ଶୀଘ୍ର ଭାରତ ଆସିବେ ରୁଷ ରାଷ୍ଟ୍ରପତି ପୁଟିନ୍

ନୂଆଦିଲ୍ଲୀ (ସଂକେତ ଟିଭି): ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଶୀଘ୍ର ଭାରତ ଆସିବେ ବୋଲି ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍ ଘୋଷଣା କରିଛନ୍ତି। ଆମେରିକା ସହ ଭାରତର ସମ୍ପର୍କ ଦିନକୁ ଦିନ ଖରାପ ହେଉଥିବା ପରିପ୍ରେକ୍ଷୀରେ ଏହି ଭ୍ରମଣ ଗୁରୁତ୍ୱପୂର୍ଣ୍ଣ ବିବେଚିତ ହେଉଛି। ରୁଷ ସହ ତେଲ କାରବାର କରୁଥିବାରୁ ଭାରତ ଉପରେ ଆମେରିକା ଅତିରିକ୍ତ ଶୁଳ୍କ ଆରୋପ କରିଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ପଣ୍ୟଦ୍ରବ୍ୟ ଉପରେ ପୂର୍ବରୁ ଲାଗୁ କରାଯାଇଥିବା ୨୫% ଶୁଳ୍କ ସହ ଅତିରିକ୍ତ ୨୫% ଶୁଳ୍କ ଯୋଗ କରିଛନ୍ତି। ଫଳସ୍ୱରୂପ, ଭାରତୀୟ ପଣ୍ୟଦ୍ରବ୍ୟ ଉପରେ ମୋଟ ଶୁଳ୍କ ବୃଦ୍ଧି ପାଇ ୫୦% ହୋଇଛି। ଏହି ପରିସ୍ଥିତିରେ ଭାରତ ଚିନ୍ତିତ ହୋଇଛି ଏବଂ ରୁଷ ସହ ରଣନୀତିକ ସହଯୋଗ ବୃଦ୍ଧି କରିବା ପାଇଁ ପ୍ରସ୍ତୁତି ଚାଲିଛି।

ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍ କହିଛନ୍ତି, “ଆମ ଭିତରେ ଏକ ବିଶେଷ, ଦୀର୍ଘ ଦିନର ସମ୍ପର୍କ ରହିଛି ଏବଂ ଆମେ ଏହି ସମ୍ପର୍କର ଗୁରୁତ୍ଵ ବୁଝିଛୁ। ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତ ବିଷୟରେ ଜାଣିବାକୁ ପାଇ ଆମେ ବହୁତ ଉତ୍ସାହିତ। ତାଙ୍କ ଆଗମନର ତାରିଖ ପ୍ରାୟ ଚୂଡାନ୍ତ ହୋଇସାରିଛି।”

ଟ୍ରମ୍ପ ପ୍ରଶାସନ ଚୀନକୁ ୯୦ ଦିନର ସମୟ ଦେଇଥିବା ବେଳେ ଭାରତକୁ ମାତ୍ର ୩ ସପ୍ତାହର ସୁଯୋଗ ଦେଇଛି। ଯଦିଓ ଚୀନ ରୁଷରୁ ଭାରତ ଅପେକ୍ଷା ଅଧିକ ତେଲ ଆମଦାନୀ କରୁଛି, ତଥାପି ଆମେରିକା ଭାରତ ଉପରେ ବେଳେବେଳେ ଦବାବ ସୃଷ୍ଟି କରୁଛି। ଭାରତ ଆମେରିକା ଏବଂ ରୁଷ ଉଭୟଙ୍କଠାରୁ ୟୁରାନିୟମ୍, ପାଲାଡିୟମ୍ ଭଳି ଜରୁରୀ ସାମଗ୍ରୀ ଆମଦାନୀ କରେ, କିନ୍ତୁ ଏହା ସତ୍ତ୍ୱେ ଆମେରିକା ଭାରତ ପ୍ରତି କଠୋର ନୀତି ଅବଲମ୍ବନ କରୁଛି।

ଏହି ପରିସ୍ଥିତିରେ ପୁଟିନଙ୍କ ଭାରତ ଗସ୍ତ ଦ୍ୱିପକ୍ଷୀୟ ସମ୍ପର୍କକୁ ଆହୁରି ମଜଭୁତ କରିବ ବୋଲି ଆଶା କରାଯାଉଛି। ଭାରତ ଏବେ ରୁଷ ସହ ରଣନୀତିକ, ଅର୍ଥନୈତିକ ଏବଂ ପ୍ରଯୁକ୍ତିକ ସହଯୋଗ ବୃଦ୍ଧି କରିବା ଉପରେ ଗୁରୁତ୍ଵ ଦେଉଛି।