ନୌସେନାର ନୂଆ ଡ୍ରେସ୍ କୋଡ, କୁର୍ତ୍ତା ପାଇଜାମାରେ ନଜର ଆସିବେ ଯବାନ
ନୂଆଦିଲ୍ଲୀ (ସଂକେତ ଟିଭି) ନୈସେନାର ଡ୍ରେସକୋଡ୍ ବଦଳାଯାଇଛି । ଏଥର କୁର୍ତ୍ତା ପାଇଜାମା ତଥା କୁର୍ତ୍ତା ଚୁଡିଦାରରେ ନଜର ଆସିବେ ନୌସେନା ଯବାନ । ଏଥିନିମନ୍ତେ ମଞ୍ଜୁରୀ ମିଳି ସାରିଛି । ଆକାସିଆ ନୀଳ ରଙ୍ଗ କୁର୍ତ୍ତା, ଧଳା ପାଇଜାମା ଏବଂ ଜ୍ୟାକ୍ର ରଙ୍ଗ ନେଭି ବ୍ଲୁ ରହିଛି। ସେନାରୁ ଅବସର ନେଇଥିବା ଶୌର୍ଯ୍ୟ ଚକ୍ର ବିଜେତା ବ୍ରିଗେଡିୟର୍ ହରଦୀପ ସିଂହ ସୋହି ସୋସିଆଲ୍ ମିଡିଆରେ ଏନେଇ ସୂଚନା ଦେଇଛନ୍ତି ।
ନୌସେନା ଦ୍ୱାରା ବିଜ୍ଞପ୍ତିରେ ନୂଆ ଡ୍ରେସ କୋଡ ସମ୍ବନ୍ଧରେ ରହିଥିବା ନିୟମ ଏବଂ ସର୍ତ୍ତ ଅନୁଯାୟୀ ଏହାକୁ କଡାକଡି ଭାବେ ପାଳନ କରିବାକୁ କୁହାଯାଇଛି। ନିର୍ଦ୍ଦେଶରେ ରହିଛି, କୁର୍ତ୍ତା-ପାଇଜାମା ସ୍ଲିଭଲେସ ଜ୍ୟାକେଟ ଏବଂ ପାରମ୍ପରିକ ଜୋତା । ମହିଳାଙ୍କ ପାଇଁ ଚୁଡିଦାର ଏବଂ କୁର୍ତ୍ତା ରହିଛି । ଏହି ପାରମ୍ପରିକ ଭାରତୀୟ ପୋଷାକ କେବଳ ପର୍ବପର୍ବାଣୀ ତଥା ବିଶେଷ ଉତ୍ସବରେ ପିନ୍ଧାଯିବ ବୋଲି ଜଣାପଡିଛି । ଭାରତୀୟ ସଂସ୍କୃତି ଓ ପରମ୍ପରାକୁ ଧ୍ୟାନରେ ରଖି ଏପରି ଡ୍ରେସ କୋଡ ବ୍ୟବସ୍ଥା କରାଯାଇଥିବା କୁହାଯାଇଛି ।
ପିନ୍ଧିଥିବା କୁର୍ତ୍ତାର କଲର ଉଭୟ ଖୋଲା କିମ୍ୱା ବନ୍ଦ ରଖିପାରିବେ ଯବାନ । କିନ୍ତୁ ଏହାର ରଙ୍ଗ କେବଳ ସିଲିଡ ଟୋନରେ ରହିବା ଆବଶ୍ୟକ । ଏହାର ଲମ୍ବ ଆଣ୍ଠୁ ପର୍ଯ୍ୟନ୍ତ ରହିବା ସହ ହାତରେ କଫଲିକ୍ସ ରହିବା ଉଚିତ। ପାଇଜାମା ଟ୍ରାଉଜର ପରି କମ୍ଫଟେବଲ ହେବା ଜରୁରୀ। ଇଲାଷ୍ଟିକ ଅଣ୍ଟା ଏବଂ ପକେଟ ରହିବା ଦରକାର । ଡ୍ରେସ ସିଲେଇ ହେବା ସମୟରେ ମହିଳାମାନଙ୍କୁ ଭାରତୀୟ ପରମ୍ପରାକୁ ଧ୍ୟାନରେ ରଖି ପୋଷାକ ତିଆରି କରିବାକୁ ପଡିବ ।
