ଆୟୁର୍ବେଦିକ ଓ ହୋମିଓପାଥିକ ପିଜି ଛାତ୍ରଙ୍କ ଷ୍ଟାଇପେଣ୍ଡରେ ବୃଦ୍ଧି
ଭୁବନେଶ୍ୱର (ସଂକେତ ଟିଭି) : ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆୟୁର୍ବେଦିକ୍ ଏବଂ ହୋମିଓପାଥିକ୍ ଚିକିତ୍ସା ପଦ୍ଧତିରେ ପିଜି (ସ୍ନାତକୋତ୍ତର) କରୁଥିବା ଛାତ୍ରଛାତ୍ରୀଙ୍କ ମାସିକ ଷ୍ଟାଇପେଣ୍ଡରେ ବୃଦ୍ଧି କରିଛନ୍ତି। ଏହି ଉତ୍ତରଦାୟୀ ନିଷ୍ପତ୍ତିରେ ରାଜ୍ୟର ସରକାରୀ କଲେଜଗୁଡ଼ିକରେ ଅଧ୍ୟୟନରତ ପ୍ରାୟ ୧୨୦ ଜଣ ପିଜି ଛାତ୍ରଛାତ୍ରୀ ଲାଭାନ୍ୱିତ ହେବେ।
ଏହି ନୂତନ ଷ୍ଟାଇପେଣ୍ଡ ହାର ୨୦୨୬ ଜାନୁଆରୀ ୧ ତାରିଖରୁ ଲାଗୁ ହେବ। ପ୍ରଥମ ବର୍ଷର ପିଜି ଛାତ୍ରଙ୍କ ଷ୍ଟାଇପେଣ୍ଡ ପୂର୍ବ ମାସିକ ୩୧,୦୦୦ ଟଙ୍କାରୁ ବୃଦ୍ଧି ପାଇ ୪୮,୦୦୦ ଟଙ୍କା ହେବ (୫୫% ବୃଦ୍ଧି)। ଦ୍ୱିତୀୟ ବର୍ଷର ଛାତ୍ରଙ୍କ ପାଇଁ ଏହା ୩୨,୦୦୦ରୁ ବଢ଼ିଯାଇ ୫୨,୦୦୦ ଟଙ୍କା (୬୨% ବୃଦ୍ଧି) ହେବ। ତୃତୀୟ ବର୍ଷର ଛାତ୍ରଙ୍କ ପାଇଁ ଷ୍ଟାଇପେଣ୍ଡ ୩୩,୦୦୦ ଟଙ୍କାରୁ ବୃଦ୍ଧି ପାଇ ୫୫,୦୦୦ ଟଙ୍କା ହେବ, ଯାହା ପ୍ରାୟ ୬୭% ବୃଦ୍ଧି ସୂଚିତ କରୁଛି।
ସେହିପରି ସରକାରୀ କଲେଜର ହାଉସ୍ ସର୍ଜନମାନଙ୍କ ଷ୍ଟାଇପେଣ୍ଡ ମଧ୍ୟ ବୃଦ୍ଧି ପାଇଛି। ସେମାନଙ୍କ ମାସିକ ଷ୍ଟାଇପେଣ୍ଡ ୧୭,୦୦୦ ଟଙ୍କାରୁ ବଢ଼ାଇ ୩୦,୦୦୦ ଟଙ୍କା କରାଯାଇଛି। ଏହି ନୂତନ ହାର ୨୦୨୫ ଅଗଷ୍ଟ ୧ ତାରିଖରୁ ପ୍ରଭାବରେ ଆସିବ।
ମୁଖ୍ୟମନ୍ତ୍ରୀ ମାଝୀ କହିଛନ୍ତି ଯେ ଏହି ପଦକ୍ଷେପର ମୁଖ୍ୟ ଲକ୍ଷ୍ୟ ହେଉଛି ପାରମ୍ପରିକ ଚିକିତ୍ସା ପଦ୍ଧତି ପ୍ରତି ଯୁବପିଢ଼ୀଙ୍କୁ ଆକର୍ଷିତ କରିବା ଏବଂ ପ୍ରୋତ୍ସାହିତ କରିବା। ଏହାଦ୍ୱାରା ଛାତ୍ରଛାତ୍ରୀମାନେ ସେମାନଙ୍କ ଶିକ୍ଷା ଓ ରୋଗୀ ସେବାରେ ଅଧିକ ଧ୍ୟାନ ଦେଇ ଉଚ୍ଚମାନର ସ୍ୱାସ୍ଥ୍ୟସେବା ପ୍ରଦାନ କରିପାରିବେ ବୋଲି ଆଶା କରାଯାଇଛି।
