ଓଡିଶାରେ ଖୋଲାଯିବ ୬ ଟି ନୂତନ ଟେକ୍ସଟାଇଲ ପାର୍କ, ସୃଷ୍ଟି ହେବ ୫୩ ହଜାର ନିଯୁକ୍ତି

ଭୁବନେଶ୍ବର (ସଂକେତ ଟିଭି): ଓଡ଼ିଶା ଟେକ୍ସଟାଇଲ କ୍ଷେତ୍ରରେ ଏକ ପ୍ରମୁଖ ହବ୍ ଭାବରେ ଗଠିତ ହେବାକୁ ଯାଉଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି ଯେ ରାଜ୍ୟରେ ୭,୮୦୮ କୋଟି ଟଙ୍କାର ୩୩ଟି ଏମଓୟୁ ସ୍ବାକ୍ଷରିତ ହୋଇଛି, ଯାହାଦ୍ୱାରା ୫୩ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ। ଭବିଷ୍ୟତରେ ଟେକ୍ସଟାଇଲ କ୍ଷେତ୍ରରେ ଆହୁରି ୫ ଲକ୍ଷ ଚାକିରି ସୃଷ୍ଟି ହେବ ଏବଂ ୫ଟି ଅତିରିକ୍ତ ଟେକ୍ସଟାଇଲ ପାର୍କ ଖୋଲାଯିବ।

ନୂତନ ଟେକ୍ସଟାଇଲ ପାର୍କ: ମୁଖ୍ୟମନ୍ତ୍ରୀ ଆଜି ରାଜ୍ୟର ୬ଟି ଜିଲ୍ଲା (ବଲାଙ୍ଗୀର, ଜଗତସିଂହପୁର, କେନ୍ଦୁଝର, ସମ୍ବଲପୁର, କଟକ ଓ ଗଞ୍ଜାମ)ରେ ଟେକ୍ସଟାଇଲ ପାର୍କଗୁଡ଼ିକର ଉଦଘାଟନ କରିଛନ୍ତି। ଏହି ପାର୍କଗୁଡ଼ିକରେ ୨୫ ହଜାର ଲୋକଙ୍କୁ ରୋଜଗାର ମିଳିବ।

ଓଡ଼ିଶା ଟେକ୍ସ ୨୦୨୫ ଉତ୍ସବରେ ମୁଖ୍ୟମନ୍ତ୍ରୀ ସରକାରୀ କର୍ମଚାରୀଙ୍କୁ ସପ୍ତାହରେ ଗୋଟିଏ ଦିନ ଓଡ଼ିଶାର ବୁଣାକାରଙ୍କ ଦ୍ୱାରା ପ୍ରସ୍ତୁତ ପୋଷାକ ପିନ୍ଧିବାକୁ ଏବଂ ଜୀବନରେ ଅତିକମରେ ଥରେ ହାତବୁଣା ବସ୍ତ୍ର କିଣିବାକୁ ଅନୁରୋଧ କରିଛନ୍ତି।

ରାଜ୍ୟ ସରକାର ବୁଣାକାର ଶ୍ରମିକଙ୍କ ଭତ୍ତା ବୃଦ୍ଧି କରିଛନ୍ତି। ପୁରୁଷ କର୍ମଚାରୀଙ୍କ ଭତ୍ତା ୫,୦୦୦ରୁ ୬,୦୦୦ ଟଙ୍କା ଏବଂ ମହିଳାଙ୍କୁ ୬,୦୦୦ରୁ ୭,୦୦୦ ଟଙ୍କା କରାଯାଇଛି। ପ୍ରତିବର୍ଷ ଓଡ଼ିଶା ଟେକ୍ସ କନକ୍ଳେଭ ଆୟୋଜିତ ହେବ।

ଉତ୍କର୍ଷ ଓଡ଼ିଶା ୨୦୨୫ରେ ପ୍ରତିଶ୍ରୁତିପ୍ରାପ୍ତ ନିବେଶରୁ ୪୮ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ହୋଇସାରିଛି। ୫୮ଟି ପ୍ରକଳ୍ପ କାର୍ଯ୍ୟାନୁଷ୍ଠାନରେ ଅଛି ଏବଂ ଗତ ୬ ମାସରେ ୧ ଲକ୍ଷ ୭୮ ହଜାର କୋଟି ଟଙ୍କାର ପ୍ରକଳ୍ପ ଆରମ୍ଭ ହୋଇଛି, ଯାହାଦ୍ୱାରା ୧ ଲକ୍ଷ ୧୧ ହଜାର ଚାକିରି ସୃଷ୍ଟି ହେବ।

କର୍ମଜୀବୀ ହଷ୍ଟେଲ ଉଦଘାଟନ: ଖୋର୍ଦ୍ଧାରେ ୧,୦୦୦ ବେଡ୍ ବିଶିଷ୍ଟ ଏକ କର୍ମଜୀବୀ ହଷ୍ଟେଲର ଉଦଘାଟନ କରାଯାଇଛି, ଯାହା ଶ୍ରମିକଙ୍କୁ ସୁବିଧା ପ୍ରଦାନ କରିବ।