ପଶ୍ଚିମବଙ୍ଗ ବିଧାୟକଙ୍କ ଗାଡି ଧକ୍କାରେ ସ୍କୁଟି ଚାଳକଙ୍କ ମୃତ୍ୟୁ

ବାଲେଶ୍ୱର (ସଂକେତ ଟିଭି): ବାଲେଶ୍ୱର ଜିଲ୍ଲାର ସିମୁଳିଆ ଥାନା ଅଧୀନସ୍ଥ ୧୬ନଂ ଜାତୀୟ ରାଜପଥରେ ଏକ ମାରାତ୍ମକ ଦୁର୍ଘଟଣା ଘଟିଛି। ପଶ୍ଚିମବଙ୍ଗର ଉତ୍ତର ହାୱରା ବିଧାନସଭା କ୍ଷେତ୍ରର ବିଧାୟକ ଗୌତମ ଚୌଧୁରୀଙ୍କ ଗାଡି ଜାମୁଝାଡ଼ି ନିକଟରେ ଏକ ସ୍କୁଟିକୁ ଧକ୍କା ମାରିବାରୁ ସ୍କୁଟି ଚାଳକଙ୍କ ମୃତ୍ୟୁ ଘଟିଛି। ବିଧାୟକ ଓ ତାଙ୍କ ପରିବାର ସଦସ୍ୟମାନେ ଏହି ଘଟଣାରୁ ଅଳ୍ପରେ ରକ୍ଷା ପାଇଛନ୍ତି।

ସୂଚନା ଅନୁଯାୟୀ, ବିଧାୟକ ଗୌତମ ଚୌଧୁରୀ ତାଙ୍କ ସାନ ଭାଇ ଅପୂର୍ବ ସିହ୍ନାଙ୍କ କାର୍ (WB 12BK 8988) ନେଇ ପୁରୀ ଯାଇଥିଲେ। ଶ୍ରୀ ଜଗନ୍ନାଥଙ୍କ ଦର୍ଶନ କରି ଫେରିବା ସମୟରେ ଜାମୁଝାଡ଼ି ନିକଟରେ ସ୍କୁଟି (OD 22H 1442) ସହିତ ଧକ୍କା ହୋଇଥିଲା। ଘଟଣାସ୍ଥଳରେ ସ୍କୁଟି ଚାଳକ ରାଧାକାନ୍ତ ଲେଙ୍କା (୫୬)ଙ୍କ ମୃତ୍ୟୁ ଘଟିଛି। ସେ ସୋର ବ୍ଲକର ସାଜନପୁର ଗ୍ରାମର ବାସିନ୍ଦା ଥିଲେ ଏବଂ ବାସୁଦେବପୁର ବିନାୟକପୁର ଉଚ୍ଚ ବିଦ୍ୟାଳୟରେ ପିଅନ ଭାବେ କାର୍ଯ୍ୟ କରୁଥିଲେ।

ଘଟଣା ପରେ ପୋଲିସ ବିଧାୟକଙ୍କ ଡ୍ରାଇଭର ଅମୀୟ ସିଂ ରାୟଙ୍କୁ ଅଟକ କରି ତଦନ୍ତ ଆରମ୍ଭ କରିଛି। କାର୍ଯ୍ୟକ୍ରମରେ ଦୁର୍ଘଟଣାର ସଠିକ୍ କାରଣ ନିରୂପଣ ପାଇଁ ଅନୁସନ୍ଧାନ ଚାଲିଛି। ସ୍ଥାନୀୟ ପୋଲିସ ଘଟଣାସ୍ଥଳରେ ଯାଞ୍ଚ କରିବା ସହ ମୃତକଙ୍କ ପରିବାରକୁ ସାନ୍ତ୍ୱନା ଦେଇଛନ୍ତି।

ଏହି ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଆକ୍ରୋଶ ଦେଖାଦେଇଛି। ପୋଲିସ କଡ଼ା ପହରା ବସାଇ ପରିସ୍ଥିତି ନିୟନ୍ତ୍ରଣରେ ରଖିଛି।