କେନ୍ଦୁପତ୍ର ଶ୍ରମିକଙ୍କ କଲ୍ୟାଣରେ ୪୧ କୋଟି ଟଙ୍କାର ପ୍ୟାକେଜ୍ ଘୋଷଣା କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର (ସଂକେତ ଟିଭି): ରାଜ୍ୟର କେନ୍ଦୁପତ୍ର ତୋଳାଳି, ବାଇଣ୍ଡର୍ ଏବଂ ଋତୁକାଳୀନ କର୍ମଚାରୀଙ୍କ ଜୀବିକା ଓ କାର୍ଯ୍ୟ ସ୍ଥିତି ଦୃଢ଼ କରିବା ଲକ୍ଷ୍ୟରେ ଓଡ଼ିଶା ସରକାର ଏକ ବୃହତ ଅର୍ଥନୈତିକ ପ୍ୟାକେଜ୍ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ କେନ୍ଦୁପତ୍ର କଲ୍ୟାଣ ପାଣ୍ଠିରୁ ୨୦୨୪ ଫସଲ ବର୍ଷ ଏବଂ ୨୦୨୫-୨୬ ଆର୍ଥିକ ବର୍ଷ ପାଇଁ ମୋଟ୍ ୪୧.୧୭ କୋଟି ଟଙ୍କା ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି।

ଏହି ପ୍ୟାକେଜ୍ ଅନ୍ତର୍ଗତ, ରାଜ୍ୟର ସମୁଦାୟ ୮,୫୯,୭୨୭ ଜଣ କେନ୍ଦୁପତ୍ର ତୋଳାଳିଙ୍କୁ କାର୍ଯ୍ୟରେ ସୁରକ୍ଷା ଓ ସୁବିଧା ପ୍ରଦାନ କରିବା ପାଇଁ ଚପଲ, କେରି ବହନକାରି କପଡ଼ା ଏବଂ ହେଡ୍ କ୍ୟାପ୍ ବିତରଣ କରାଯିବ। ଏଥିପାଇଁ ଚପଲ ପାଇଁ ପ୍ରତିଜଣକୁ ୧୬୦ ଟଙ୍କା, କେରି ବହନକାରି କପଡ଼ା ପାଇଁ ୨୦୦ ଟଙ୍କା ଏବଂ ହେଡ୍ କ୍ୟାପ୍ ପାଇଁ ୧୦୦ ଟଙ୍କା ହିସାବରେ ମୋଟ୍ ୩୯ କୋଟି ୫୪ ଲକ୍ଷ ୭୪ ହଜାର ୪୨୦ ଟଙ୍କା ବାଣ୍ଟିବାକୁ ଯୋଜନା କରାଯାଇଛି। ଏହି ପଦକ୍ଷେପକୁ କେନ୍ଦୁପତ୍ର ତୋଳାଳିଙ୍କ ଶ୍ରମ ଓ ମୂଲ୍ୟବାନ ଅବଦାନ ପ୍ରତି ସରକାରଙ୍କ ଗଭୀର ସମ୍ମାନ ବୋଲି ବିବେଚନା କରାଯାଉଛି।

ଏହା ବ୍ୟତୀତ, ରାଜ୍ୟର ୧୮,୭୬୮ ଜଣ ବାଇଣ୍ଡରଙ୍କୁ କମ୍ବଳ ଓ ମଶାରୀ କିଣିବା ପାଇଁ ପ୍ରତିଯୋଗୀକୁ ୟୁନିଟ୍ ପିଛା ୭୦୦ ଟଙ୍କା ହାରରେ ମୋଟ୍ ୧ କୋଟି ୩୧ ଲକ୍ଷ ୩୭ ହଜାର ୬୦୦ ଟଙ୍କା ପ୍ରଦାନ କରାଯିବ। ଆଉ ୧୬,୨୩୭ ଜଣ ଋତୁକାଳୀନ କର୍ମଚାରୀଙ୍କୁ ୟୁନିଟ୍ ପିଛା ୧୦୦ ଟଙ୍କା ହାରରେ ମୋଟ୍ ୧୬ ଲକ୍ଷ ୨୩ ହଜାର ୭୦୦ ଟଙ୍କା ଆର୍ଥିକ ସହାୟତା ଦିଆଯିବ।

ମୁଖ୍ୟମନ୍ତ୍ରୀଙ୍କ ଦୃଢ଼ ନେତୃତ୍ୱ ଏବଂ ଜଙ୍ଗଲ ଓ ପରିବେଶ, ଶ୍ରମ ଓ ରାଜ୍ୟ କର୍ମଚାରୀ ବୀମା ବିଭାଗର ମନ୍ତ୍ରୀ ଗଣେଶ ରାମ ସିଂହ ଖୁଣ୍ଟିଆଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଯୋଜନାଗୁଡ଼ିକ କାର୍ଯ୍ୟକାରୀ ହେବ। ଏହି ବୃହତ କଲ୍ୟାଣ ପ୍ୟାକେଜ୍ ରାଜ୍ୟର କେନ୍ଦୁପତ୍ର ଆଧାରିତ ଶ୍ରମଜୀବୀଙ୍କ ସୁବିଧା, ସୁରକ୍ଷା ଏବଂ ସାମାଜିକ ସମ୍ମାନକୁ ଏକ ନୂତନ ଉଚ୍ଚତାରେ ପହଞ୍ଚାଇବା ସହିତ ସେମାନଙ୍କ ଜୀବିକାକୁ ସମୃଦ୍ଧ କରିବାର ଲକ୍ଷ୍ୟ ରଖିଛି।