ବିଜେପିର ଏକ କୋଟି ଜନମତ ସଂଗ୍ରହ ଅଭିଯାନ ଆରମ୍ଭ

ଭୁବନେଶ୍ବର (ସଂକେତ ଟିଭି) : ବିଜେପି ଏକ କୋଟି ଜନମତ ସଂଗ୍ରହ ଅଭିଯାନ ଆରମ୍ଭ କରିଛି। ରାଜ୍ୟ ବିଜେପି କାର୍ଯ୍ୟାଳୟରେ ରାଜ୍ୟ ସଭାପତି ମନମୋହନ ସାମଲ ଏହି ଅଭିଯାନର ଶୁଭାରମ୍ଭ କରିଛନ୍ତି। ଆଗାମୀ ନିର୍ବାଚନ ଇସ୍ତାହାରରେ କ’ଣ ରଖିବ ବିଜେପି ସେନେଇ ଜନମତ ସଂଗ୍ରହ କରିବ । ରାଜ୍ୟର ଏକ କୋଟି ଲୋକଙ୍କ ପାଖକୁ ଯାଇ ବିଜେପି ସଂକଳ୍ପ ପତ୍ର ପାଇଁ ପରାମର୍ଶ ଲୋଡିବ । ପ୍ରତି ନିର୍ବାଚନମଣ୍ଡଳୀରେ ୨ଟି ଗାଡ଼ି ବୁଲିବ । ସେଥିରେ ସଂକଳ୍ପ ପତ୍ର ବାକ୍ସ ରହିବ। ଲୋକମାନେ ଗାଡ଼ି ପାଖକୁ ଆସି ମତାମତ ଦେଇପାରିବେ। ସେହିପରି ନମୋ ଆପ୍ ଜରିଆରେ ମଧ୍ୟ ପରାମର୍ଶ ଦିଆଯାଇପାରିବ । ଏହା ସହ ଲୋକେ ୯୦୯୦୯୦୨୦୨୪ ନମ୍ବରରେ କଲ କରି ଭଏସ୍ ମେସେଜ୍ ଜରିଆରେ ନିଜର ମତ ବା ପରାମର୍ଶ ଦେଇପାରିବେ ।

ଚାଷୀଙ୍କ ଆୟ ୨ ଗୁଣା କିପରି କରାଯିବ? ଦାଦନ ସମସ୍ୟାର ସମାଧାନ କିପରି ହେବ? ଚିଟଫଣ୍ଡ ପ୍ରସଙ୍ଗରେ ସରକାରଙ୍କ ନୀତି କ’ଣ ରହିବା ଆବଶ୍ୟକ? ମହିଳା ସଶକ୍ତିକରଣ ପାଇଁ ଆଉ କ’ଣ ପଦକ୍ଷେପ ନେବାକୁ ହେବ? ଏହା ସହ ବିଜେପି କ୍ଷମତାକୁ ଆସିଲେ ଆଉ କ’ଣ ଜନମଙ୍ଗଳକାରୀ ଯୋଜନା କରିହେବ? ସେନେଇ ମତାମତ ଦେବାକୁ ରାଜ୍ୟ ବିଜେପି ସଭାପତି ମନମୋହନ ସାମଲ ରାଜ୍ୟବାସୀଙ୍କୁ ଅନୁରୋଧ କରିଛନ୍ତି । ଏହି କାର୍ଯ୍ୟକ୍ରମରେ ରାଜ୍ୟ ନିର୍ବାଚନ ପ୍ରଭାରୀ ବିଜୟପାଲ ସିଂ ତୋମାର, ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ପ୍ରମୁଖ ଉପସ୍ଥିତ ଥିଲେ।