ବେଙ୍ଗାଲୁରୁରେ ଦଳାଚକଟା ପାଇଁ ଆରସିବି ଓ ବିରାଟ କୋହଲିଙ୍କୁ ଦାୟୀ କଲେ କର୍ଣ୍ଣାଟକ ସରକାର

ବେଙ୍ଗାଲୁରୁ (ସଂକେତ ଟିଭି): ଆଇପିଏଲ ଦଳ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)ର ବିଜୟ ଉତ୍ସବ ସମୟରେ ଘଟିଥିବା ଦଳାଚକଟା ଘଟଣା ସମ୍ପର୍କରେ କର୍ଣ୍ଣାଟକ ସରକାର ହାଇକୋର୍ଟରେ ଏକ ବିସ୍ତୃତ ରିପୋର୍ଟ ଦାଖଲ କରିଛନ୍ତି। ଏହି ରିପୋର୍ଟରେ ସରକାର ଆର୍ସିବିକୁ ଘଟଣା ପାଇଁ ସମ୍ପୂର୍ଣ୍ଣ ଦାୟୀ କରିଛନ୍ତି ଏବଂ ଦଳର ଅଭିଜ୍ଞ ଖେଳାଳି ଏବଂ ପୂର୍ବତନ ଅଧିନାୟକ ବିରାଟ କୋହଲିଙ୍କ ନାମ ମଧ୍ୟ ଉଲ୍ଲେଖ କରାଯାଇଛି।

ରିପୋର୍ଟ ଅନୁଯାୟୀ, ବିଜୟ ଉତ୍ସବ ପାଇଁ ଆର୍ସିବି କୌଣସି ଅନୁମତି ନେଇ ନଥିଲା ଏବଂ କେବଳ ସୂଚନା ଦେଇଥିଲା। ଜୁନ ୪ ତାରିଖରେ ଚିନ୍ନାସ୍ବାମୀ ଷ୍ଟାଡିୟମ ବାହାରେ ଦଳାଚକଟା ଘଟିଥିବା ପରେ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ ଆର୍ସିବିକୁ ଦାୟୀ କରିଥିଲେ। ଆର୍ସିବି ହଠାତ୍ ପୋଲିସ ଅନୁମତି ବିନା ସୋସିଆଲ ମିଡିଆରେ ବିଜୟ ପରେଡ ଆୟୋଜନ କରିବାକୁ ଘୋଷଣା କରିଥିଲା, ଯାହା ଫଳରେ ଲକ୍ଷ ଲକ୍ଷ ପ୍ରଶଂସକ ଷ୍ଟାଡିୟମ ବାହାରେ ଜମା ହୋଇଥିଲେ। ଏହି ଘଟଣାରେ ୧୧ ଜଣଙ୍କ ମୃତ୍ୟୁ ହୋଇଥିଲା।

କର୍ଣ୍ଣାଟକ ସରକାର ରିପୋର୍ଟରେ କହିଛନ୍ତି ଯେ, ବିଜୟ ପରେଡ ସମୟରେ ଗୁରୁତର ଅବହେଳା ହୋଇଥିଲା ଏବଂ କୌଣସି ଉପଯୁକ୍ତ ସୁରକ୍ଷା ବ୍ୟବସ୍ଥା ନଥିଲା। କାର୍ଯ୍ୟକ୍ରମ ଆୟୋଜନ କରିଥିବା ଡିଏନଏ ନେଟୱାର୍କ ପ୍ରାଇଭେଟ ଲିମିଟେଡ୍ କେବଳ ଜୁନ ୩ ତାରିଖରେ ପୋଲିସକୁ ସୂଚନା ଦେଇଥିଲା, ମାତ୍ର ୨୦୦୯ ନିର୍ଦ୍ଦେଶ ଅନୁଯାୟୀ ଅନୁମତି ନେଇ ନଥିଲା। ପୋଲିସ ସୀମିତ କାର୍ଯ୍ୟକ୍ରମ ପାଇଁ ଅନୁମତି ଦେଇଥିଲେ ମଧ୍ୟ, ଆଶାଠାରୁ ଅଧିକ ଲୋକ ଉପସ୍ଥିତ ହୋଇଥିବାରୁ ଘଟଣା ଘଟିଥିଲା।

ରିପୋର୍ଟରେ ବିରାଟ କୋହଲିଙ୍କ ଭୂମିକା ଉପରେ ମଧ୍ୟ ଆଲୋକପାତ କରାଯାଇଛି। ସରକାର ଦର୍ଶାଇଛନ୍ତି ଯେ, ଆର୍ସିବି ଜୁନ ୪ ତାରିଖରେ ସୋସିଆଲ ମିଡିଆରେ କୋହଲିଙ୍କ ଏକ ଭିଡିଓ ଶେୟାର୍ କରିଥିଲା, ଯେଉଁଥିରେ ସେ ପ୍ରଶଂସକମାନଙ୍କୁ ମାଗଣାରେ କାର୍ଯ୍ୟକ୍ରମରେ ଯୋଗଦେବାକୁ ଆହ୍ୱାନ ଦେଇଥିଲେ। ଏହି ଭିଡିଓ ଫଳରେ ଅଧିକ ସଂଖ୍ୟାରେ ଲୋକ ଆକର୍ଷିତ ହୋଇଥିବା କୁହାଯାଇଛି।