ବାଲେଶ୍ବର ଛାତ୍ରୀ ଆତ୍ମାହୁତି ଘଟଣାରେ ଅନେକ ଲିଡ୍ ମିଳିଛି : କ୍ରାଇମବ୍ରାଞ୍ଚ ଡିଜି

ବାଲେଶ୍ବର (ସଂକେତ ଟିଭି): ବାଲେଶ୍ଵର ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟରେ ଏକ ଛାତ୍ରୀଙ୍କ ଆତ୍ମହତ୍ୟା ଘଟଣା ନେଇ କ୍ରାଇମବ୍ରାଞ୍ଚ ତୀବ୍ର ତଦନ୍ତ ଚଳାଇଛି। ଆଜି ଘଟଣାସ୍ଥଳ ପରିଦର୍ଶନ କରିବା ପରେ କ୍ରାଇମବ୍ରାଞ୍ଚର ଡିଜି ବିନୟତୋଷ ମିଶ୍ର ମାଧ୍ୟମକୁ ପ୍ରତିକ୍ରିୟା ଦେଇଛନ୍ତି।

ଡିଜି ମିଶ୍ର କହିଛନ୍ତି ଯେ, ତଦନ୍ତ ସମୟରେ ପୀଡିତା ସମ୍ପର୍କିତ ଅନେକ ପ୍ରମାଣ ସାମଗ୍ରୀ ଜବତ କରାଯାଇଛି। ଏହି ସବୁ ସାମଗ୍ରୀ ରାଜ୍ୟ ଫରେନ୍ସିକ୍ ବିଜ୍ଞାନ ଲାବରେଟୋରୀକୁ ପଠାଯାଇଛି। ସେ କହିଛନ୍ତି, “ଆମେ ଅନେକ ତଥ୍ୟ ସଂଗ୍ରହ କରିଛୁ ଏବଂ ତଦନ୍ତ ଜାରି ରଖିଛୁ। ଏହି ମାମଲାରେ ସଠିକ୍ ନ୍ୟାୟ ମିଳିବ।”

ଏହି ମାମଲାରେ କ୍ରାଇମବ୍ରାଞ୍ଚ ଆଇଜି ଏସ୍ ସାଇନିଙ୍କ ନେତୃତ୍ୱରେ ତଦନ୍ତ ଚାଲିଛି। ଡିଜି ସ୍ପଷ୍ଟ କରିଛନ୍ତି ଯେ, ବର୍ତ୍ତମାନ ତଦନ୍ତ ରିପୋର୍ଟ ଅନୁସାରେ କୌଣସି ତଥ୍ୟ ପ୍ରକାଶ କରାଯିବ ନାହିଁ। ଡିଜିଟାଲ ମିଡିଆରେ ପ୍ରଚାରିତ ଖବର ଏବଂ ଫରେନ୍ସିକ୍ ରିପୋର୍ଟକୁ ନେଇ ଆଗାମୀ ପଦକ୍ଷେପ ନିଆଯିବ।

ଏହି ମାମଲାରେ ସିସିଟିଭି ଫୁଟେଜ, ସୋସିଆଲ ମିଡିଆ ସକ୍ରିୟତା ଏବଂ ସାକ୍ଷ୍ୟଗ୍ରହଣ ସହିତ ଅନେକ ପ୍ରମାଣ ବିଶ୍ଳେଷଣ କରାଯାଉଛି। ଡିଜିଟାଲ ପ୍ରମାଣର ବୈଜ୍ଞାନିକ ବିଶ୍ଳେଷଣ କରାଯାଇ ଏକ ସଠିକ୍ ତଦନ୍ତ ପ୍ରକ୍ରିୟା ଅନୁସରଣ କରାଯାଉଛି। ଘଟଣା ପୂର୍ବରୁ ମହାବିଦ୍ୟାଳୟ ପକ୍ଷରୁ କୌଣସି ଲିଖିତ ଅଭିଯୋଗ ନଥିବା ଏବଂ ବର୍ତ୍ତମାନ ମହାବିଦ୍ୟାଳୟ ପ୍ରଶାସନ ମୌନ ରହିବା ତଦନ୍ତକୁ ଜଟିଳ କରିଛି।

କେତେକ ସାକ୍ଷୀଙ୍କ ବକ୍ତବ୍ୟରେ ପରିବର୍ତ୍ତନ ହେବା ଫଳରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି। ସୋସିଆଲ ମିଡିଆରେ ବିଭିନ୍ନ ପ୍ରକାରର ବିବରଣୀ ମଧ୍ୟ ଏହାକୁ ଅଧିକ ଜଟିଳ କରିଛି। ଅନ୍ୟ ପକ୍ଷରେ, ପୀଡ଼ିତ ପରିବାର ନ୍ୟାୟ ପାଇଁ ଏକ ସ୍ୱଚ୍ଛ ଏବଂ ନିଷ୍ପକ୍ଷ ତଦନ୍ତ ଦାବି କରୁଛନ୍ତି। ପୁଲିସ ନିଶ୍ଚିତ କରିଛନ୍ତି ଯେ ସିସିଟିଭି ଫୁଟେଜ ଏବଂ ଡିଜିଟାଲ ପ୍ରମାଣଗୁଡିକ ସଠିକ୍ ଭାବରେ ପରୀକ୍ଷା କରାଯାଉଛି ବୋଲି ସେ କହିଛନ୍ତି ।

ଗତ ୧୨ ତାରିଖରେ ବାଲେଶ୍ଵର ଫକୀର ମୋହନ କଲେଜର ଏକ ଛାତ୍ରୀ ନିଜ ଦେହରେ ପେଟ୍ରୋଲ ଢାଳି ନିଆଁ ଲଗାଇଥିଲେ। ଗୁରୁତର ଆଘାତ ପାଇଥିବା ଛାତ୍ରୀଙ୍କୁ ପ୍ରଥମେ ବାଲେଶ୍ଵର ଜିଲ୍ଲା ଚିକିତ୍ସାଳୟ ଏବଂ ପରେ ଭୁବନେଶ୍ୱର ଏମ୍ସକୁ ସ୍ଥାନାନ୍ତରିତ କରାଯାଇଥିଲା। ତାଙ୍କ ଶରୀରର ୯୫% ଅଂଶ ପୋଡ଼ି ଯାଇଥିବାରୁ ଚିକିତ୍ସା ବେଳେ ଜୀବନ ବଞ୍ଚାଇବା କଷ୍ଟକର ଥିଲା।

ଏମ୍ସ ଭୁବନେଶ୍ୱରରେ ଏକ ୧୦ ଜଣିଆ ବିଶେଷଜ୍ଞ ଡାକ୍ତର ଦଳ ଛାତ୍ରୀଙ୍କ ଚିକିତ୍ସା ପାଇଁ ନିୟୋଜିତ ହୋଇଥିଲେ। ଦିଲ୍ଲୀ ଏମ୍ସ ସହିତ ସମନ୍ୱୟ ରଖି ଚିକିତ୍ସା ଚାଲିଥିଲା। ଦୁର୍ଭାଗ୍ୟବଶତଃ, ସମସ୍ତ ଚେଷ୍ଟା ସତ୍ତ୍ୱେ ଛାତ୍ରୀ ଚିକିତ୍ସା ବେଳେ ମୃତ୍ୟୁବରଣ କରିଥିଲେ। ଏହି ଦୁଃଖଦ ଘଟଣା ପରେ ପରିବାର ଏବଂ ସ୍ଥାନୀୟ ସମାଜରେ ଆଘାତ ଓ ରୋଷ ଦେଖାଦେଇଛି।