କେନ୍ଦ୍ର ସରକାରଙ୍କ କର୍ମଚାରୀଙ୍କ ନୂଆ ବେତନ ନୀତି: ଅଷ୍ଟମ ବେତନ କମିଶନ ଗଠିତ

ନୂଆଦିଲ୍ଲୀ (ସଂକେତ ଟିଭି): କେନ୍ଦ୍ର ସରକାରଙ୍କ କର୍ମଚାରୀ ଓ ପେନସନଭୋଗୀଙ୍କ ବେତନ ସଂଶୋଧନ ପାଇଁ ଅଷ୍ଟମ ବେତନ କମିଶନ ଗଠନ କରାଯାଇଛି । କ୍ୟାବିନେଟ୍ ଏହି କମିଶନ ଅଧୀନରେ ବିଚାର କରାଯିବାକୁ ଥିବା ପ୍ରସଙ୍ଗଗୁଡ଼ିକୁ ଅନୁମୋଦନ କରିଛି ।

ପୂର୍ବତନ ସୁପ୍ରିମକୋର୍ଟ ବିଚାରପତି ରଞ୍ଜନା ପ୍ରକାଶ ଦେସାଇଙ୍କୁ କମିଶନର ଅଧ୍ୟକ୍ଷା ଭାବରେ ନିଯୁକ୍ତି ଦିଆଯାଇଛି । ଆଇଆଇଏମ ବେଙ୍ଗାଲୁରୁର ପ୍ରଫେସର ପୁଲକ ଘୋଷ ଏବଂ ପେଟ୍ରୋଲିୟମ୍ ଗ୍ୟାସ୍ ସଚିବ ପଂକଜ ଜୈନ କମିଶନର ସଦସ୍ୟ ଭାବରେ କାର୍ଯ୍ୟ କରିବେ ।

ସୂଚନା ଏବଂ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଅଷ୍ଟମ ବେତନ କମିଶନ ତାଙ୍କର ସୁପାରିଶମାନ ୧୮ ମାସ ମଧ୍ୟରେ ଦାଖଲ କରିବେ । ଏହି ନୂତନ ବେତନ ବ୍ୟବସ୍ଥା ୧ ଜାନୁଆରୀ, ୨୦୨୬ରୁ ଲାଗୁ ହେବାର ସମ୍ଭାବନା ଅଛି । ଏହି ସୁପାରିଶ ପ୍ରତିରକ୍ଷା ସେବା କର୍ମଚାରୀଙ୍କ ସମେତ ପ୍ରାୟ ୫୦ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଏବଂ ୬.୯ ଲକ୍ଷ ପେନସନଭୋଗୀଙ୍କୁ ଆଚ୍ଛାଦିତ କରିବ ।

କମିଶନକୁ ଦିଆଯାଇଥିବା କାର୍ଯ୍ୟପଦ୍ଧତି (ଟର୍ମ ଅଫ୍ ରେଫରାନ୍ସ) ଅନୁଯାୟୀ, ସେମାନେ ନିଜ ସୁପାରିଶ ପ୍ରସ୍ତୁତ କରିବା ସମୟରେ ଦେଶର ଆର୍ଥିକ ସ୍ଥିତି, ବିତ୍ତୀୟ ଅନୁଶାସନର ଆବଶ୍ୟକତା, ବିକାଶ କାର୍ଯ୍ୟ ପାଇଁ ପର୍ଯ୍ୟାପ୍ତ ସଂସଧାନ ଉପଲବ୍ଧତା, ଅଣ-ଯୋଗଦାନ ଆଧାରିତ ପେନସନ ଯୋଜନାର ଖର୍ଚ୍ଚ, ରାଜ୍ୟ ସରକାରଙ୍କ ଉପରେ ପଡ଼ିବା ଆର୍ଥିକ ପ୍ରଭାବ, ଏବଂ ବେତନ, ଭତ୍ତା ଓ କାର୍ଯ୍ୟ ପରିସ୍ଥିତିର ତୁଳନାତ୍ମକ ଅଧ୍ୟୟନ ଉପରେ ଗୁରୁତ୍ୱ ଦେବେ ।