ଡିସେମ୍ବର ୧ରୁ ସଂସଦର ଶୀତକାଳୀନ ଅଧିବେଶନ
ନୂଆଦିଲ୍ଲୀ (ସଂକେତ ଟିଭି): ଡିସେମ୍ବର ୧ ତାରିଖରୁ ସଂସଦର ଶୀତକାଳୀନ ଅଧିବେଶନ ଆରମ୍ଭ ହେବାକୁ ଯାଉଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅନୁମୋଦନ ପରେ ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ଏହି ତାରିଖ ଘୋଷଣା କରିଛନ୍ତି । ଏହି ଅଧିବେଶନ ଡିସେମ୍ବର ୧୯ ତାରିଖ ପର୍ଯ୍ୟନ୍ତ ଚାଲିବ ।
କିରଣ ରିଜିଜୁ ଏକ୍ସ ପ୍ଲାଟଫର୍ମରେ ଦେଇଥିବା ଏକ ବିବୃତିରେ କହିଛନ୍ତି, “ଡିସେମ୍ବର ୧ରୁ ୧୯ ପର୍ଯ୍ୟନ୍ତ ସଂସଦର ଶୀତକାଳୀନ ଅଧିବେଶନ ଡାକିବା ପାଇଁ ସରକାରଙ୍କ ପ୍ରସ୍ତାବକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅନୁମୋଦନ କରିଛନ୍ତି । ଏକ ଗଠନମୂଳକ ଏବଂ ଅର୍ଥପୂର୍ଣ୍ଣ ଅଧିବେଶନ ପାଇଁ ଅପେକ୍ଷା କରିଛୁ, ଯାହା ଆମର ଗଣତନ୍ତ୍ରକୁ ସୁଦୃଢ କରିବ ଏବଂ ଲୋକଙ୍କ ଆଶାକୁ ପୂରଣ କରିବ ।”
ଏଥିସହ, ଏହି ଶୀତକାଳୀନ ଅଧିବେଶନରେ ଏକ ଗୁରୁତ୍ଵପୂର୍ଣ୍ଣ ଘଟଣା ରହିବ । ଉପରାଷ୍ଟ୍ରପତି ଜଗଦୀପ ଧନକଡ଼ଙ୍କ ପରିବର୍ତ୍ତେ ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନ ରାଜ୍ୟସଭା ଅଧ୍ୟକ୍ଷ ଭାବରେ ପ୍ରଥମ ଥର ପାଇଁ କାର୍ଯ୍ୟ କରିବେ । ସେପ୍ଟେମ୍ବର ୧୨ ତାରିଖରେ ସେ ଦେଶର ୧୫ତମ ଉପରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ ।
ଗତ ମୌସୁମୀ ଅଧିବେଶନ ଜୁଲାଇ ୨୧ରେ ଆରମ୍ଭ ହୋଇ ଅଗଷ୍ଟ ୨୧ରେ ଶେଷ ହୋଇଥିଲା । ସେହି ୩୨ ଦିନର ଅଧିବେଶନରେ ମୋଟ ୨୧ଟି ବୈଠକ ଅନୁଷ୍ଠିତ ହୋଇଥିଲା । ଅଧିବେଶନରେ ବିରୋଧୀ ଦଳଗୁଡିକର ତୀବ୍ର ବିରୋଧ ଦେଖାଦେଇଥିଲା । ‘ଅପରେସନ ସିନ୍ଦୂର’ ଉପରେ ଆଲୋଚନା କରାଯାଇଥିବା ବେଳେ ଲୋକସଭାରେ ୧୪ଟି ବିଲ୍ ଆଗତ ହୋଇଥିଲା, ଯାହା ମଧ୍ୟରୁ ୧୨ଟି ଗୃହୀତ ହୋଇଥିଲା । ରାଜ୍ୟସଭାରେ ୧୫ଟି ବିଲ୍କୁ ଅନୁମୋଦନ ମିଳିଥିଲା, ଯେଉଁଥିରେ ଆୟକର ବିଲ୍ ୨୦୨୫ ମଧ୍ୟ ଅନ୍ତର୍ଭୁକ୍ତ ଥିଲା, ଯାହାକୁ ପରେ ସରକାର ପ୍ରତ୍ୟାହାର କରିନେଇଥିଲେ ।
ଅଗଷ୍ଟ ୨୧ରେ ସଂସଦର ଉଭୟ ଗୃହକୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଥିଲା । ବିହାରର ଭୋଟର ତାଲିକା ସଂଶୋଧନ ଉପରେ ବିସ୍ତୃତ ଆଲୋଚନା ଦାବି କରି ବିରୋଧୀ ସାଂସଦମାନେ ଗୃହ ଭିତରେ ଓ ବାହାରେ ହଟ୍ଟଗୋଳ ସୃଷ୍ଟି କରିଥିଲେ । ବିରୋଧୀ ଦଳଗୁଡିକ ନିର୍ବାଚନ କମିଶନ ଏବଂ ବିଜେପି ଉପରେ ରାଜ୍ୟରେ ଭୋଟର ତାଲିକାକୁ ହେରଫେର କରିବା ପାଇଁ ଷଡଯନ୍ତ୍ର କରିଥିବା ଅଭିଯୋଗ କରିଥିଲେ । ଏହି ହଟ୍ଟଗୋଳ ଯୋଗୁଁ ଅନେକ ଥର ଗୃହକୁ ମୁଲତବୀ ଘୋଷଣା କରିବାକୁ ପଡିଥିଲା ।
