ମାଟ୍ରିକ ପରୀକ୍ଷାରେ କପି କଲେ ୫ ବର୍ଷ ଜେଲ୍ ଓ ୧୦ ଲକ୍ଷ ଜରିମାନା

ଭୁବନେଶ୍ୱର (ସଂକେତ ଟିଭି): ମାଟ୍ରିକ ଓ ଇଣ୍ଟରମିଡିଏଟ୍ ପରୀକ୍ଷାକୁ କପିମୁକ୍ତ କରିବାକୁ ଓଡ଼ିଶା ସରକାର କଠୋର ପଦକ୍ଷେପ ନେଇଛନ୍ତି। ନୂତନ ପରୀକ୍ଷା ଆଇନ, ୨୦୨୪ ଅନୁଯାୟୀ ପରୀକ୍ଷାରେ ନକଲ କରିବା ଦୋଷୀ ପ୍ରମାଣିତ ହେଲେ ୫ ବର୍ଷ କାରାଦଣ୍ଡ ଏବଂ ୧୦ ଲକ୍ଷ ଟଙ୍କା ଜରିମାନା ହେବ। ଏହା ସହ ଉକ୍ତ ପରୀକ୍ଷାର୍ଥୀଙ୍କୁ କ୍ୟାରିଅରରୁ ବାହାର କରାଯାଇପାରିବ।

ଫେବୃଆରୀ ୧୮ରୁ ଇଣ୍ଟରମିଡିଏଟ୍ ଏବଂ ଫେବୃଆରୀ ୧୯ରୁ ମାଟ୍ରିକ ପରୀକ୍ଷା ଆରମ୍ଭ ହେବ। ରାଜ୍ୟର ପ୍ରାୟ ୯ ଲକ୍ଷ ଛାତ୍ରଛାତ୍ରୀ ଏହି ଦୁଇ ପରୀକ୍ଷାରେ ବସିବେ। ମାଧ୍ୟମିକ ଶିକ୍ଷା ପରିଷଦ ଏବଂ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ସ୍ୱଚ୍ଛ ପରୀକ୍ଷା ପାଇଁ ମୋଟ ୧୪ଟି ମୁଖ୍ୟ ପଦକ୍ଷେପ ନିଆଯାଇଛି।

କ୍ଷିପ୍ର ଚିହ୍ନଟ ପାଇଁ QR କୋଡ୍ ଓ ୱାଟରମାର୍କ: ପ୍ରଶ୍ନପତ୍ରର ପ୍ରତ୍ୟେକ ପୃଷ୍ଠାରେ ଅନନ୍ୟ QR କୋଡ୍ ଓ ସିରିଆଲ୍ ନମ୍ବର ରହିବ। ଯଦି କେହି ପ୍ରଶ୍ନପତ୍ରର ଫଟୋ ଅନଲାଇନେ ଶେୟାର୍ କରେ, ସେହି କୋଡ୍ ମାଧ୍ୟମରେ କିଛି ମିନିଟ୍ ମଧ୍ୟରେ ସେଣ୍ଟର ଓ ପରୀକ୍ଷାର୍ଥୀ ଚିହ୍ନଟ କରାଯାଇପାରିବ।

ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ନଜର: ସମସ୍ତ ପରୀକ୍ଷା କେନ୍ଦ୍ରରେ AI-ସଂଯୁକ୍ତ CCTV କ୍ୟାମେରା ଲଗାଯିବ, ଯାହା ହଲ୍ ଭିତରେ କୌଣସି ସନ୍ଦିଗ୍ଧ ଗତିବିଧିକୁ ତୁରନ୍ତ ଚିହ୍ନଟ କରି ଅଲର୍ଟ ଦେବ।

ଲାଇଭ୍ ମନିଟରିଂ ଓ ଡିଜିଟଲ୍ ଲକ୍: ରାଜ୍ୟର ୩,୦୮୨ଟି ମାଟ୍ରିକ ସେଣ୍ଟରରେ ଲାଇଭ୍ CCTV ଫିଡ୍ କଣ୍ଟ୍ରୋଲ୍ ରୁମ୍କୁ ପ୍ରେରିତ ହେବ। ପ୍ରଶ୍ନପତ୍ର ପ୍ୟାକେଟ୍ ମଲ୍ଟି-ଲେୟାର୍ ପାସୱାର୍ଡ ଓ ଡିଜିଟାଲ୍ ଲକ୍ରେ ରଖାଯିବ, ଯାହା ନିର୍ଦ୍ଧାରିତ ସମୟ ପୂର୍ବରୁ ଖୋଲିବ ନାହିଁ।

