ରକ୍ତସ୍ରାବ ପାଇଁ ହେଲା ସଦଗୁରୁ ଜାଗି ବାସୁଦେବଙ୍କ ମସ୍ତିଷ୍କ ସର୍ଜରୀ
ନୂଆଦିଲ୍ଲୀ (ସଂକେତ ଟିଭି) : ଆଧ୍ୟାତ୍ମିକ ଗୁରୁ ତଥା ଇଶା ଫାଉଣ୍ଡେସନ୍ କୋଏମ୍ବାଟୁରର ପ୍ରତିଷ୍ଠାତା ସଦଗୁରୁ ଜଗ୍ଗି ବାସୁଦେବଙ୍କ ମସ୍ତିଷ୍କ ସର୍ଜରୀ କରାଯାଇଛି । ମୁଣ୍ଡ ଭିତରେ ରକ୍ତସ୍ରାବ ପାଇଁ ମାର୍ଚ୍ଚ ୧୭ରେ ତାଙ୍କୁ ଦିଲ୍ଲୀରେ ଥିବା ଆପୋଲୋ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏବେ ଅପରେସନ୍ ସଫଳ ହୋଇଛି ଏବଂ ସଦଗୁରୁ ସମ୍ପୂର୍ଣ୍ଣ ସୁସ୍ଥ ଥିବା ସାମ୍ନାକୁ ଆସିଛି। ଏହି ଅପରେସନ୍ ପରେ ସେ ନିଜେ ଏକ ଭିଡିଓ ମଧ୍ୟ ରେକର୍ଡ କରି ଏହାକୁ ସେୟାର କରିଛନ୍ତି, ଯେଉଁଥିରେ ସେ କହୁଛନ୍ତି ଯେ ଯେତେବେଳେ ଡାକ୍ତରମାନେ ତାଙ୍କ ମସ୍ତିଷ୍କ ଖୋଲିଥିଲେ, ସେତେବେଳେ ତାହା ଖାଲି ଥିଲା । ବର୍ତ୍ତମାନ ମୁଁ ଭଲ ଅଛି।
ଡାକ୍ତରମାନେ କହିଛନ୍ତି ଯେ, ଅନେକ ଦିନ ଧରି ତାଙ୍କର ମୁଣ୍ଡବ୍ୟଥା ହେଉଥିବା ସେ ଅଭିଯୋଗ କରିଥିଲେ। ପରୀକ୍ଷା ପରେ ଜଣାପଡ଼ିଥିଲା ଯେ, ତାଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧିଛି। ଏବିଷୟରେ ଜାଣିବା ପରେ ତୁରନ୍ତ ତାଙ୍କର ଅପରେସନ୍ କରାଯାଇଥିଲା। ଦିଲ୍ଲୀ ଆପୋଲୋ ହସ୍ପିଟାଲର ନ୍ୟୁରୋ ସର୍ଜନ ଡାକ୍ତର ବୀନିତ ସୁରୀ ସ୍ୱାସ୍ଥ୍ୟ ବୁଲେଟିନ୍ ଜାରି କରି କହିଛନ୍ତି ଯେ, ସଦଗୁରୁଙ୍କ ମସ୍ତିଷ୍କର ଏକ ଅଂଶ ଯେଉଁଭଳି ଭାବେ ଫୁଲିଥିଲା ଏବଂ ରକ୍ତ ଜମାଟ ବାନ୍ଧିଥିଲା, ତାହା ତାଙ୍କ ଜୀବନ ପ୍ରତି ବିପଦ ଆଣିଥାନ୍ତା। ଏବିଷୟରେ ଜାଣିବା ପରେ ଆମେ ମାର୍ଚ୍ଚ ୧୭ରେ ତାଙ୍କର ଅପରେସନ କରିଥିଲୁ। ଏବେ ତାଙ୍କ ଅବସ୍ଥା ଦ୍ରୁତ ଗତିରେ ସୁଧୁରୁଛି। ସେପଟେ ପ୍ରଧାନମନ୍ତ୍ରୀ ମୋଦି ଫୋନ ଯୋଗେ ସଦଗୁରୁଙ୍କ ସହ କଥା ହୋଇ ତାଙ୍କ ଆଶୁ ଆରୋଗ୍ୟ କାମନା କରିଛନ୍ତି ।
