ଶିକ୍ଷକ ବଦଳି ନୀତି ନେଇ ସରକାରକୁ ନୋଟିସ୍ କଲେ ହାଇକୋର୍ଟ

କଟକ (ସଂକେତ ଟିଭି): ବିଧାୟକ ଓ ସାଂସଦମାନେ ନିଜ ନିର୍ବାଚନ ମଣ୍ଡଳୀର ୧୫ ଜଣ ଯୋଗ୍ୟ ଶିକ୍ଷକଙ୍କ ବଦଳି ପାଇଁ ସୁପାରିସ କରିବା ବିଷୟକ ସରକାରୀ ନୀତି ହାଇକୋର୍ଟରେ ଚାଲିଛି। କଳାହାଣ୍ଡି ଜିଲ୍ଲାର ଦୁଇ ଜଣ ଶିକ୍ଷକ ଏହି ନୀତିକୁ ଚାଲେଞ୍ଜ କରି ହାଇକୋର୍ଟରେ ମାମଲା ଦାଖଲ କରିଛନ୍ତି। ସେମାନଙ୍କ ଅଭିଯୋଗ ଅନୁସାରେ, ଏପରି ନୀତି ଶିକ୍ଷକମାନଙ୍କ ବଦଳି ପ୍ରକ୍ରିୟାକୁ ଅନୁଚିତ ଭାବେ ପ୍ରଭାବିତ କରୁଛି।

ଜଷ୍ଟିସ୍ ଦୀକ୍ଷିତ କୃଷ୍ଣ ଶ୍ରୀପଦଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ରାଜ୍ୟ ସରକାରଙ୍କୁ ନୋଟିସ୍ ଜାରି କରିଛନ୍ତି। ଏଥିସହିତ, ଆବେଦନକାରୀ ଶିକ୍ଷକଙ୍କ ବଦଳି ଉପରେ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଅସ୍ଥାୟୀ ରୋକ ଲଗାଇବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ୪ ସପ୍ତାହ ପରେ ହେବ ବୋଲି ନିଷ୍ପତ୍ତି ନିଆଯାଇଛି।

ଆବେଦନକାରୀଙ୍କ ତରଫରୁ ଯୁକ୍ତି ଦର୍ଶାଯାଇଛି ଯେ, ସରକାରଙ୍କ ଏହି ନୀତି ଶିକ୍ଷକଙ୍କ ବଦଳି ପ୍ରକ୍ରିୟାକୁ ରାଜନୈତିକ ଭାବେ ପ୍ରଭାବିତ କରୁଛି। ସେମାନେ ଦାବି କରିଛନ୍ତି ଯେ ସରକାରଙ୍କ ପାଖରେ ଏପରି ନୀତି ପ୍ରଣୟନ କରିବାର କ୍ଷମତା ନାହିଁ ଏବଂ ଏହା ଯୁକ୍ତିଯୁକ୍ତ ମଧ୍ୟ ନୁହେଁ। ଗତ ମେ’ ୧୩ ତାରିଖରେ ବିଦ୍ୟାଳୟ ଓ ଗଣଶିକ୍ଷା ବିଭାଗର ଯୁଗ୍ମ ସଚିବ ଏହି ନୀତି ସମ୍ପର୍କରେ ପ୍ରାଥମିକ ଓ ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କୁ ପତ୍ର ଜାରି କରିଥିଲେ। ଏହି ପତ୍ର ଆଧାରରେ ବଦଳି ନିର୍ଦ୍ଦେଶ ଜାରି ହୋଇଥିବାରୁ ଆବେଦନକାରୀମାନେ ପ୍ରଭାବିତ ହୋଇଛନ୍ତି।

ଉଲ୍ଲେଖ୍ୟ ଯେ, ସରକାର ପୂର୍ବରୁ ଘୋଷଣା କରିଥିଲେ ଯେ ପ୍ରତ୍ୟେକ ସାଂସଦ ଓ ବିଧାୟକ ନିଜ ନିର୍ବାଚନ ମଣ୍ଡଳୀରୁ ୧୫ ଜଣ ଶିକ୍ଷକଙ୍କ ବଦଳି ପାଇଁ ସୁପାରିସ କରିପାରିବେ। ଏହି ପ୍ରସ୍ତାବଗୁଡ଼ିକ ଜିଲ୍ଲାପାଳଙ୍କ ନିକଟରେ ଦାଖଲ ହେବା ପରେ ଜିଲ୍ଲା ସ୍ତରୀୟ ବଦଳି କମିଟି ସମାନ ଦିନରେ ନିଷ୍ପତ୍ତି ନେବେ ବୋଲି କୁହାଯାଇଥିଲା। ଗଣଶିକ୍ଷା ବିଭାଗ ଏହି ନିର୍ଦ୍ଦେଶ ମେ’ ୧୩ରେ ଜାରି କରିଥିଲା। ଏହି ବିବାଦ ବର୍ତ୍ତମାନ ନ୍ୟାୟାଳୟରେ ବିଚାରାଧୀନ ଅଛି।