ଏନସିଇଆରଟି ପୁସ୍ତକ ଉପରେ ସୁପ୍ରିମକୋର୍ଟଙ୍କ ରୋକ୍
ନୂଆଦିଲ୍ଲୀ (ସଂକେତ ଟିଭି): ଏନସିଇଆରଟି (NCERT) ଦ୍ୱାରା ପ୍ରକାଶିତ ଅଷ୍ଟମ ଶ୍ରେଣୀର ସାମାଜିକ ବିଜ୍ଞାନ ପୁସ୍ତକରେ ସାମିଲ ‘ନ୍ୟାୟପାଳିକାରେ ଦୁର୍ନୀତି’ ଶୀର୍ଷକ ବିବାଦୀୟ ଅଧ୍ୟାୟକୁ ନେଇ ସୁପ୍ରିମକୋର୍ଟ ଗୁରୁବାର ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏହାକୁ ଏକ ‘ଗଭୀର ଷଡଯନ୍ତ୍ର’ ଆଖ୍ୟା ଦେଇ ସର୍ବୋଚ୍ଚ ନ୍ୟାୟାଳୟ ଏହି ପୁସ୍ତକର ମୁଦ୍ରଣ, ବିକ୍ରୟ ଏବଂ ସମସ୍ତ ପ୍ରକାର ପ୍ରସାରଣ ଉପରେ ତୁରନ୍ତ ପ୍ରତିବନ୍ଧକ ଲଗାଇଦେଇଛନ୍ତି।
ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟ କାନ୍ତଙ୍କ ନେତୃତ୍ୱାଧୀନ ଖଣ୍ଡପୀଠ ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ ନିର୍ଦ୍ଦେଶ ଦେଇଛନ୍ତି। କୋର୍ଟ କହିଛନ୍ତି ଯେ ଏହି ଷଡଯନ୍ତ୍ର ପଛରେ କିଏ ଦାୟୀ ତାହା ନିର୍ଦ୍ଧାରଣ କରାଯିବ ଏବଂ ଦୋଷୀମାନଙ୍କୁ ନ୍ୟାୟିକ ପରିସରକୁ ଅଣାଯିବ। “ଆମକୁ ଜାଣିବାକୁ ହେବ ଏଥିପାଇଁ କିଏ ଦାୟୀ। ଦୋଷୀମାନଙ୍କ ବିରୋଧରେ ନିଶ୍ଚିତ କାର୍ଯ୍ୟାନୁଷ୍ଠାନ ହେବ ଏବଂ ଆମେ ଏହି ମାମଲାକୁ ଏତେ ଶୀଘ୍ର ବନ୍ଦ କରିବୁ ନାହିଁ,” ସିଜେଆଇ କହିଛନ୍ତି।
କୋର୍ଟ ଏହି ମାମଲାରେ ଶିକ୍ଷା ମନ୍ତ୍ରଣାଳୟର ସଚିବ ଏବଂ ଏନସିଇଆରଟି ନିର୍ଦ୍ଦେଶକ ଦୀନେଶ ପ୍ରସାଦ ସକଲାନିଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ଏହା ସହିତ ବଜାରରେ ଥିବା ସମସ୍ତ ପୁସ୍ତକ ଜବତ କରିବାକୁ ଏବଂ ଇଣ୍ଟରନେଟରୁ ଏହାର PDF ଫାଇଲ୍ ତୁରନ୍ତ ହଟାଇବାକୁ ନିର୍ଦ୍ଦେଶ ଦିଆଯାଇଛି। ଏନସିଇଆରଟି ପକ୍ଷରୁ ଓକିଲାତି କରୁଥିବା ସଲିସିଟର ଜେନେରାଲ ତୁଷାର ମେହେତାଙ୍କୁ କୋର୍ଟ କହିଛନ୍ତି ଯେ, କ’ଣ ସଂସ୍ଥା ନ୍ୟାୟପାଳିକା ଦୁର୍ନୀତିଗ୍ରସ୍ତ ବୋଲି ପିଲାଙ୍କୁ ଶିଖାଇବାକୁ ଚାହୁଁଛି?
ଏହି ଷଡଯନ୍ତ୍ରର ତଦନ୍ତ ପାଇଁ ସୁପ୍ରିମକୋର୍ଟ ଏନସିଇଆରଟିକୁ ନିର୍ଦ୍ଦେଶ ଦେଇଛନ୍ତି ଯେ, ଏହି ବିବାଦୀୟ ଅଧ୍ୟାୟକୁ ଅନୁମୋଦନ କରିଥିବା ‘ଟିଚିଂ-ଲର୍ଣ୍ଣିଂ ମ୍ୟାଟେରିଆଲ୍ କମିଟି’ର ସମସ୍ତ ବିବରଣୀ ଦାଖଲ କରାଯାଉ। ଏଥିରେ ବିକାଶକାରୀ ଦଳର ସମସ୍ତ ସଦସ୍ୟଙ୍କ ନାମ, ଯୋଗ୍ୟତା ଏବଂ ପ୍ରମାଣପତ୍ର (କ୍ରେଡେନସିଆଲ୍) ଅନ୍ତର୍ଭୁକ୍ତ କରିବାକୁ କୁହାଯାଇଛି।
କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ରିଟେଲ ଦୋକାନ ଏବଂ ସ୍କୁଲଗୁଡ଼ିକରୁ ଏହି ବହିକୁ ତୁରନ୍ତ ଜବତ କରିବା ପାଇଁ ଏନସିଇଆରଟି ନିର୍ଦ୍ଦେଶକଙ୍କୁ ଦାୟିତ୍ୱ ଦିଆଯାଇଛି। କୌଣସି ଡିଜିଟାଲ୍ କିମ୍ବା ଭୌତିକ (ଫିଜିକାଲ୍) କପି ମାଧ୍ୟମରେ ଏହାର ପାଠପଢ଼ା ଯେପରି ନ ହୁଏ, ତାହା ନିଶ୍ଚିତ କରିବାକୁ କୋର୍ଟ ସମସ୍ତ ରାଜ୍ୟର ଶିକ୍ଷା ସଚିବମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶ ପାଳନ କରାଯାଇଥିବା ନେଇ ଆସନ୍ତା ୨ ସପ୍ତାହ ମଧ୍ୟରେ ଅନୁପାଳନ ରିପୋର୍ଟ ଦାଖଲ କରିବାକୁ କୁହାଯାଇଛି।
