ଟ୍ରମ୍ପଙ୍କ ନୂତନ ଟାରିଫ ନୀତି: କାନାଡାକୁ ୩୫% ଟାରିଫ

ନୂଆଦିଲ୍ଲୀ (ସଂକେତ ଟିଭି): ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାନାଡା ଉପରେ ନୂତନ ଟାରିଫ ଲଗାଇବାକୁ ଘୋଷଣା କରିଛନ୍ତି। ଗୁରୁବାର ଦିନ ସେ କାନାଡାର ପ୍ରଧାନମନ୍ତ୍ରୀ ମାର୍କ କାର୍ନେଙ୍କୁ ଏକ ଚିଠି ଲେଖି ଜଣାଇଛନ୍ତି ଯେ, ଅଗଷ୍ଟ ୧ ତାରିଖରୁ କାନାଡାରୁ ଆମଦାନୀ ହେଉଥିବା ସାମଗ୍ରୀ ଉପରେ ୩୫% ଶୁଲ୍କ ଲଗାଯିବ। ଟ୍ରମ୍ପ ସ୍ପଷ୍ଟ କରିଛନ୍ତି ଯେ, ଯଦି କାନାଡା ପ୍ରତିଶୋଧ ନିଏ, ତେବେ ଏହି ଶୁଲ୍କ ଆହୁରି ବୃଦ୍ଧି ପାଇପାରେ।

ଏହି ଘୋଷଣା ଟ୍ରମ୍ପଙ୍କ ବାଣିଜ୍ୟ ଯୁଦ୍ଧର ଏକ ନୂତନ ଅଧ୍ୟାୟ। ଏହାପୂର୍ବରୁ ସେ ଜାପାନ, ଦକ୍ଷିଣ କୋରିଆ ଏବଂ ଅନ୍ୟାନ୍ୟ ମିତ୍ର ରାଷ୍ଟ୍ରଙ୍କ ଉପରେ ମଧ୍ୟ ନୂଆ ଟାରିଫ ଲଗାଇଛନ୍ତି। ଏଥିସହ ସେ ତମ୍ବା ଆମଦାନୀ ଉପରେ ୫୦% ଶୁଲ୍କ ଆରୋପ କରିଛନ୍ତି।

ଏନବିସି ନ୍ୟୁଜକୁ ଦିଆଯାଇଥିବା ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି, “ଯେଉଁ ଦେଶମାନେ ଏପର୍ଯ୍ୟନ୍ତ ଆମର ଚିଠି ପାଇ ନାହାଁନ୍ତି, ସେମାନଙ୍କ ଉପରେ ମଧ୍ୟ ୧୫% କିମ୍ବା ୨୦% ଟାରିଫ ଲାଗୁ ହେବ। ସମସ୍ତଙ୍କୁ ଚିଠି ଦେବାର ଆବଶ୍ୟକତା ନାହିଁ।” ଏହି ନୀତି ବିଶ୍ୱ ବାଣିଜ୍ୟ ବ୍ୟବସ୍ଥାକୁ ପ୍ରଭାବିତ କରିପାରେ ବୋଲି ବିଶେଷଜ୍ଞମାନେ ସତର୍କ କରିଛନ୍ତି।