ଅନଲାଇନ ଗେମିଂ ବିଲକୁ କ୍ୟାବିନେଟର ମଞ୍ଜୁରି, ବେଟିଂ ଆପ୍ ଓ ଜୁଆ ଉପରେ କଡ଼ା ଅଙ୍କୁଶ
ନୂଆଦିଲ୍ଲୀ (ସଂକେତ ଟିଭି): ଅନଲାଇନ ଗେମିଂ ଓ ଜୁଆ ସମ୍ବନ୍ଧୀୟ କାର୍ଯ୍ୟକଳାପ ଉପରେ କଡ଼ା ନିୟନ୍ତ୍ରଣ ଆଣିବା ପାଇଁ କେନ୍ଦ୍ର କ୍ୟାବିନେଟ ମଙ୍ଗଳବାର ଏକ ନୂତନ ଅନଲାଇନ ଗେମିଂ ବିଲକୁ ମଞ୍ଜୁରୀ ଦେଇଛି। ଏହି ବିଲର ମୁଖ୍ୟ ଉଦ୍ଦେଶ୍ୟ ହେଉଛି ବେଟିଂ ଆପ୍ଗୁଡ଼ିକୁ ନିୟନ୍ତ୍ରଣ କରିବା ଏବଂ ଡିଜିଟାଲ ପ୍ଲାଟଫର୍ମ ମାଧ୍ୟମରେ ଜୁଆ ଖେଳିବା ଉପରେ ଦଣ୍ଡର ବ୍ୟବସ୍ଥା କରିବା। ଏହି ବିଲ ଜାରି ହେଲେ ଅନଲାଇନ ଗେମିଂ ପ୍ଲାଟଫର୍ମଗୁଡ଼ିକୁ ଆଇନଗତ ପରିସୀମା ଭିତରେ ଆଣିହେବ।
ସରକାର ବିଗତ କିଛି ବର୍ଷ ଧରି ଏହି କ୍ଷେତ୍ର ଉପରେ ନିୟନ୍ତ୍ରଣକୁ କଡ଼ାକରି ଚାଲିଛନ୍ତି। ୨୦୨୩ ଅକ୍ଟୋବରରୁ ଅନଲାଇନ ଗେମିଂ ଉପରେ ୨୮% ଜିଏସଟି ଲାଗୁ କରାଯାଇଛି, ଏବଂ ୨୦୨୪-୨୫ ଆର୍ଥିକ ବର୍ଷରୁ ଗେମରୁ ହାସଲ ଜିତିବା ରାଶି ଉପରେ ୩୦% ଟିକସ ଲାଗୁ ହୋଇଛି। ଏପରିକି ବିଦେଶୀ ଗେମିଂ ପ୍ଲାଟଫର୍ମଗୁଡ଼ିକୁ ମଧ୍ୟ ଟିକସ ପରିଦ୍ଧି ଭିତରେ ଆଣିବା ସହ ଅନିୟମିତ କିମ୍ବା ଅବୈଧ ସାଇଟଗୁଡ଼ିକୁ ବ୍ଲକ କରିବା ପାଇଁ ସଂସ୍ଥାମାନଙ୍କୁ କ୍ଷମତା ଦିଆଯାଇଛି।
ଗତ ବର୍ଷ ଭାରତୀୟ ନ୍ୟାୟ ସଂହିତା ଅଧୀନରେ ନୂଆ ଅପରାଧିକ ଧାରା ଲାଗୁ ହୋଇଛି, ଯାହା ଅନୁମୋଦନ ବିନା ବେଟିଂକୁ ଅପରାଧ ଘୋଷଣା କରି ଏଥିପାଇଁ ସାତ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ଏବଂ ଜୋରିମାନାର ବ୍ୟବସ୍ଥା କରିଛି। ତେବେ, ସମ୍ବିଧାନର ରାଜ୍ୟ ତାଲିକାରେ “ବେଟିଂ ଓ ଜୁଆ” ଥିବାରୁ ଅବୈଧ ବେଟିଂ ଓ ଜୁଆ ବିରୋଧରେ କାର୍ଯ୍ୟାନୁଷ୍ଠାନ ନେବାରେ ରାଜ୍ୟ ସରକାରମାନେ ମୁଖ୍ୟ କର୍ତ୍ତୃପକ୍ଷ ରହିଛନ୍ତି।
୨୦୨୨ରୁ ୨୦୨୫ ଫେବ୍ରୁଆରୀ ମଧ୍ୟରେ ସରକାର ୧,୪୦୦ରୁ ଅଧିକ ବେଟିଂ ଓ ଜୁଆ ସମ୍ବନ୍ଧୀୟ ୱେବସାଇଟ ଏବଂ ଆପ୍ଗୁଡ଼ିକୁ ବ୍ଲକ କରିଛନ୍ତି। ଜୁଆରେ ନିଶା ରୋକିବା ପାଇଁ ଶିକ୍ଷା ମନ୍ତ୍ରଣାଳୟ ଅଭିଭାବକ ଓ ଶିକ୍ଷକମାନଙ୍କୁ ପରାମର୍ଶ ଜାରି କରିଛି, ଏବଂ ସୂଚନା ଓ ପ୍ରସାରଣ ମନ୍ତ୍ରଣାଳୟ ଟିଭି ଚ୍ୟାନେଲଗୁଡ଼ିକୁ ଗେମିଂ ବିଜ୍ଞାପନରେ ଆର୍ଥିକ ଲୋଭ ଏବଂ ନିଶା ସମ୍ପର୍କିତ ଚେତାବନୀ ସମ୍ବଳିତ ଡିସକ୍ଲେମର ପ୍ରସାରଣ କରିବାକୁ ନିର୍ଦ୍ଦେଶ ଦେଇଛି।
