ଶଙ୍କର ମହାଦେବନଙ୍କ ବ୍ୟାଣ୍ଡ୍କୁ ମିଳିଲା ‘ଗ୍ରାମି’ ପୁରସ୍କାର
ନୂଆଦିଲ୍ଲୀ (ସଂକେତ ଟିଭି): ଭାରତୀୟ ଗାୟକ ଶଙ୍କର ମହାଦେବନଙ୍କୁ ନିଜ ବ୍ୟାଣ୍ଡ ‘ଶକ୍ତି’ର ଆଲ୍ବମ ‘ଦିଶ ମୋମେଣ୍ଟ’ ପାଇଁ ବେଷ୍ଟ ଗ୍ଲୋବାଲ ମ୍ୟୁଜିକ ଆଲ୍ବମ୍ ଶ୍ରେଣୀରେ ଗ୍ରାମି ପୁରସ୍କାର ମିଳିଛି। ଏହି ଆଲ୍ବମ୍ରେ ମୋଟ ୮ଟି ଗୀତ ରହିଛି। ଏହି ବ୍ୟାଣ୍ଡରେ ଶଙ୍କର ମହାଦେବନ, ଜାକିର ହୁସେନ, ଭି ସେଲ୍ଭାଗଣେଶ ଏବଂ ଗଣେଶ ରାଜଗୋପାଳନଙ୍କ ଭଳି କଳାକାର କାମ କରୁଛନ୍ତି। ଏହି ବ୍ୟାଣ୍ଡ ବ୍ୟତୀତ ବଂଶୀ ବାଦକ ରାକେଶ ଚୌରାସିଆ ୨ଟି ଗ୍ରାମି ପୁରସ୍କାର ହାତେଇଛନ୍ତି। ଏହି ଭଳି ଭାବେ ମୋଟ ୫ ଜଣ ଭାରତୀୟଙ୍କୁ ୬୬ତମ ଗ୍ରାମି ପୁରସ୍କାର ମିଳିଛି।
ଏହି ଉତ୍ସବରେ ଜାକିର ‘ପସ୍ତୋ’ ପାଇଁ ‘ବେଷ୍ଟ ଗ୍ଲୋବାଲ ମ୍ୟୁଜିକ ପରଫରମାନ୍ସ’ ଶ୍ରେଣୀରେ ରାକେଶ ଚୌରାସିଆଙ୍କ ସହ ଗ୍ରାମି ଜିତିଛନ୍ତି। ଏହା ବ୍ୟତୀତ ‘ଦିଶ ମୋମେଣ୍ଟ’ ପାଇଁ ବେଷ୍ଟ ଗ୍ଲୋବାଲ ମ୍ୟୁଜିକ ଆଲ୍ବମ୍ ଏବଂ ‘ଏଜ୍ ଭି ସ୍ପିକ୍’ ପାଇଁ କନଟେମ୍ପୋରାରୀ ଇନଷ୍ଟ୍ରୁମେଣ୍ଟ ଆଲ୍ବମ କାଟାଗୋରୀରେ ଗ୍ରାମି ହାତେଇଛନ୍ତି। ସେହିପରି ଆମେରିକାନ ଗୀତିକାର ଟେଲର ସ୍ବିଫ୍ଟ ନିଜ ଆଲ୍ବମ ‘ମିଡନାଇଟ୍ସ’ ପାଇଁ ‘ଆଲ୍ବମ ଅଫ୍ ଦ ଇୟର’ ପୁରସ୍କାର ଜିତିଛନ୍ତି। ସେ ଚତୁର୍ଥ ଥର ପାଇଁ ଗ୍ରାମି ପୁରସ୍କାର ଜିତି ରେକର୍ଡ କରିଛନ୍ତି।
