକୁ ପଡିବନି; ନନ୍ଦନକାନନରେ ହିଁ ଦେଖିବାକୁ ମିଳିବ। ଏଥିପାଇଁ ନନ୍ଦନକାନନ କର୍ତ୍ତୃପକ୍ଷ ନୂଆଦିଲ୍ଲୀ ସ୍ଥିତ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷ (ସିଜେଡଏ)ଙ୍କୁ ଏକ ପ୍ରସ୍ତାବ ଦେଇଛନ୍ତି। ସିଜେଡଏ ଅନୁମୋଦନ ମିଳିଲେ ନନ୍ଦନକାନନ ଆସିବେ ଏହି ଲାଲ୍ ପାଣ୍ଡା।

The post ନନ୍ଦନକାନନକୁ ଅଷ୍ଟ୍ରେଲିଆ ଆସୁଛନ୍ତି ରେଡ୍ କଙ୍ଗାରୁ appeared first on Sanket Tv.

ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ନେତୃତ୍ୱାଧୀନ ଝାଡ଼ଖଣ୍ଡ ସରକାର ଗତ ଅଗଷ୍ଟ ୧୮ ତାରିଖରେ ଏକ ଅଧିସୂଚନା ଜାରି କରି JPSC ଏବଂ ଏକ ବାହ୍ୟ ଏଜେନ୍ସି ଦ୍ୱାରା ଆୟୋଜିତ ୨୨ଟି ନିଯୁକ୍ତି ପରୀକ୍ଷାକୁ ବାତିଲ୍ କରିଥିଲେ। ସେହିପରି ଆଉ ୨୩ଟି ପରୀକ୍ଷାରେ କୌଣସି ଅନିୟମିତତା ହୋଇଛି କି ନାହିଁ, ତାହାର ଯାଞ୍ଚ ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଥିଲା।

ହାଇକୋର୍ଟରେ ଯାଚିକା ଦାଖଲ କରି ଅଭ୍ୟର୍ଥୀମାନେ ଯୁକ୍ତି କରିଛନ୍ତି ଯେ, ସରକାର ସେମାନଙ୍କ ପକ୍ଷ ଶୁଣିବା ପୂର୍ବରୁ ଏକତରଫା ଭାବେ ପରୀକ୍ଷା ଓ ନିଯୁକ୍ତିକୁ ବାତିଲ୍ କରିଛନ୍ତି। ଏଥିରେ ଅନେକ ଅଭ୍ୟର୍ଥୀ ଚୟନ ପରେ ସରକାରୀ ଚାକିରିରେ ଯୋଗ ଦେଇସାରିଛନ୍ତି ବୋଲି ସେମାନେ ଉଲ୍ଲେଖ କରିଛନ୍ତି।

ଅଭ୍ୟର୍ଥୀମାନଙ୍କ ଅନୁସାରେ, ଯଦି ଯାଞ୍ଚ ସମୟରେ କୌଣସି ଅଭ୍ୟର୍ଥୀଙ୍କ ଭୂମିକା ସନ୍ଦେହଜନକ ବୋଲି ପ୍ରମାଣିତ ହୁଏ, ତେବେ ତାଙ୍କ ବିରୋଧରେ ନିୟମ ଅନୁସାରେ କାର୍ଯ୍ୟାନୁଷ୍ଠାନ ନିଆଯାଉ। କିନ୍ତୁ ଯାଞ୍ଚ କିମ୍ବା ଶୁଣାଣି ନକରି ସମସ୍ତ ସଫଳ ଅଭ୍ୟର୍ଥୀଙ୍କ ନିଯୁକ୍ତି ବାତିଲ୍ କରିବା ଠିକ୍ ନୁହେଁ ବୋଲି ସେମାନେ ଦାବି କରିଛନ୍ତି।