GPS ଟ୍ରାକିଂ ଓ ପୋଲିସ ସୁରକ୍ଷା: ପ୍ରଶ୍ନପତ୍ର ବଣ୍ଟନ ପାଇଁ ବ୍ୟବହୃତ ଯାନଗୁଡିକରେ GPS ଟ୍ରାକର୍ ଲାଗିବ। ନୋଡାଲ୍ ସେଣ୍ଟରରୁ ସ୍କୁଲକୁ ପ୍ରଶ୍ନପତ୍ର ଆସିବା ଓ ଫେରିବା ସମୟରେ ପୋଲିସ୍ ସୁରକ୍ଷା ବାଧ୍ୟତାମୂଳକ ହେବ। ପ୍ରଶ୍ନପତ୍ର ଗଚ୍ଛିତ ଷ୍ଟ୍ରଙ୍ଗ୍ ରୁମ୍ରେ ୨୪ ଘଣ୍ଟା ପୋଲିସ୍ ମୁତୟନ ରହିବ।

ଦ୍ୱିସ୍ତରୀୟ ଯାଞ୍ଚ ଓ ମୋବାଇଲ୍ ନିଷେଧ: ପରୀକ୍ଷାର୍ଥୀଙ୍କୁ ହଲ୍ ଭିତରକୁ ଯିବା ପୂର୍ବରୁ ଦୁଇଥର ଯାଞ୍ଚ କରାଯିବ, ଛାତ୍ରୀଙ୍କୁ ମହିଳା କର୍ମଚାରୀ ଯାଞ୍ଚ କରିବେ। ପରୀକ୍ଷା ହଲ୍ ଭିତରକୁ କୌଣସି ପରୀକ୍ଷାର୍ଥୀ, ଶିକ୍ଷକ ବା କର୍ମଚାରୀଙ୍କ ପାଇଁ ମୋବାଇଲ୍ ଫୋନ୍ ବା ସ୍ମାର୍ଟ୍ୱାଚ୍ ନେବା ସମ୍ପୂର୍ଣ୍ଣ ନିଷିଦ୍ଧ।

ହେଲ୍ପଲାଇନ୍, ଅନଲାଇନ୍ ପ୍ରକ୍ରିୟା ଓ ଫ୍ଲାଇଙ୍ଗ୍ ସ୍କ୍ୱାଡ୍: ପରୀକ୍ଷାର୍ଥୀଙ୍କ ମାନସିକ ଚାପ ଓ ଅଭିଯୋଗ ପାଇଁ ହେଲ୍ପଲାଇନ୍ ନମ୍ବର ଜାରି ହୋଇଛି। ଫର୍ମ ପୂରଣରୁ ମାର୍କ୍ ଅପଲୋଡ୍ ପର୍ଯ୍ୟନ୍ତ ସବୁ କାର୍ଯ୍ୟ ଅନଲାଇନ୍ ହେବ। ଏଥିସହ ହଠାତ୍ ଯାଞ୍ଚ ପାଇଁ ବ୍ଲୁ-ସ୍କ୍ୱାଡ୍ ଓ ଫ୍ଲାଇଙ୍ଗ୍ ସ୍କ୍ୱାଡ୍ ଗଠନ କରାଯାଇଛି।

ପରୀକ୍ଷାର୍ଥୀଙ୍କୁ ଅତିକମରେ ୩୦ରୁ ୪୫ ମିନିଟ୍ ପୂର୍ବରୁ କେନ୍ଦ୍ରରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି। ପରୀକ୍ଷା ଶେଷ ହେବା ପରେ ଉତ୍ତରପତ୍ର ସଂଗ୍ରହ କରାଯିବ ଏବଂ ମାର୍ଚ୍ଚ ପ୍ରଥମ ସପ୍ତାହରୁ ମୂଲ୍ୟାୟନ ପ୍ରକ୍ରିୟା ଆରମ୍ଭ କରାଯିବାର ଲକ୍ଷ୍ୟ ରଖାଯାଇଛି।