ବଡବିଲରେ ବ୍ୟାଙ୍କ ଡକାୟତି; ୫ କୋଟିରୁ ଅଧିକ ସୁନା ଲୁଟ୍
କେନ୍ଦୁଝର (ସଂକେତ ଟିଭି): କେନ୍ଦୁଝର ଜିଲ୍ଲାର ଖଣିଜ ସହର ବଡବିଲସ୍ଥିତ ବ୍ୟାଙ୍କ ଅଫ୍ ମହାରାଷ୍ଟ୍ରରେ ଏକ ସାହସିକ ସଶସ୍ତ୍ର ଡକାୟତି ଘଟିଛି। ଦିନଦିପ୍ରହରେ ଘଟିଥିବା ଏହି ଘଟଣା ଫଳରେ ଡକାୟତମାନେ ପ୍ରାୟ ୮ ଲକ୍ଷ ଟଙ୍କା ନଗଦ ସହ ପ୍ରାୟ ୫ କୋଟି ଟଙ୍କା ମୂଲ୍ୟର ସୁନା ଗହଣା ଲୁଟି ନେଇ ଫେରାର ହୋଇଯାଇଛନ୍ତି। ଏହି ଘଟଣା ସହରରେ ଆତଙ୍କ ସୃଷ୍ଟି କରିଛି।
ପ୍ରାପ୍ତ ସୂଚନା ଅନୁଯାୟୀ, ୫ରୁ ୬ ଜଣ ଅଜଣା ଡକାୟତ ଗ୍ରାହକ ଭାବରେ ବ୍ୟାଙ୍କ ଭିତରକୁ ପ୍ରବେଶ କରିଥିଲେ। ହଠାତ୍ ସେମାନେ ବନ୍ଧୁକ ବାହାର କରି ବ୍ୟାଙ୍କ କର୍ମଚାରୀ ଏବଂ ଉପସ୍ଥିତ ଗ୍ରାହକମାନଙ୍କୁ ଭୟଭୀତ କରିଥିଲେ। ବନ୍ଧୁକର ଭୟ ଦେଖାଇ ସେମାନେ ନଗଦ ଟଙ୍କା ଏବଂ ଲକ୍ଷ୍ୟ କରାଯାଇଥିବା ସୁନା ଗହଣା ଲୁଟି ନେଇ ଘଟଣାସ୍ଥଳ ଛାଡି ଚାଲିଯାଇଥିବା ସନ୍ଦେହ କରାଯାଉଛି।
ଘଟଣାର ଖବର ମିଳିବା ପରେ ବଡବିଲ ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୁଲିସ ସିସିଟିଭି ଫୁଟେଜ୍ ଯାଞ୍ଚ କରୁଛି ଏବଂ ଡକାୟତମାନଙ୍କ ପଳାୟନ ପଥ ଚିହ୍ନଟ କରିବା ପାଇଁ ତଦନ୍ତ ଚାଲିଛି। ଜିଲ୍ଲାର ବିଭିନ୍ନ ପ୍ରବେଶପଥରେ ନାକାବନ୍ଦୀ ଜାରି ରଖାଯାଇ ଅପରାଧୀଙ୍କୁ ଧରିବା ପାଇଁ ପୁଲିସ ଚେଷ୍ଟା ଚଳାଇଛି।
ଏପର୍ଯ୍ୟନ୍ତ ବ୍ୟାଙ୍କ ପକ୍ଷରୁ ଲୁଟି ଯାଇଥିବା ଟଙ୍କା ଓ ସୁନାର ସଠିକ୍ ପରିମାଣ ସମ୍ପର୍କିତ ବିବରଣୀ ଦିଆଯାଇ ନାହିଁ। ପୁଲିସ ମାମଲା ରୁଜୁ କରି ଗଭୀର ତଦନ୍ତ ଚାଲୁ ରଖିଛି ଏବଂ ଶୀଘ୍ର ଅପରାଧୀଙ୍କୁ ଧରାବାକୁ ଲାଗି ପଡିଛି।
