‘ଭିବି-ଜି ରାମ ଜି’ ବିଲ୍ ଉପରେ ପ୍ରାୟ ୧୪ ଘଣ୍ଟା ଧରି ବିତର୍କ

ନୂଆଦିଲ୍ଲୀ (ସଂକେତ ଟିଭି): ଲୋକସଭାରେ ଗତକାଲି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ରୋଜଗାର ଗାରେଣ୍ଟି ଆଇନ୍ (ମନରେଗା)ର ସ୍ଥାନ ନେବାକୁ ଆସିଥିବା ନୂତନ ବିଲ୍ ଉପସ୍ଥାପିତ ହୋଇଛି । କୃଷିମନ୍ତ୍ରୀ ଶିବରାଜ ସିଂ ଚୌହାନ ଉପସ୍ଥାପନ କରିଥିବା ଏହି ବିଲ୍ଟି ‘ବିକଶିତ ଭାରତ-ଗ୍ୟାରେଣ୍ଟି ଫର୍ ରୋଜଗାର ଆଣ୍ଡ୍ ଆଜୀବିକା ମିଶନ (ଗ୍ରାମୀଣ) ବିଲ୍, ୨୦୨୫’ ବା ସାଧାରଣ ଭାଷାରେ ‘ଭିବି-ଜି ରାମ ଜି’ ବିଲ୍ ଭାବେ ନାମିତ । ଏହି ବିଲ୍କୁ କଂଗ୍ରେସ ଏବଂ ଟିଏମ୍ସି ଦଳ ତୀବ୍ର ବିରୋଧ କରିଛନ୍ତି ।

ଲୋକସଭାର ଶୀତ ଅଧିବେଶନର ୧୪ତମ ଦିନରେ ଏହି ବିଲ୍ ଉପରେ ପ୍ରାୟ ୧୪ ଘଣ୍ଟା ଧରି ବିତର୍କ ହୋଇଥିଲା, ଯାହାକୁ ୯୮ ଜଣ ସଂସଦ ସଦସ୍ୟ ଉପସ୍ଥିତ ରହି ଭାଗ ନେଇଥିଲେ । ବିତର୍କ ରାତି ୧.୩୫ ପର୍ଯ୍ୟନ୍ତ ଚାଲିଥିଲା ଏବଂ ସଂସଦ ଭିତରେ ସରକାର ଓ ବିରୋଧୀ ଦଳ ମଧ୍ୟରେ ତୀବ୍ର ମୁଖାମୁଖି ହୋଇଥିଲା । ବିରୋଧ ସ୍ୱରୂପ, କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ଏକ ପ୍ରତିବାଦ ଶୋଭାଯାତ୍ରା କରିଥିଲେ ।

ପ୍ରିୟଙ୍କା ଗାନ୍ଧୀ ଦାବୀ କରିଛନ୍ତି ଯେ ସରକାର ଯୋଜନାର ନାମ ପରିବର୍ତ୍ତନର ଆଡମ୍ବରରେ ମୂଳ ମନରେଗା ଆଇନ୍କୁ ବାତିଲ କରିବାକୁ ଚାହୁଛନ୍ତି । ତାଙ୍କ ମତରେ, ଏହି ନୂଆ ବିଲ୍ ଗ୍ରାମୀଣ ଶ୍ରମିକଙ୍କ କାମ କରିବାର ଅଧିକାରକୁ ଦୁର୍ବଳ କରିବ ଏବଂ ଏହା ସମ୍ବିଧାନ ବିରୋଧୀ । ମନରେଗା ମାଧ୍ୟମରେ ଗ୍ରାମାଞ୍ଚଳର ଲୋକମାନଙ୍କୁ ସରକାରଙ୍କ ତରଫରୁ ବାର୍ଷିକ ୧୦୦ ଦିନର କାମ ଯୋଗାଇବାର ବ୍ୟବସ୍ଥା ରହିଥିଲା ।

ନୂଆ ବିଲ୍ ମାଧ୍ୟମରେ ଏହି ଯୋଜନାର କେବଳ ନାମ ନୁହେଁ, ବରଂ ଅନେକ ନିୟମ ମଧ୍ୟ ବଦଳିବାର ଯୋଜନା ଅଛି । ସରକାର କହୁଛନ୍ତି ଯେ “ବିକଶିତ ଭାରତ ୨୦୪୭”ର ରାଷ୍ଟ୍ରୀୟ ଦୃଷ୍ଟିକୋଣ ଅନୁଯାୟୀ ଏହା ଗ୍ରାମୀଣ ବିକାଶର ଏକ ନୂତନ ଢାଞ୍ଚା ପ୍ରସ୍ତୁତ କରିବ । ନୂତନ ବିଲ୍ ଅନୁଯାୟୀ ଗ୍ରାମାଞ୍ଚଳ ଲୋକଙ୍କ ପାଇଁ ୧୦୦ ଦିନରୁ ଅଧିକ ଦିନ କାମ ମିଳିବା ଏବଂ ପୂର୍ବ ଅପେକ୍ଷା ଶୀଘ୍ର ଶ୍ରମିକଙ୍କ ଖାତାକୁ ମଜୁରି ପହଞ୍ଚିବାର ବ୍ୟବସ୍ଥା ରହିବ ।

ଆର୍ଥିକ ଦାନଦେଣର ଢାଞ୍ଚାରେ ମଧ୍ୟ ପରିବର୍ତ୍ତନ ହେବାର ଯୋଜନା ଅଛି । ପୂର୍ବରୁ ଏହି ଯୋଜନାର ସମ୍ପୂର୍ଣ୍ଣ ଅର୍ଥଭାର କେନ୍ଦ୍ର ସରକାର ବହନ କରୁଥିବା ବେଳେ, ନୂଆ ନିୟମ ଅନୁଯାୟୀ କିଛି ଅର୍ଥ ରାଜ୍ୟ ସରକାରଙ୍କୁ ମଧ୍ୟ ଦେବାକୁ ପଡିବ । ଏହି କାରଣରୁ ରାଜ୍ୟ ସରକାରଙ୍କ ଉପରେ ଅତିରିକ୍ତ ଆର୍ଥିକ ବୋଝ ପଡିବ ବୋଲି ଆଶଙ୍କା ରହିଛି ।