କଡ଼ା ସୁରକ୍ଷା ମଧ୍ୟରେ ସୋନମ୍ ୱାଙ୍ଗଚୁକ ଯୋଧପୁର ଜେଲକୁ ସ୍ଥାନାନ୍ତରିତ
ଲେହ (ସଂକେତ ଟିଭି): ଲଦାଖର ଜଣାଶୁଣା ସାମାଜିକ କର୍ମୀ ଏବଂ ଶିକ୍ଷାବିତ୍ ସୋନମ୍ ୱାଙ୍ଗଚୁକ୍ଙ୍କୁ ଶୁକ୍ରବାର ପୁଲିସ ଗିରଫ କରିଛି। ଜାତୀୟ ସୁରକ୍ଷା ଆଇନ (ଏନ୍ଏସ୍ଏ) ଅଧୀନରେ ଅପରାହ୍ନ ୨ଟା ୩୦ ମିନିଟ୍ ସମୟରେ ତାଙ୍କୁ ଗିରଫ କରାଯାଇ ଏକ ଅଜ୍ଞାତ ସ୍ଥାନକୁ ନିଆଯାଇଥିଲା। ଗିରଫଦାରୀ ସମୟରେ ସେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧନ କରିବାକୁ ଯାଉଥିବା ବେଳେ ଲଦାଖ ପୋଲିସ୍ ଡିଜିପି ଏସ୍.ଡି. ସିଂହ ଜାମୱାଲଙ୍କ ନେତୃତ୍ୱରେ ଏକ ଦଳ ତାଙ୍କୁ ଗିରଫ କରିଥିଲେ।
ଗିରଫ ପରଦିନ, ଶନିବାରରେ, ତାଙ୍କୁ ଯୋଧପୁର ଜେଲକୁ ସ୍ଥାନାନ୍ତରିତ କରାଯାଇଛି। ଲେହ ବିମାନବନ୍ଦରରେ ସମସ୍ତ ଆବଶ୍ୟକୀୟ କାଗଜପତ୍ର ଓ କାର୍ଯ୍ୟାନୁଷ୍ଠାନ ସମାପ୍ତ କରିବା ପରେ ତାଙ୍କୁ ଏକ ସ୍ୱତନ୍ତ୍ର ବିମାନରେ ଯୋଧପୁର ପଠାଯାଇଥିଲା। ସେଠାରେ ପହଞ୍ଚିବା ପରେ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ତାଙ୍କୁ ଜେଲକୁ ନିଆଯାଇଛି। ଜେଲ ପ୍ରଶାସନ ତରଫରୁ ତାଙ୍କର ଡାକ୍ତରୀ ପରୀକ୍ଷା କରାଯାଇସାରିଛି ଏବଂ ତାଙ୍କୁ ଏକ ଉଚ୍ଚ ସୁରକ୍ଷା ୱାର୍ଡରେ ରଖାଯାଇଛି, ଯେଉଁଠି ୨୪ ଘଣ୍ଟା ସିସିଟିଭି କ୍ୟାମେରା ଜରିଆରେ ତାଙ୍କୁ ନଜରରେ ରଖାଯାଉଛି।
ଏହି ଗିରଫଦାରୀ ଆସିଛି ଠିକ୍ ଯେଉଁ ଦିନ ତାଙ୍କ ସଂସ୍ଥା ‘ଷ୍ଟୁଡେଣ୍ଟସ୍ ଏଜୁକେସନାଲ୍ ଆଣ୍ଡ କଲ୍ଚରାଲ୍ ମୁଭ୍ମେଣ୍ଟ ଅଫ୍ ଲଦାଖ’ (ଏସ୍ଇସିଏମ୍ଓଏଲ୍)ର ଲାଇସେନ୍ସ ବିଦେଶୀ ଅନୁଦାନ ନିୟମ (ଏଫ୍ସିଆର୍ଏ) ଉଲ୍ଲଂଘନର ଅଭିଯୋଗରେ ରଦ୍ଦ ହୋଇଥିଲା। ସୋନମ୍ ୱାଙ୍ଗଚୁକ୍ଙ୍କ ଗିରଫଦାରୀ ପରଠାରୁ ସାରା ଲଦାଖରେ ସୁରକ୍ଷା ବ୍ୟବସ୍ଥା କଡ଼ା କରାଯାଇଛି ଏବଂ ଇଣ୍ଟରନେଟ୍ ସେବା ସାମୟିକ ଭାବେ ବନ୍ଦ ରଖାଯାଇଛି। ପରିସ୍ଥିତିର ତୀବ୍ରତାକୁ ଦେଖି ଲେହ ସହରରେ କର୍ଫ୍ୟୁ ମଧ୍ୟ ବଳବତ୍ତର ରଖାଯାଇଛି।
