ଭୁବନେଶ୍ୱରରେ ଅଳିଆରୁ ବିଦ୍ୟୁତ ଓ କୋଇଲା ପ୍ରସ୍ତୁତ ପାଇଁ ସ୍ଥାପନ ହେବ ପ୍ଲାଣ୍ଟ : ମୁଖ୍ୟମନ୍ତ୍ରୀ

ଭୁବନେଶ୍ୱର (ସଂକେତ ଟିଭି): ରାଜଧାନୀ ଭୁବନେଶ୍ୱରର ବୃଦ୍ଧିପାଉଥିବା ଅଳିଆ ସମସ୍ୟାର ସମାଧାନ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେବାକୁ ଯାଉଛି ରାଜ୍ୟ ସରକାର । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଘୋଷଣା କରିଛନ୍ତି ଯେ ଅଳିଆରୁ ବିଜୁଳି ଏବଂ କୋଇଲା (ଚାରକୋଲ) ପ୍ରସ୍ତୁତ କରିବା ପାଇଁ ପ୍ଲାଣ୍ଟ ସ୍ଥାପନ କରାଯିବ । ବିଏମସି ପକ୍ଷରୁ ପୁରୁଣା ଭୁବନେଶ୍ୱରରେ ଆୟୋଜିତ ଏକ ସ୍ୱଚ୍ଛତା କାର୍ଯ୍ୟକ୍ରମରେ ଯୋଗ ଦେଇ ସେ ଏହି ସୂଚନା ଦେଇଥିଲେ ।

ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟ ସରକାରଙ୍କ ଗୃହ ଏବଂ ନଗର ଉନ୍ନୟନ ବିଭାଗ ଏହି ଦିଗରେ କାର୍ଯ୍ୟ କରୁଛି । ସେ ଏଥିସହ କୁହନ୍ତି ଯେ ସ୍ୱଚ୍ଛ ସର୍ବେକ୍ଷଣରେ ଭୁବନେଶ୍ୱରକୁ ଉତ୍କୃଷ୍ଟ ମାନ୍ୟତା ମିଳିବା ପାଇଁ ଭୁବନେଶ୍ୱର ମହାନଗର ନିଗମକୁ ଆହୁରି ତତ୍ପର ହୋଇ କାମ କରିବାକୁ ହେବ ।

ଭୁବନେଶ୍ୱର କର୍ପୋରେସନ ଅଞ୍ଚଳରୁ ପ୍ରତିଦିନ ପ୍ରାୟ ୮୦୦ ଟନ ଅଳିଆ ବାହାରୁଛି, ଯାହାର ୪୦୦ ଟନ ଓଦା ଏବଂ ୩୯୦ ଟନ ଶୁଖିଲା ଅଳିଆ । ଏହି ଅଳିଆକୁ ବିଭିନ୍ନ ଉପାୟରେ ପରିଚାଳନା କରିବା ପାଇଁ ସ୍ୱୟଂ ସହାୟକ ଗୋଷ୍ଠୀ (SHG) ମାନଙ୍କୁ ପ୍ରଶିକ୍ଷଣ ଦିଆଯାଇଛି । ଭୁବନେଶ୍ୱର ମହାନଗର ନିଗମ ବର୍ତ୍ତମାନ ଅଳିଆରୁ ଶକ୍ତି ଉତ୍ପାଦନ ପ୍ଲାଣ୍ଟ (Waste to Energy Plant), ବାୟୋଗ୍ୟାସ କମ୍ପୋଷ୍ଟିଙ୍ଗ ପ୍ଲାଣ୍ଟ, ଏବଂ ଅଳିଆରୁ କୋଇଲା/ଇଟା ପ୍ଲାଣ୍ଟ (Waste to Briquette/Charcoal Plant) ସ୍ଥାପନ କରିବା ପାଇଁ ଚିନ୍ତା କରୁଛି ।

ବାୟୋଗ୍ୟାସ କମ୍ପୋଷ୍ଟିଙ୍ଗ ପ୍ଲାଣ୍ଟ ପାଇଁ ଟେଣ୍ଡର ପ୍ରକ୍ରିୟା ସମାପ୍ତ ହୋଇସାରିଛି । ଅଳିଆରୁ କୋଇଲା ପ୍ଲାଣ୍ଟ ପାଇଁ ପ୍ରାରମ୍ଭିକ ଆଲୋଚନା ସମାପ୍ତ ହୋଇଛି ଏବଂ ପଳାଶୁଣୀରେ ଜାଗା ଚିହ୍ନଟ କରାଯାଇଛି । ଆର୍ଥିକ ସମସ୍ୟା ସମାଧାନ ହେଲେ ନିଷ୍ପତ୍ତି ହେବାର ୬ ମାସ ମଧ୍ୟରେ ଏହି ପ୍ଲାଣ୍ଟର କାମ ସାରିବା ଲକ୍ଷ୍ୟ ରଖାଯାଇଛି । ଅଳିଆରୁ ବିଜୁଳି ପ୍ଲାଣ୍ଟ ଏକ ବୃହତ୍ କାର୍ଯ୍ୟ, ଯାହାକୁ ନେଇ ବିଶେଷଜ୍ଞ ଏବଂ ପରାମର୍ଶଦାତାଙ୍କ ସହ ଆଲୋଚନା ଚାଲିଛି ।

ରାଜ୍ୟ ସରକାରଙ୍କ ଯୋଜନା ଅନୁଯାୟୀ, ଭୁବନେଶ୍ୱର, କଟକ, ପୁରୀ, ଜଟଣୀ ଆଦି ପ୍ରମୁଖ ନଗରୀଗୁଡ଼ିକରୁ ବାହାରୁଥିବା ଅଳିଆକୁ ଗୋଟିଏ କେନ୍ଦ୍ରୀୟ ସ୍ଥାନରେ ପ୍ରକ୍ରିୟାକରଣ କରାଯିବ । ଏହି ପ୍ରକଳ୍ପର ବିସ୍ତୃତ ପ୍ରକଳ୍ପ ପ୍ରତିବେଦନ (DPR) ପ୍ରସ୍ତୁତି କାର୍ଯ୍ୟ ଚାଲିଛି । ଏହି ପ୍ଲାଣ୍ଟରେ ପ୍ରତିଦିନ ୧,୦୦୦ରୁ ୨,୦୦୦ ଟନ ଅଳିଆ ପ୍ରକ୍ରିୟାକରଣ କରି ୨୫ ମେଗାୱାଟ୍ ବିଜୁଳି ଉତ୍ପାଦନ କରାଯାଇପାରିବ । ଭବିଷ୍ୟତରେ ଯେଉଁ ସବୁ ଅଞ୍ଚଳ ପଞ୍ଚାୟତରୁ ନଗର ପାଲିକା ଭାବରେ ଉନ୍ନୀତ ହେବ, ସେଠାର ଅଳିଆକୁ ମଧ୍ୟ ଏହି ଯୋଜନାରେ ଅନ୍ତର୍ଭୁକ୍ତ କରାଯିବାର ପରିକଳ୍ପନା ରହିଛି ।