ଯୁଦ୍ଧ ଆଶଙ୍କାରେ ସେୟାର ବଜାରରେ ହାହାକାର, ନିବେଶକଙ୍କ କ୍ଷତି ୫ ଲକ୍ଷ କୋଟି

ମୁମ୍ବାଇ (ସଂକେତ ଟିଭି) : ଇସ୍ରାଏଲ ଉପରେ ଇରାନର ଆକ୍ରମଣ ପରେ ସାରା ବିଶ୍ୱର ଷ୍ଟକ ବଜାରରେ ହ୍ରାସ ପରିଲକ୍ଷିତ ହୋଇଛି । ଏହାର ପ୍ରଭାବ ଭାରତୀୟ ଷ୍ଟକ ବଜାରରେ ମଧ୍ୟ ଦେଖିବାକୁ ମିଳିଛି । ଏହା କ୍ରମଶଃ ଏକ ବଡ଼ ଯୁଦ୍ଧ ଆଡ଼କୁ ଗତି କରୁଥିବା ନିବେଶକମାନେ ସନ୍ଦେହ କରି ନିଜ ସେୟାକୁ ବହୁମାତ୍ରାରେ ବିକ୍ରି କରିଛନ୍ତି ।

ସପ୍ତାହର ପ୍ରଥମ କାରବାର ଅଧିବେଶନରେ ନିବେଶକଙ୍କ ବିକ୍ରି ଯୋଗୁଁ ଭାରତୀୟ ବଜାର ଦ୍ରୁତ ହ୍ରାସ ସହିତ ବନ୍ଦ ହୋଇଥିଲା। ବ୍ୟାଙ୍କିଙ୍ଗ, ଆଇଟି ଓ ଏଫଏମସିଜି ସେୟାରରେ ବିକ୍ରି ଯୋଗୁଁ ବଜାରରେ ଏହି ହ୍ରାସ ଦେଖିବାକୁ ମିଳିଛି । ମିଡ୍ କ୍ୟାପ୍ ଏବଂ ସ୍ମଲକ୍ୟାପ୍ ଷ୍ଟକ୍ ମଧ୍ୟ ସ୍ଥିର ରହିଛି। ଆଜିର କାରବାର ଶେଷ ସୁଦ୍ଧା ବିଏସ୍ଇ ସେନ୍ସେକ୍ସ ୮୪୫ ପଏଣ୍ଟ ହ୍ରାସ ପାଇ ୭୩,୩୯୯ ରେ ବନ୍ଦ ହୋଇଥିବା ବେଳେ ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫ୍ଟି ୨୪୭ ପଏଣ୍ଟ ହ୍ରାସ ପାଇ ୨୨,୨୭୨ ପଏଣ୍ଟରେ ବନ୍ଦ ହୋଇଛି। ନିଫ୍ଟିର ମିଡ୍ କ୍ୟାପ୍ ଇଣ୍ଡେକ୍ସ ୭୮୬ ପଏଣ୍ଟ ହ୍ରାସ ପାଇ ବନ୍ଦ ହୋଇଛି।

ସେୟାର ବଜାରରେ ଦ୍ରୁତ ହ୍ରାସ ଯୋଗୁଁ ତାଲିକାଭୁକ୍ତ ଷ୍ଟକଗୁଡ଼ିକର ବଜାର ପୁଞ୍ଜି ୫ ଲକ୍ଷ କୋଟି ଟଙ୍କା ହ୍ରାସ ପାଇଛି। ବିଏସଇ ତଥ୍ୟ ଅନୁଯାୟୀ, ଗତ ଅଧିବେଶନରେ ମାର୍କେଟ କ୍ୟାପ ୩୯୯.୭୬ ଲକ୍ଷ କୋଟି ଟଙ୍କାରୁ ହ୍ରାସ ପାଇ ୩୯୪.୭୨ ଲକ୍ଷ କୋଟି ଟଙ୍କାରେ ପହଞ୍ଚିଛି। ଅର୍ଥାତ୍ ଆଜିର ଅଧିବେଶନରେ ନିବେଶକମାନେ ୫.୦୪ ଲକ୍ଷ କୋଟି ଟଙ୍କା ହରାଇଛନ୍ତି । ତେବେ ଏଭଳି ଯୁଦ୍ଧ ପରିସ୍ଥିତିରେ ବିଶେଷକରି ଅଶୋଧିତ ତୈଳ ମୂଲ୍ୟ ଏବଂ ମୁଦ୍ରାସ୍ଫୀତିର ବ୍ୟାପକ ବୃଦ୍ଧି ହେବାର ସମ୍ଭାବନା ଅଛି।