ମହିଳା ଥାନା ଅଧିକାରିଣୀଙ୍କୁ ଦୋକାନ ଘରେ ବନ୍ଦ କରି ମାଡ଼ ମାରିଲେ ଜୁଆଡି

ବାଲିଆପାଳ (ଉମାକାନ୍ତ ନାୟକ) ଜୁଆ ଆଡଡା ଉପରେ ଚଢାଉ ବେଳେ ମହିଳା ପୋଲିସ ଆଇଆଇସିଙ୍କୁ ଏକ ଘରେ ବନ୍ଦ କରି ବାହାରୁ ତାଲା ପକାଇ ଦେଇଥିଲେ ଜୁଆଡ଼ି । ଏହାସହ ଅନ୍ୟ ପୋଲିସ ଅଧିକାରୀଙ୍କୁ ମଧ୍ୟ ଆକ୍ରମଣ କରିଛନ୍ତି । ବାଲେଶ୍ଵର ଜିଲ୍ଲା ତାଳସାରୀ ଥାନା ଅଧିନ ଉଦୟପୁର ଗାଁରେ ଏହି ଘଟଣା ଦେଖିବାକୁ ମିଳିଛି । ପୋଲିସ ଏହି ଘଟଣାରେ ଦୁଇ ଜଣ ମହିଳାଙ୍କ ସମେତ 15 ଜଣଙ୍କୁ ଗିରଫ କରିଛି ।

ସୂଚନା ଅନୁଯାୟୀ, ବାଲେଶ୍ବର ଜିଲ୍ଲା ଭୋଗରାଇର ସାହାବାଜିପୁର ପଞ୍ଚାୟତ ଅଧିନ ଉଦୟପୁର ଗାଁରେ ଜୁଆ ଖେଳ ଚାଲିଥିବା ନେଇ ଖବର ପାଇ ତାଳସାରୀ ସାମୁଦ୍ରିକ ଥାନା ଅଧୀକାରିଣୀ ଚମ୍ପାବତୀ ସୋରେନ ସଦଳବଳେ ଚଢାଉ କରିଥିଲେ । ଘଟଣାସ୍ଥଳରେ ପହଞ୍ଚି ଜୁଆଖେଳ ବନ୍ଦ କରିବାକୁ ଥାନା ଅଧୀକାରିଣୀ କହିଥିଲେ । ଯାହାକୁ ନେଇ ସ୍ଥାନୀୟ ଲୋକଙ୍କ ସହ ଝଗଡ଼ା ହେବା ପରେ ଅଚାନକ କିଛି ବ୍ୟକ୍ତି ତାଙ୍କୁ ମାଡ଼ ମାରିବା ସହ ଜବରଦସ୍ତ ଏକ ଦୋକାନ ଘରେ ବନ୍ଦ କରିଦେଇଥିଲେ । ତେବେ ଏନେଇ ପୋଲିସ ଗାଡିର ଡ୍ରାଇଭର ସୁଧାଂଶୁ ମହାନ୍ତି ଏହାକୁ ବିରୋଧ କରିଥିଲେ ମଧ୍ୟ ତାଙ୍କୁ ମାଡମାରି ଲହୁ ଲୁହାଣ କରିଦେଇ ଥିଲେ ।

ଘଟଣା ସମ୍ପର୍କରେ ଖବର ପାଇ ଭୋଗରାଇ ଥାନା ଓ ସାହାବାଜିପୁର ଫାଣ୍ଡିର ପୋଲିସ ଘଟଣା ସ୍ଥଳରେ ପହଞ୍ଚି ମହିଳା ଥାନା ଅଧିକାରୀଙ୍କୁ ଉଦ୍ଧାର କରିଥିଲେ । ଅନ୍ୟପଟେ ଆଜି ଘଟଣା ସ୍ଥଳରେ ବ୍ୟାପକ ପୋଲିସ ମୁତୟନ କରିବା ସହିତ 15 ଜଣଙ୍କୁ ଗିରଫ କରାଯାଇଥିବା ଜଳେଶ୍ବର ଏସଡିପିଓ ଦିଲ୍ଲୀପ ସାହୁ ସୂଚନା ଦେଇଛନ୍ତି ।