ମୋଦିଙ୍କ ଜନ୍ମଦିନକୁ ସୁଭଦ୍ରା ଜନ୍ମତିଥି ଭାବେ ପାଳନ କରିବେ ଓଡ଼ିଶା ସରକାର

ଭୁବନେଶ୍ୱର (ସଂକେତ ଟିଭି): ଆସନ୍ତାକାଲି ବୁଧବାର (୧୭ ସେପ୍ଟେମ୍ବର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ ଅଟେ। ଏହି ଦିନଟିକୁ ଓଡ଼ିଶା ସରକାର ସୁଭଦ୍ରା ଜନ୍ମତିଥି ଭାବେ ପାଳନ କରିବେ ବୋଲି ଘୋଷଣା କରାଯାଇଛି। ରାଜ୍ୟ ସରକାରଙ୍କ ମତରେ, ସୁଭଦ୍ରା ଶୁଭାରମ୍ଭ ହୋଇଥିବା ସମୟକୁ ଏହି ଦିନରେ ପାଳନ କରାଯିବ।

ପ୍ରଧାନମନ୍ତ୍ରୀ ମୋଦିଙ୍କ ଜନ୍ମଦିନ ଉପଲକ୍ଷେ ରାଜ୍ୟରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହେବ। ଏଥିପାଇଁ ରାଜ୍ୟ ସରକାର ତରଫରୁ ଏକ ଆଦେଶ ଜାରି କରାଯାଇଛି। ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ଜନ୍ମଦିନରେ ରାଜ୍ୟପାଳ ଓ ମୁଖ୍ୟମନ୍ତ୍ରୀ ଉପସ୍ଥିତ ରହିବେ।

ଏହି ଅବସରରେ ରାଜ୍ୟର ୩୩୮ ଟି ସିଡିପିଓ (CDPO) କାର୍ଯ୍ୟାଳୟରେ ‘ଧନ୍ୟବାଦ ମୋଦି’ କାର୍ଯ୍ୟକ୍ରମ ଆୟୋଜିତ ହେବ। ଏଥିସହିତ ସପ୍ତାହଜୁଡ଼ା କାର୍ଯ୍ୟକ୍ରମ ଭାବେ ରାଜ୍ୟର ୭୪ ହଜାର ଅଙ୍ଗନବାଡ଼ୀ କେନ୍ଦ୍ରରେ ମଧ୍ୟ ଏହି କାର୍ଯ୍ୟକ୍ରମ ପାଳନ କରାଯିବ।

ସ୍ୱାସ୍ଥ୍ୟ ଓ ମହିଳା ଏବଂ ଶିଶୁ ବିକାଶ ବିଭାଗ ମିଳିତ ଭାବେ ‘ସୁସ୍ଥ ନାରୀ, ସଶକ୍ତ ପରିବାର’ ନାମକ ଏକ ବିଶେଷ କାର୍ଯ୍ୟକ୍ରମ ମଧ୍ୟ ଆୟୋଜନ କରିବେ। ଏହି କାର୍ଯ୍ୟକ୍ରମଗୁଡ଼ିକ ମାଧ୍ୟମରେ ପ୍ରଧାନମନ୍ତ୍ରୀଙ୍କ ଜନ୍ମଦିନକୁ ଚିହ୍ନିତ କରାଯିବ।