ଆଇପିଏସ୍ ସ୍ତରରେ ଅଦଳବଦଳ, ବଦଳିଲେ ବାଲେଶ୍ବର ଏସପି ଓ ଡିଆଇଜି

ଭୁବନେଶ୍ୱର (ସଂକେତ ଟିଭି): ରାଜ୍ୟ ସରକାର ଗୁରୁତ୍ୱପୂର୍ଣ୍ଣ ଆଇପିଏସ ସ୍ତରରେ ଅଦଳବଦଳ କରି ୧୮ ଜଣ ଆଇପିଏସ/ଓପିଏସ ଅଧିକାରୀଙ୍କୁ ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ଦେଇଛନ୍ତି। ଗୃହ ବିଭାଗ ରିଲିଜ୍ କରିଥିବା ଏକ ଅଧିସୂଚନାରେ ଏହି ନୂତନ ନିଯୁକ୍ତିକୁ ବିସ୍ତୃତ ଭାବେ ଉଲ୍ଲେଖ କରାଯାଇଛି।

ଏହି ବଦଳି ଅନୁଯାୟୀ, ଡଃ ସନ୍ତୋଷ ବାଲା (ଆଇପିଏସ, ୧୯୯୫ ବ୍ୟାଚ୍) ନିର୍ଦ୍ଦେଶକ, ଏସଏଫଏସଏଲ ଭାବେ ନିଯୁକ୍ତ ହୋଇଛନ୍ତି। ଶ୍ରୀ ପ୍ରବୀଣ କୁମାର (ଆଇପିଏସ, ୨୦୦୨ ବ୍ୟାଚ୍) ଆଇଜି ପୋଲିସ ପ୍ରୋଭିଜନିଂ ଭାବେ କାର୍ଯ୍ୟ କରିବେ। ଗଜଭିୟେ ସତୀଶ କୁମାର (ଆଇପିଏସ, ୨୦୦୨ ବ୍ୟାଚ୍) ଆଇଜି ସ୍ପେଶାଲ ଆର୍ମଡ ପୋଲିସ ଏବଂ ସଞ୍ଜୟ କୁମାର କୌଶଲ (ଆଇପିଏସ, ୨୦୦୩ ବ୍ୟାଚ୍) ଆଇଜି ଇକୋନୋମିକ୍ ଅଫେନ୍ସେସ ୱିଂ (EOW) ଭାବେ ବଦଳି ହୋଇଛନ୍ତି।

ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବଦଳିରେ, ଅବିନାଶ କୁମାର (ଆଇପିଏସ, ୨୦୦୭) ଷ୍ଟେଟ କ୍ରାଇମ ରେକର୍ଡ ବ୍ୟୁରୋର ନିର୍ଦ୍ଦେଶକ ହୋଇଛନ୍ତି। ଡଃ ସତ୍ୟଜିତ ନାୟକ (ଆଇପିଏସ, ୨୦୦୮) ଡିଆଇଜି ସେଣ୍ଟ୍ରାଲ ରେଞ୍ଜ ଏବଂ ପିନାକ ମିଶ୍ର (ଆଇପିଏସ, ୨୦୧୧) ଡିଆଇଜି ଇଷ୍ଟର୍ଣ୍ଣ ରେଞ୍ଜ ଭାବେ ନିଯୁକ୍ତ ହୋଇଛନ୍ତି।

ଜିଲ୍ଲା ସ୍ତରୀୟ ବଦଳିରେ, ପ୍ରତୀକ ସିଂ (ଆଇପିଏସ, ୨୦୧୪) ପୁରୀ ଏସପି, ଶ୍ରୀ ବିବେକାନନ୍ଦ ଶର୍ମା (ଆଇପିଏସ, ୨୦୧୪) ଖୋର୍ଦ୍ଧା ଏସପି ଏବଂ ପରମାର ସ୍ମିତ ପର୍ଶୋତ୍ତମ ଦାସ (ଆଇପିଏସ, ୨୦୧୩) ଏସପି କ୍ରାଇମବ୍ରାଞ୍ଚ ଭାବେ ନିଯୁକ୍ତି ପାଇଛନ୍ତି। ଗୁଣ୍ଡାଲା ରେଡ୍ଡୀ ରାଘବେନ୍ଦ୍ର (ଆଇପିଏସ, ୨୦୧୯) ଝାରସୁଗୁଡ଼ା ଏସପି ଏବଂ ଶ୍ରୀମତୀ ଅମୃତପାଲ କୌର (ଆଇପିଏସ, ୨୦୨୧) ସୁନ୍ଦରଗଡ଼ ଏସପି ଭାବେ ନିଯୁକ୍ତ ହୋଇଛନ୍ତି।

ଏହି ଆଦେଶର ନକଲ କେନ୍ଦ୍ର ଗୃହ ମନ୍ତ୍ରଣାଳୟ, ବରିଷ୍ଠ ପୋଲିସ ଅଧିକାରୀ ଏବଂ ଜିଲ୍ଲା ପ୍ରଶାସନଙ୍କୁ ପଠାଯାଇଛି ଏବଂ ଓଡ଼ିଶା ଗେଜେଟର ପରବର୍ତ୍ତୀ ସଂସ୍କରଣରେ ଏହାକୁ ପ୍ରକାଶ କରିବାକୁ ନିର୍ଦ୍ଦେଶ ଦିଆଯାଇଛି। ରାଜ୍ୟରେ ଆଇନ୍ ଶୃଙ୍ଖଳା ମଜଭୁତ କରିବା ଏବଂ କାର୍ଯ୍ୟକ୍ଷମତା ବୃଦ୍ଧି କରିବା ଉଦ୍ଦେଶ୍ୟରେ ଗ୍ରହଣ କରାଯାଇଥିବା ପ୍ରଶାସନିକ ରଣନୀତିର ଅଂଶ ଭାବରେ ଏହି ବଦଳିକୁ ଦେଖାଯାଉଛି।