ସିଙ୍ଗଲ୍ ୱିଣ୍ଡୋରେ ମଞ୍ଜୁରୀ: ୧,୩୩୩ କୋଟି ନିବେଶ, ୭,୪୦୦ରୁ ଅଧିକ ଚାକିରି ସୃଷ୍ଟି

ଭୁବନେଶ୍ୱର (ସଂକେତ ଟିଭି): ଶିଳ୍ପ ବିକାଶ ଓ ନିଯୁକ୍ତି ସୃଷ୍ଟି ଲକ୍ଷ୍ୟରେ ରାଜ୍ୟ ସରକାର ସିଙ୍ଗଲ୍ ୱିଣ୍ଡୋ ସଂପୃକ୍ତି ପ୍ରଣାଳୀ ଅଧୀନରେ ୧,୩୩୩ କୋଟି ଟଙ୍କାରୁ ଅଧିକ ନିବେଶକୁ ଅନୁମୋଦନ କରିଛନ୍ତି। ଏହା ଫଳରେ ରାଜ୍ୟରେ ୭,୪୦୦ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ।

ଲୋକସେବା ଭବନରେ ଅନୁଷ୍ଠିତ ରାଜ୍ୟ ସ୍ତରୀୟ ସିଙ୍ଗଲ୍ ୱିଣ୍ଡୋ ସଂପୃକ୍ତି ପ୍ରାଧିକରଣର (SLSWCA) ୧୪୩ତମ ବୈଠକରେ ଏହି ନିଷ୍ପତ୍ତି ଗୃହୀତ ହୋଇଛି। ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ଦୂରଦୃଷ୍ଟିପୂର୍ଣ୍ଣ ନେତୃତ୍ୱରେ ଶିଳ୍ପ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଲକ୍ଷ୍ୟରେ ଏହି କାର୍ଯ୍ୟକ୍ରମ ଅଗ୍ରସର ହେଉଛି।

ମୁଖ୍ୟ ସଚିବ ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ୧୧ଟି ନିବେଶ ପ୍ରସ୍ତାବକୁ ଚୂଡ଼ାନ୍ତ ମଞ୍ଜୁରୀ ଦିଆଯାଇଛି। ଏହି ପ୍ରସ୍ତାବଗୁଡ଼ିକ ପ୍ରାୟ ୧,୩୩୨.୮୦ କୋଟି ଟଙ୍କାର ନିବେଶ ସହିତ ସାତଟି ଜିଲ୍ଲାରେ ୭,୪୭୪ଟି ଚାକିରି ସୃଷ୍ଟି କରିବ। ଏହି ଅନୁମୋଦନ ରାଜ୍ୟର ଶିଳ୍ପ ଇକୋସିଷ୍ଟମକୁ ସୁଦୃଢ଼ କରିବା ଏବଂ ନିଯୁକ୍ତି-କେନ୍ଦ୍ରିତ ଅର୍ଥନୈତିକ ଅଭିବୃଦ୍ଧିକୁ ଗତି ଦେବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିଭାଗୀୟ ସୂତ୍ରଗୁଡ଼ିକ ସୂଚନା ଦେଇଛନ୍ତି।