ଭୁବନେଶ୍ୱରରେ ନିର୍ମାଣ ହେବ ୨୦୦ କୋଟି ଟଙ୍କାର ବିପର୍ଯ୍ୟୟ ଭବନ
ଭୁବନେଶ୍ୱର (ସଂକେତ ଟିଭି): ରାଜ୍ୟରେ ବିପର୍ଯ୍ୟୟ ମୁକାବିଲା ପାଇଁ ଏକ ଅତ୍ୟାଧୁନିକ ବିପର୍ଯ୍ୟୟ ଭବନ ନିର୍ମାଣ କରାଯିବ । ଆସନ୍ତା ଦୁଇ ବର୍ଷ ମଧ୍ୟରେ ୨୦୦ କୋଟି ଟଙ୍କା ବ୍ୟୟରେ ଭୁବନେଶ୍ୱରର ସଚିବାଳୟ ନିକଟରେ ଏହି ଭବନ ତୈୟାରି ହେବ ବୋଲି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଜଣାଇଛନ୍ତି ।
ମନ୍ତ୍ରୀ କହିଛନ୍ତି ଯେ ପ୍ରାକୃତିକ ବିପର୍ଯ୍ୟୟ ସମୟରେ ପ୍ରଭାବିତ ହେଉଥିବା ସମସ୍ତ ସଂସ୍ଥାଙ୍କୁ ଗୋଟିଏ ଛାତ ତଳେ ଆଣିବା ଏହି ଭବନର ମୁଖ୍ୟ ଉଦ୍ଦେଶ୍ୟ । ଏଥିପାଇଁ ଏକ ମଲ୍ଟି-ଷ୍ଟୋରି ଭୂଗର୍ଭ କୋଠା ନିର୍ମାଣ କରାଯିବ, ଯାହାକୁ ଓଡ଼ିଶା ଷ୍ଟେଟ୍ ଦୁର୍ଘଟଣା ପ୍ରତିକ୍ରିୟା ବାହିନୀ (ଓଏସଡିଆରଏଫ୍), ଅଗ୍ନିଶମ ବିଭାଗ, ପାଣିପାଗ ବିଭାଗ ଏବଂ ଅନ୍ୟାନ୍ୟ ସମ୍ବନ୍ଧିତ ସଂସ୍ଥାମାନେ ବ୍ୟବହାର କରିବେ । ଏହି ସମସ୍ତ ବିଭାଗ ପରସ୍ପର ସହଯୋଗରେ କାର୍ଯ୍ୟ କରିବେ ଏବଂ ବିପର୍ଯ୍ୟୟ ପରିଚାଳନା ଅଧିକ ଫଳପ୍ରଦ ହେବ ।
ଏହି ଭବନରୁ ରାଜ୍ୟର ସମସ୍ତ ଜିଲ୍ଲାକୁ ସଂଯୋଗ କରିବାର ବ୍ୟବସ୍ଥା ରହିବ । ମନ୍ତ୍ରୀ ଆଗକୁ କହିଛନ୍ତି ଯେ ପ୍ରାକୃତିକ ବିପର୍ଯ୍ୟୟ ସମୟରେ ଆଗୁଆ ପ୍ରସ୍ତୁତି ଆବଶ୍ୟକ । ଏଥିସହିତ କେନ୍ଦ୍ର ଗୃହମନ୍ତ୍ରୀଙ୍କ ସହ ଆଲୋଚନା କରି ବିପର୍ଯ୍ୟୟ ମୁକାବିଲା ପାଇଁ ଆଧୁନିକ ପ୍ରଯୁକ୍ତି ବିଦ୍ୟାର ସାହାଯ୍ୟ ମଧ୍ୟ ନିଆଯାଇଛି । ଭୁବନେଶ୍ୱରରେ ଏକ ଅତ୍ୟାଧୁନିକ ବିପର୍ଯ୍ୟୟ ପ୍ରଶମନ କାର୍ଯ୍ୟାଳୟ ଖୋଲିବା ପାଇଁ ମଧ୍ୟ ପ୍ରସ୍ତୁତି ସମାପ୍ତ ହୋଇସାରିଛି ।
