ବିଜେପି ସରକାରଙ୍କ ବିରୋଧରେ ଅକ୍ଟୋବର ୯ରୁ ବିଜେଡିର ପଦଯାତ୍ରା

ଭୁବନେଶ୍ୱର (ସଂକେତ ଟିଭି): ବିଜେଡି ଏବର୍ଷ ଅକ୍ଟୋବର ୯ରୁ ନଭେମ୍ବର ୯ ଯାଏଁ ପଦଯାତ୍ରା ଆୟୋଜନ କରିବ । ଏହି ପଦଯାତ୍ରା ଗୋପବନ୍ଧୁ ଦାସଙ୍କ ଜୟନ୍ତୀ ଦିନ ଆରମ୍ଭ ହୋଇ ନଭେମ୍ବର ୯ରେ ଶେଷ ହେବ । ବିଜେଡିର ବରିଷ୍ଠ ଉପସଭାପତି ଦେବୀ ମିଶ୍ର ଏହି ପଦଯାତ୍ରାର ରୂପରେଖ ଆଜି ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ।

ଦେବୀ ମିଶ୍ର କହିଛନ୍ତି ଯେ ଅକ୍ଟୋବର ୨ ତାରିଖରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରି ପଦଯାତ୍ରାର ସଂକଳ୍ପ ନିଆଯିବ । ପାର୍ବଣ ଦିନମାନଙ୍କରେ ପଦଯାତ୍ରା ଆୟୋଜିତ ହେବ ନାହିଁ । ଏଥିରେ ବିଜେଡିର ସମସ୍ତ ଛାମୁଆ ସଂଗଠନ ଯୋଗ ଦେବେ । ପଦଯାତ୍ରାର ମୁଖ୍ୟ ଉଦ୍ଦେଶ୍ୟ ହେବ ବିଜେଡି ସରକାରଙ୍କ ରୂପାନ୍ତର ଏବଂ ବିକାଶ କାର୍ଯ୍ୟକ୍ରମକୁ ଲୋକଙ୍କ ନିକଟକୁ ନେଇଯିବା ଏବଂ ବର୍ତ୍ତମାନର ବିଜେପି ସରକାରଙ୍କ ୧୫ ମାସର ବିଫଳତାକୁ ଚିହ୍ନଟ କରିବା ।

ଅନ୍ୟ ପକ୍ଷରେ, ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ବିଜେପି ସରକାରଙ୍କ ଉପରେ ଗୁରୁତର ଆରୋପ ଲଗାଇଛନ୍ତି । ତାଙ୍କ ମତରେ, ବିଜେପି ସରକାର ଓଡ଼ିଆ ଅସ୍ମିତା ଏବଂ ପରିବର୍ତ୍ତନର ନାରା ଦେଇ କ୍ଷମତାକୁ ଆସିଥିଲେ ମଧ୍ୟ ବିକାଶ କାର୍ଯ୍ୟକ୍ରମଗୁଡ଼ିକୁ ବନ୍ଦ କରିଦେଇଛନ୍ତି । ସେ ନିଶାମୁକ୍ତି ଅଭିଯାନ ଏବଂ ମଦ ଦୋକାନ ଖୋଲିବାର ବିରୋଧୀ ତର୍କ ଉପସ୍ଥାପନ କରିଛନ୍ତି । ପ୍ରମିଳା ଆରୋପ କରିଛନ୍ତି ଯେ ବିଜେପି ସରକାର ପଞ୍ଚାୟତ ପ୍ରତିନିଧିଙ୍କ କ୍ଷମତା ହରାଇଛନ୍ତି, BSKY ଯୋଜନାରେ ପରିବର୍ତ୍ତନ ଆଣି ରୋଗୀଙ୍କୁ ହଇରାଣ କରିଛନ୍ତି ଏବଂ ଚାକିରି ପ୍ରତିଶ୍ରୁତି ପୂରଣ କରିନାହାନ୍ତି ।

ମହିଳା ସଶକ୍ତିକରଣ ନେଇ ମଧ୍ୟ ପ୍ରମିଳା ତୀବ୍ର ଆକ୍ରୋଶ ପ୍ରକାଶ କରିଛନ୍ତି । ତାଙ୍କ କହିବା ଅନୁଯାୟୀ, ବିଜୁ ପଟ୍ଟନାୟକ ମହିଳାଙ୍କ ପାଇଁ ୩୩% ସଂରକ୍ଷଣ ଏବଂ ମହିଳା ଓ ଶିଶୁ ବିକାଶ ବିଭାଗ ଗଠନ କରିଥିଲେ । ନବୀନ ପଟ୍ଟନାୟକ ଏହାକୁ ଆଗକୁ ନେଇ ମିଶନ ଶକ୍ତି ବିଭାଗ ଗଠନ କରି ମହିଳାଙ୍କୁ ସଶକ୍ତ କରିଥିଲେ । ମାତ୍ର ବର୍ତ୍ତମାନର ସରକାର ମିଶନ ଶକ୍ତିର ବଜେଟ୍ ସଂକୁଚିତ କରି ଏହି ଯୋଜନାଗୁଡ଼ିକୁ ଭାଙ୍ଗିବାର ଚେଷ୍ଟା କରୁଛନ୍ତି । ପ୍ରମିଳା ଜଣାଇଛନ୍ତି ଯେ ବିଜେଡି ମହିଳାଙ୍କ ସହିତ ଠିଆ ହୋଇ ସରକାରଙ୍କ ଏହି ଷଡଯନ୍ତ୍ରର ବିରୋଧ କରିବ ।