ଶୁଳ୍କ ହଟାଇବା ପାଇଁ ଭାରତ ଆଗରେ ତିନୋଟି ସର୍ତ୍ତ ରଖିଲା ଆମେରିକା
ୱାସିଂଟନ (ସଂକେତ ଟିଭି): ଭାରତ ସହ ଆମେରିକା ଡବଲ୍ ଗେମ୍ ଖେଳୁଛି ବୋଲି ଏକ ବିଶ୍ଳେଷଣ ହେଉଛି। ଭାରତକୁ ଧମକ ଦେବାର ମାତ୍ର ୧୨ ଘଣ୍ଟା ଭିତରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଉଦାର ଆଭିମୁଖ୍ୟ ଗ୍ରହଣ କରିଛନ୍ତି। କିନ୍ତୁ ତାଙ୍କ ବାଣିଜ୍ୟମନ୍ତ୍ରୀ ହାଭାର୍ଡ ଲୁଟ୍ନିକ ଭାରତକୁ ଧମକ ଦେଇ ତିନୋଟି କଠୋର ସର୍ତ୍ତ ରଖିଛନ୍ତି।
ଲୁଟ୍ନିକ କହିଛନ୍ତି ଯେ ଭାରତ ଉପରୁ ଅତିରିକ୍ତ ୨୫ ପ୍ରତିଶତ ଶୁଳ୍କ ହଟାଇବା ପାଇଁ ଏହି ତିନୋଟି ସର୍ତ୍ତ ମାନିବା ଜରୁରୀ। ପ୍ରଥମତଃ, ଭାରତକୁ ରୁଷ୍ ତୈଳ କ୍ରୟ ବନ୍ଦ କରିବାକୁ ହେବ। ଦ୍ବିତୀୟତଃ, ଭାରତକୁ ବ୍ରିକ୍ସ ଗୋଷ୍ଠୀରୁ ଅଲଗା ହେବାକୁ ପଡ଼ିବ। ତୃତୀୟତଃ, ଆମେରିକାକୁ ସମର୍ଥନ ଦେବାକୁ ହେବ।
ଶୁକ୍ରବାର ବ୍ଲୁମ୍ବର୍ଗ ଟିଭିକୁ ଦିଆ ସାକ୍ଷାତକାରରେ ଲୁଟ୍ନିକ ଏହି ଟିପ୍ପଣୀ ଦେଇଥିଲେ। ଏଥିରୁ ଜଣାପଡୁଛି ଯେ ରାଷ୍ଟ୍ରପତି ଟ୍ରମ୍ପ ଏବଂ ତାଙ୍କ ମନ୍ତ୍ରୀଙ୍କ କଥା ଓ କାର୍ଯ୍ୟଧାରାରେ ଆକାଶ-ପାତାଳ ପାର୍ଥକ୍ୟ ରହିଛି। ଟ୍ରମ୍ପ ନିଜେ ଭାରତ ସହ ସମ୍ପର୍କ ସୁଧାରିବାକୁ ପ୍ରସ୍ତୁତ ଥିବା ବେଳେ, ତାଙ୍କ ମନ୍ତ୍ରୀ ଏହି ପ୍ରକ୍ରିୟାରେ ବାଧା ସୃଷ୍ଟି କରୁଛନ୍ତି।
ଲୁଟ୍ନିକ ସ୍ପଷ୍ଟ କରିଛନ୍ତି ଯେ ଯଦି ଭାରତ ରୁଷ୍ ଏବଂ ଚୀନ୍ ମଧ୍ୟରେ ସେତୁ ଭୂମିକା ଗ୍ରହଣ କରିବାକୁ ଚାହୁଁଛି, ତେବେ ତାହା ହେଉ। କିନ୍ତୁ ଭାରତକୁ ଡଲାରକୁ ସମର୍ଥନ କରିବାକୁ ହେବ କିମ୍ବା ଆମେରିକାକୁ ସମର୍ଥନ କରିବାକୁ ହେବ। ନୋଟ, ନୂଆଦିଲ୍ଲୀକୁ ନିଜର ସବୁଠାରୁ ବଡ଼ ଗ୍ରାହକକୁ ସମର୍ଥନ କରିବାକୁ ହେବ ନଚେତ୍ ୫୦ ପ୍ରତିଶତ ଶୁଳ୍କ ଦେବାକୁ ପଡ଼ିବ।
ଆମେରିକା ମନ୍ତ୍ରୀ ଆଶା ପ୍ରକାଶ କରିଛନ୍ତି ଯେ ଭାରତ ଖୁବ୍ ଶୀଘ୍ର ଆମେରିକା ସହ ଦ୍ଵିପାକ୍ଷିକ ବାଣିଜ୍ୟ ଆଲୋଚନାରେ ଯୋଗ ଦେବ। ଲୁଟ୍ନିକ କହିଛନ୍ତି ଯେ ଆମେରିକା ସର୍ବଦା ଆଲୋଚନା ପାଇଁ ପ୍ରସ୍ତୁତ ଅଛି। ଦୁଇ ଦେଶ ମଧ୍ୟରେ ବାଣିଜ୍ୟକୁ ନେଇ ବିବାଦ ରହିଛି ସତ, କିନ୍ତୁ ମାସେ ଦୁଇ ମାସ ଭିତରେ ଭାରତ କ୍ଷମା ମାଗି ଟ୍ରମ୍ପଙ୍କ ସହ ଆଲୋଚନା ପାଇଁ ଟେବୁଲକୁ ଆସିବ।
ସେ ଆହୁରି ମଧ୍ୟ ଦାବି କରିଛନ୍ତି ଯେ ଟ୍ରମ୍ପଙ୍କ ସହ ନୂଆ ଚୁକ୍ତି କରିବା ପାଇଁ ଭାରତ ପ୍ରୟାସ କରିବ ଏବଂ ଏହି ଚୁକ୍ତି ଟ୍ରମ୍ପଙ୍କ ସର୍ତ୍ତରେ ହିଁ ହେବ। ଲୁଟନିକ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାକୁ ଚୂଡ଼ାନ୍ତ ରୂପ ଦେବେ।
