ନୂଆପଡ଼ାରେ ବିଜେପିର ବିଜୟ : ସରକାରୀ କଳର ଅପବ୍ୟବହାର ହୋଇଛି କହିଲା ବିଜେଡି
ଭୁବନେଶ୍ବର (ସଂକେତ ଟିଭି):ନୂଆପଡ଼ା ବିଧାନସଭା ଆସନର ଉପ-ନିର୍ବାଚନରେ ଗଣନା ଶେଷ ହୋଇସାରିଛି ଏବଂ ଫଳାଫଳ ଘୋଷଣାକୁ ଅପେକ୍ଷା କରାଯାଉଛି । ଏହି ନିର୍ବାଚନକୁ ନେଇ ରାଜ୍ୟର ରାଜନୈତିକ ଦଳଗୁଡ଼ିକ ମଧ୍ୟରେ ତୀବ୍ର ପ୍ରତିକ୍ରିୟା ଦେଖାଦେଇଛି ।
ବିଜେପି ନେତା ମନମୋହନ ସାମଲ କହିଛନ୍ତି ଯେ ନୂଆପଡ଼ା ଏକ ସମସ୍ୟାବହୁଳ ମଣ୍ଡଳୀ ଥିଲା, ଯେଉଁଠି ଶିଳ୍ପ କିମ୍ବା ଜଳସେଚନର ଉନ୍ନତ ବ୍ୟବସ୍ଥା ନଥିଲା । ସେ ଦାବି କରିଛନ୍ତି ଯେ ଏସବୁ ସମସ୍ୟା ଦୂର କରିବା ପାଇଁ ଲୋକେ ପରିବର୍ତ୍ତନ ଚାହୁଁଥିଲେ ଏବଂ ଦେଢ଼ ମାସରେ ହୋଇଥିବା ଉନ୍ନତି ଦେଖି ସେମାନେ ବିଜେପିକୁ ଭୋଟ୍ ଦେଇଛନ୍ତି । ବିଜେପି ରାଜ୍ୟ ସଭାପତି କହିଛନ୍ତି ଯେ ବିରୋଧୀ ଦଳଗୁଡ଼ିକୁ ହାର ମାନିନେବା ଉଚିତ୍ ଏବଂ ଅନ୍ୟକୁ ଦୋଷ ଦେବା ପରିବର୍ତ୍ତେ ଆତ୍ମସମୀକ୍ଷା କରିବା ଦରକାର ।
ବିଜୟୀ ବିଜେପି ପ୍ରାର୍ଥୀ ଜୟ ଢୋଲକିଆ କହିଛନ୍ତି ଯେ ଏହି ବିଜୟ ବିଜେପିର ନୁହେଁ ବରଂ ନୂଆପଡ଼ାବାସୀଙ୍କର ବିଜୟ । ସେ କହିଛନ୍ତି, “ଏହି ବିଜୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ମୋର ବାପା ସ୍ୱର୍ଗତ ରାଜେନ୍ଦ୍ର ଢୋଲକିଆଙ୍କ ପ୍ରତି ଲୋକଙ୍କ ଶ୍ରଦ୍ଧାର ଫଳ । ମୋ ଉପରେ ଲୋକଙ୍କ ବାପାଙ୍କଠାରୁ ଅଧିକ ବିଶ୍ୱାସ ରହିଛି, ଏଥିପାଇଁ ମୁଁ ସେମାନଙ୍କୁ ଧନ୍ୟବାଦ ଜଣାଉଛି ।”
ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କହିଛନ୍ତି ଯେ ଦେଢ଼ ବର୍ଷର ବିଜେପି ସରକାରର ଲୋକପ୍ରିୟତା ଏହି ଭୋଟ୍ ରେ ପ୍ରତିଫଳିତ ହୋଇଛି । ତାଙ୍କ ମତରେ, ବିଜେଡି ଓ କଂଗ୍ରେସ କେବଳ ଦ୍ୱିତୀୟ ଏବଂ ତୃତୀୟ ସ୍ଥାନ ପାଇଁ ପ୍ରତିଦ୍ୱନ୍ଦ୍ୱିତା କରୁଥିଲେ । ସେ ଦାବି କରିଛନ୍ତି ଯେ ବିହାରରେ ମଧ୍ୟ ଏନ୍ଡିଏ ସମାନ ଭାବେ ବିଜୟୀ ହେବ ।
ବରିଷ୍ଠ ବିଜେଡି ନେତା ଦେବୀ ପ୍ରସାଦ ମିଶ୍ର ଏହି ଫଳାଫଳକୁ ଚକିତକାରୀ ବୋଲି କହିଛନ୍ତି । ତେବେ ସେ ଗୁରୁତ୍ୱପୂର୍ଣ୍ଣ ଆରୋପ କରିଛନ୍ତି ଯେ ବିଜେପି ସରକାରୀ କଳ ଓ ବଳର ଅପବ୍ୟବହାର କରି ନିର୍ବାଚନ ଜିତିଛି । ତାଙ୍କ ମତରେ, ନୂଆପଡ଼ା ଫଳାଫଳ ଗଣତନ୍ତ୍ରକୁ ହତ୍ୟା କରିବାର ସଙ୍କେତ ଦେଉଛି ଏବଂ ଏହା ଲୋକଙ୍କୁ ବ୍ୟଥିତ କରିଛି । ସେ କହିଛନ୍ତି ଯେ ବିଜେଡି ଅନେକ ଉପ-ନିର୍ବାଚନର ସମ୍ମୁଖୀନ ହୋଇଛି, କିନ୍ତୁ ନୂଆପଡ଼ାର ଫଳ ଅନ୍ୟଠାରୁ ଭିନ୍ନ ଏବଂ ଚିନ୍ତାର କାରଣ ।
