୧ ଲକ୍ଷରୁ ୧୦ ଲକ୍ଷକୁ ବଢିଲା ୟୁପିଆଇ ଦୈନିକ କାରବାର ସୀମା

ନୂଆଦିଲ୍ଲୀ (ସଂକେତ ଟିଭି): ୟୁପିଆଇ (UPI) ମାଧ୍ୟମରେ ଦୈନିକ ଟ୍ରାଞ୍ଜାକ୍ସନ୍ କରିବାର ସୀମା ନେଇ ଏକ ବଡ଼ ପରିବର୍ତ୍ତନ ଆସୁଛି । ଆସନ୍ତା ୧୫ ସେପ୍ଟେମ୍ବର, ୨୦୨୫ ରୁ କେତେକ ନିର୍ଦ୍ଦିଷ୍ଟ କାରବାର ପାଇଁ ଏହି ସୀମା ଯଥେଷ୍ଟ ବୃଦ୍ଧି କରାଯାଇଛି ।

ବର୍ତ୍ତମାନ ୟୁପିଆଇ ମାଧ୍ୟମରେ ଜଣେ ଉପଭୋକ୍ତା ଦିନେ ୧ ଲକ୍ଷ ଟଙ୍କା ପର୍ଯ୍ୟନ୍ତ ପଠାଇପାରନ୍ତି । ମାତ୍ର, ୧୫ ସେପ୍ଟେମ୍ବରଠାରୁ ଟିକସ ଦେୟ, ବୀମା ପ୍ରିମିୟମ, ଋଣର ଇଏମଆଇ, ଏବଂ ଷ୍ଟକ ବଜାରରେ ନିବେଶ ଭଳି ଜରୁରୀ ଓ ବଡ଼ ଦେୟଗୁଡ଼ିକ ପାଇଁ ଏହି ଦୈନିକ ସୀମା ବଢ଼ାଇ ପ୍ରତି ଟ୍ରାଞ୍ଜାକ୍ସନ୍ ପାଇଁ ୫ ଲକ୍ଷ ଟଙ୍କା ଏବଂ ଦୈନିକ ୧୦ ଲକ୍ଷ ଟଙ୍କା କରାଯାଇଛି ।

ୟୁପିଆଇ ସ୍ଥାନାନ୍ତରଣ ପରିଚାଳନା କରୁଥିବା ଏନପିସିଆଇ (NPCI) ଏହି ପରିବର୍ତ୍ତନ ଘୋଷଣା କରିଛି । ଏହି ବର୍ଷ ଆୟକର ଦେୟର ଶେଷ ତାରିଖ ୧୫ ସେପ୍ଟେମ୍ବର ହୋଇଥିବାରୁ, ଲୋକଙ୍କୁ ସୁବିଧା ଦେବାକୁ ଏହି ପଦକ୍ଷେପ ନିଆଯାଇଛି । ଏହାର ଫଳସ୍ୱରୂପ, ଯେଉଁମାନେ ୟୁପିଆଇ ମାଧ୍ୟମରେ ବଡ଼ ଅର୍ଥ ପଠାଇବାକୁ ଚାହୁଁଥିଲେ ମଧ୍ୟ ପୂର୍ବସୀମା ଯୋଗୁଁ ଅସୁବିଧା ହେଉଥିଲା, ସେମାନେ ବଡ଼ ପରିମାଣର ଦେୟ ସହଜରେ ଦେଇପାରିବେ ।