ସମସ୍ତ ଅଭ୍ୟର୍ଥୀ ନିର୍ଦ୍ଧାରିତ ପ୍ରକ୍ରିୟାରେ ପରୀକ୍ଷା ଦେଇ, ମେରିଟ୍ ତାଲିକାରେ ସ୍ଥାନ ପାଇ ଏବଂ ନିୟମ ଅନୁଯାୟୀ ନିଯୁକ୍ତି ପାଇଥିଲେ। ତେଣୁ କିଛି ଅନିୟମିତତା ପାଇଁ ସମସ୍ତଙ୍କୁ ଦାୟୀ କରିବା ଉଚିତ୍ ନୁହେଁ ବୋଲି ଯାଚିକାକାରୀମାନେ କୋର୍ଟରେ ଯୁକ୍ତି ଦେଇଛନ୍ତି। ଶୁଣାଣି ପରେ କୋର୍ଟ ସରକାରଙ୍କ ନିଷ୍ପତ୍ତି ଉପରେ ରୋକ୍ ଲଗାଇ ଯାଚିକାକାରୀମାନଙ୍କୁ ଆଶ୍ୱସ୍ତି ଦେଇଛନ୍ତି।

The post ଜେପିଏସସି ପରୀକ୍ଷା ଓ ନିଯୁକ୍ତି ବାତିଲ୍ ଉପରେ ରୋକ୍ ଲଗାଇଲେ ଝାଡ଼ଖଣ୍ଡ ହାଇକୋର୍ଟ appeared first on Sanket Tv.

ସାଧାରଣ ଚିକିତ୍ସା ପଦ୍ଧତିରେ ସମସ୍ତଙ୍କୁ ଗୋଟିଏ ପ୍ରକାର ଔଷଧ ଦିଆଯାଉଥିବା ବେଳେ, ଏହି ନୂଆ ଟିକା ରୋଗୀର ଶରୀର ହିସାବରେ ସ୍ୱତନ୍ତ୍ର ଭାବରେ ପ୍ରସ୍ତୁତ କରାଯାଏ। ଏହା ରୋଗୀର ରୋଗ ପ୍ରତିରୋଧକ ଶକ୍ତିକୁ ଚିହ୍ନଟ କରି ତା’ର ଆଧାରରେ ଔଷଧ ତିଆରି କରାଯାଏ, ଯାହା ଚିକିତ୍ସା କ୍ଷେତ୍ରରେ ଏକ ଯୁଗାନ୍ତକାରୀ ପରିବର୍ତ୍ତନ।

ଏହି ବଡ଼ ବିଶ୍ୱସ୍ତରୀୟ ପରୀକ୍ଷାରେ ୧,୧୩୭ ଜଣ ଉଚ୍ଚ-ଆଶଙ୍କା ଥିବା ରୋଗୀ ସାମିଲ ହୋଇଥିଲେ, ଯେଉଁମାନଙ୍କର ସାଙ୍ଘାତିକ ଚର୍ମ କ୍ୟାନସର (ମେଲାନୋମା) ଅପରେସନ ଦ୍ୱାରା ବାହାର କରାଯାଇଥିଲା। ରୋଗୀଙ୍କୁ ଦୁଇଟି ଗ୍ରୁପରେ ବିଭକ୍ତ କରାଯାଇଥିଲା। ପ୍ରଥମ ଗ୍ରୁପ୍କୁ କେବଳ ସାଧାରଣ ଇମ୍ୟୁନୋଥେରାପି ଔଷଧ ‘କିଟ୍ରୁଡା’ ଦିଆଯାଇଥିବା ବେଳେ, ଦ୍ଵିତୀୟ ଗ୍ରୁପ୍କୁ କିଟ୍ରୁଡା ସହିତ ମଡର୍ଣ୍ଣାର ଏହି ସ୍ୱତନ୍ତ୍ର କ୍ୟାନସର ଟିକାର ୯ଟି ଡୋଜ୍ ପର୍ଯ୍ୟନ୍ତ ଦିଆଯାଇଥିଲା।

