ବିଜେପିରେ ଯୋଗଦେଲେ ସୋର ବିଧାୟକ ପର୍ଶୁରାମ ଧଡ଼ା

ଭୁବନେଶ୍ବର (ସଂକେତ ଟିଭି) : ସୋର ବିଧାୟକ ପର୍ଶୁରାମ ଧଡ଼ା ବିଜେପିରେ ଯୋଗଦେଇଛନ୍ତି । ସେ ବିଜେପି ରାଜ୍ୟ କାର୍ଯ୍ଯାଳୟଠାରେ ଦଳର ରାଜ୍ୟ ସଭାପତି ମନମୋହନ ସାମଲ, ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ ଓ ବିଜେପି ସହ-ପ୍ରଭାରୀ ଲତା ଉସେଣ୍ଡିଙ୍କ ଉପସ୍ଥିତିରେ ବିଧିବଦ୍ଧ ଭାବେ ବିଜେପିରେ ସାମିଲ ହୋଇଛନ୍ତି।

ମନମୋହନ ସାମଲ କହିଛନ୍ତି ଯେ ପର୍ଶୁରାମଙ୍କର ଘରବାହୁଡ଼ା ହୋଇଛି । ଅନ୍ୟପଟେ ବିଜେପିରେ ସାମିଲ ହେବା ପରେ ପର୍ଶୁରାମ ଧଡ଼ା କହିଛନ୍ତି, ବିଜେପିକୁ ଧନ୍ୟବାଦ। ଦୀର୍ଘ ୧୦ ବର୍ଷ ପରେ ପୁଣିଥରେ ଘରକୁ ଫେରିବାକୁ ସୁଯୋଗ ଦେଇଥିବାରୁ ଧନ୍ୟବାଦ। ବିଜେପିରୁ ମୋର ରାଜନୈତିକ କ୍ୟାରିୟର ଆରମ୍ଭ। ୨୦୦୯ରେ ବିଜେପି ଟିକେଟରେ ନିର୍ବାଚନ ଲଢି ଅଳ୍ପ ଭୋଟରେ ପରାଜିତ ହୋଇଥିଲି। ପରେ ୨୦୧୪ ଓ ୨୦୧୯ରେ ବିଜେଡି ଟିକେଟରୁ ବିଧାୟକ ହୋଇଥିଲି। କିନ୍ତୁ ଏବେ ବିଜେଡିରୁ ଇସ୍ତଫା ଦେଇ ବିଜେପିରେ ଯୋଗ ଦେଇଛି। ଦଳ ଯାହା ଦାୟିତ୍ୱ ଦେବ, ତାକୁ ସୂଚାରୁ ରୂପେ ତୁଲାଇବି। ଦଳର ଶୃଙ୍ଖଳିତ ସଦସ୍ୟ ଭାବେ କାମ କରିବି। ଦଳ ଯାହା ନିଷ୍ପତ୍ତି ନେବ, ତାହାକୁ ମୁଁ ଗ୍ରହଣ କରିବି।

ସୂଚନା ଅନୁସାରେ , ସୋର ନିର୍ବାଚନମଣ୍ଡଳୀରୁ ବିଜେଡି ଟିକେଟରେ ଦୁଇଥର ବିଧାୟକ ଭାବେ ନିର୍ବାଚିତ ହୋଇଥିବା ଧଡା ଏଥରକ ମଧ୍ୟ ଟିକେଟ ପାଇବା ନେଇ ଅଶାବାଦୀ ଥିଲେ। ହେଲେ, ତାଙ୍କ ବଦଳରେ ସୋର ପୌରାଧ୍ୟକ୍ଷ ମାଧବ ଧଡ଼ାଙ୍କୁ ଦଳ ପ୍ରାର୍ଥୀ କରିବାପରେ ସେ ଗତ ୩ ତାରିଖ ଦିନ ବିଜେଡିରୁ ଇସ୍ତଫା ଦେଇଥିଲେ। ସେତେବେଳକୁ ବିଜେପି ପ୍ରାର୍ଥୀ ଭାବେ ଭଦ୍ରକ ଧାମନଗରର ପୂର୍ବତନ ବିଧାୟକ ରାଜେନ୍ଦ୍ର ଦାସଙ୍କ ନାମ ଘୋଷଣା କରିସାରିଥିଲା। ତେଣୁ ପର୍ଶୁରାମ କଂଗ୍ରେସ ଟିକେଟରୁ ଲଢ଼ିବେ ବୋଲି ଚର୍ଚ୍ଚା ହୋଇଥିଲା। ମାତ୍ର, ଗତ ୧୪ ତାରିଖ ଦିନ କଂଗ୍ରେସ ପ୍ରାର୍ଥୀ ଭାବେ ସୁବ୍ରତ ଧଡ଼ାଙ୍କ ନାମ ଘୋଷଣା କରିବାପରେ ଉକ୍ତ ଚର୍ଚ୍ଚାରେ ମଧ୍ୟ ପୂର୍ଣ୍ଣଚ୍ଛେଦ ପଡ଼ିଲା। ଏବେ ପୁଣି ନୂଆ ଚର୍ଚ୍ଚା ହେଉଛି ଯେ ବିଜେପି ସୋରରେ ରାଜେନ୍ଦ୍ର ଦାସଙ୍କ ବଦଳରେ ପର୍ଶୁରାମ ଧଡ଼ାଙ୍କୁ ପ୍ରାର୍ଥୀ କରିପାରେ।