ଜେଡି(ଏସ୍) ନେତା ପ୍ରଜ୍ୱଳ ରେବନ୍ନାଙ୍କୁ ବଳାତ୍କାର ମାମଲାରେ ଆଜୀବନ କାରାଦଣ୍ଡ

ବେଙ୍ଗାଳୁରୁ (ସଂକେତ ଟିଭି): କର୍ଣ୍ଣାଟକର ଏକ ସ୍ୱତନ୍ତ୍ର କୋର୍ଟ ଦ୍ୱାରା ବଳାତ୍କାର ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଜେଡି(ଏସ୍) ନେତା ଏବଂ ପୂର୍ବତନ ସାଂସଦ ପ୍ରଜ୍ୱଳ ରେବନ୍ନାଙ୍କୁ ଆଜୀବନ କାରାଦଣ୍ଡ ଦିଆଯାଇଛି। ସ୍ୱତନ୍ତ୍ର କୋର୍ଟର ବିଚାରପତି ସନ୍ତୋଷ ଗଜାନନ ଭଟ୍ଟ ଏହି ଦଣ୍ଡ ଘୋଷଣା କରିଛନ୍ତି।

ପୂର୍ବତନ ସାଂସଦ ପ୍ରଜ୍ୱଳ ରେବନ୍ନାଙ୍କ ବିରୋଦ୍ଧରେ ଚାରୋଟି ବଳାତ୍କାର ମାମଲା ରୁଜୁ ହୋଇଥିଲା। ଏହି ମାମଲା ହାସନ ଜିଲ୍ଲାର ରେଭାନାଙ୍କ ପରିବାରର ଗନିକାଡା ଫାର୍ମହାଉସରେ ଘରୋଇ ସହାୟକ ଭାବରେ କାମ କରୁଥିବା ଜଣେ ୪୮ ବର୍ଷୀୟା ମହିଳାଙ୍କ ସହିତ ଜଡିତ। ରେବନ୍ନା ୨୦୨୧ ମସିହାରେ ହାସନରେ ତାଙ୍କ ଫାର୍ମହାଉସ ଏବଂ ବାଙ୍ଗାଲୋରରେ ତାଙ୍କ ଘରେ ଦୁଇଥର ବଳାତ୍କାର କରିଥିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଥିଲେ। ସେ ଏହି କାର୍ଯ୍ୟକୁ ତାଙ୍କ ମୋବାଇଲ୍ ଫୋନରେ ରେକର୍ଡ କରିଥିଲେ ଏବଂ ପୀଡିତାଙ୍କୁ ଧମକ ଦେଇଥିଲେ ଯେ ଯଦି ସେ କାହାକୁ କହିବେ, ତେବେ ଭିଡିଓ ଲିକ୍ କରାଯିବ।

ସ୍ୱତନ୍ତ୍ର ସରକାରୀ ଓକିଲ ଅଶୋକ ନାୟକ କହିଛନ୍ତି ଯେ ସରକାରୀ ଓକିଲ ୨୬ ଜଣ ସାକ୍ଷୀଙ୍କ ବୟାନ ନେଇଥିଲେ ଏବଂ ୧୮୦ ଟି ଦଲିଲ ଦାଖଲ କରିଥିଲେ। ମୁଖ୍ୟ ପ୍ରମାଣ ଥିଲା ପୀଡିତାଙ୍କ ବୟାନ, ଯାହା ଅତ୍ୟନ୍ତ ବିଶ୍ୱସନୀୟ ଥିଲା। ସ୍ୱତନ୍ତ୍ର ତଦନ୍ତକାରୀ ଦଳ (SIT) ସେପ୍ଟେମ୍ବର ୨୦୨୪ରେ ୧,୬୩୨ ପୃଷ୍ଠାର ଚାର୍ଜସିଟ୍ ଦାଖଲ କରିଥିଲେ, ଯାହାରେ ୧୧୩ ଜଣ ସାକ୍ଷୀଙ୍କ ବୟାନ ଅନ୍ତର୍ଭୁକ୍ତ ଥିଲା।

୨୦୨୪ ଲୋକସଭା ନିର୍ବାଚନ ପୂର୍ବରୁ ରେବନ୍ନାଙ୍କ ସହିତ ଜଡିତ ଏକ ଅଶ୍ଳୀଳ ଭିଡିଓ ପ୍ରଚାରିତ ହେବା ପରେ ମାମଲାଟି ସାମ୍ନାକୁ ଆସିଥିଲା। ପରେ ଗତ ବର୍ଷ ମେ ୩୧ ତାରିଖରେ ଜର୍ମାନୀରୁ ଫେରିବା ପରେ ତାଙ୍କୁ ଗିରଫ କରାଯାଇଥିଲା। ଏହି ମାମଲା ପରେ ଜେଡି(ଏସ୍) ଦଳ ତାଙ୍କୁ ନିଲମ୍ବିତ କରିଥିଲା। ୨୦୨୪ ନିର୍ବାଚନରେ ରେବନ୍ନା ହାସନ ସଂସଦୀୟ କ୍ଷେତ୍ରରୁ ପରାଜିତ ହୋଇଥିଲେ।