ଏହି ଦୁଇଟି ଔଷଧର ମିଶ୍ରଣ ଯୋଗୁଁ ରୋଗୀଙ୍କ ଶରୀରରେ କ୍ୟାନସର ଫେରିବାର ସମୟ ସୀମା ଯଥେଷ୍ଟ ବୃଦ୍ଧି ପାଇଥିଲା। ଅର୍ଥାତ୍, କ୍ୟାନସର ପୁନର୍ବାର ଫେରିବାର ପ୍ରକ୍ରିୟା ବହୁତ କମିଯାଇଥିଲା କିମ୍ବା ପ୍ରାୟ ବନ୍ଦ ହୋଇଯାଇଥିଲା। ଏହି ଟିକା ଶରୀରର ଅନ୍ୟ ଅଙ୍ଗକୁ କ୍ୟାନସର ବ୍ୟାପିବାକୁ ମଧ୍ୟ ରୋକିବାରେ ସଫଳ ହୋଇଥିଲା।

ଏହା ଏକ ଚିକିତ୍ସା ଟିକା, ଯାହା ରୋଗ ଭଲ କରିବା ପାଇଁ ବ୍ୟବହୃତ ହୁଏ, କିନ୍ତୁ ଏହା କ୍ୟାନସର ନ ହେବା ପାଇଁ ଦିଆଯାଉଥିବା ପ୍ରତିଷେଧକ ଟିକା ନୁହେଁ। ଏହା ଶରୀରର ରୋଗ ପ୍ରତିରୋଧକ ଶକ୍ତି ପାଇଁ ଏକ ସ୍ୱତନ୍ତ୍ର “ୱାଣ୍ଟେଡ୍ ପୋଷ୍ଟର” ଭଳି କାମ କରେ। ଟିକା ଦେବା ପରେ, ଏହା ରୋଗୀର ରୋଗ ପ୍ରତିରୋଧକ କୋଷଗୁଡ଼ିକୁ ଶରୀରରେ ଲୁଚି ରହିଥିବା ଅତି ସୂକ୍ଷ୍ମ କ୍ୟାନସର କୋଷଗୁଡ଼ିକୁ ଖୋଜି ବାହାର କରି ସେଗୁଡ଼ିକୁ ନଷ୍ଟ କରିଥାଏ।

ଚିକିତ୍ସା ବିଜ୍ଞାନୀମାନେ ଏହାକୁ କ୍ୟାନସର ଚିକିତ୍ସାରେ ନୂଆ ଯୁଗ ବୋଲି କହୁଛନ୍ତି। ଏହି ବଡ଼ ବୈଜ୍ଞାନିକ ସଫଳତା ପରେ ମଡେର୍ଣ୍ଣା କମ୍ପାନୀର ସେୟାର ମୂଲ୍ୟ ଗୋଟିଏ ଦିନରେ ୯୦% ରୁ ଅଧିକ ବୃଦ୍ଧି ପାଇଛି। ଚର୍ମ କ୍ୟାନସରରେ ଏହା ଭଲ କାମ କରିଥିବାରୁ, ମଡେର୍ଣ୍ଣା ଏବଂ ମର୍କ କମ୍ପାନୀ ଏବେ ଫୁସଫୁସ କ୍ୟାନସର, ବ୍ଲାଡର କ୍ୟାନସର ଏବଂ କିଡନୀ କ୍ୟାନସର ପାଇଁ ମଧ୍ୟ ଏହାର ପରୀକ୍ଷା ଆରମ୍ଭ କରିଦେଇଛନ୍ତି।

The post ୧୧୩୭ ରୋଗୀଙ୍କ ପରୀକ୍ଷାରେ ସଫଳ ହେଲା ମଡେର୍ଣ୍ଣା କ୍ୟାନସର ଟିକା appeared first on Sanket Tv.